နောက် ၃ ရက်အတွင်း တစ်နိုင်ငံလုံး မိုးရွာသွန်းနိုင်

မြန်မာနိုင်ငံအလယ်ပိုင်း စစ်ကိုင်းတိုင်းအထက်ပိုင်းတွင် လေဖိအားနည်းချိုင့်ဝှမ်း(MONSOON TROUGH) ဖြစ်ပေါ်နေပြီး အဆိုပါ THROUGH LINE သည် ရှမ်းပြည်နယ်မြောက်ပိုင်းမှ လာအိုနိုင်ငံနှင့် ဗီယက်နမ်နိုင်ငံမြောက်ပိုင်းအထိ ဖြစ်ပေါ်နေပါတယ်။ ထို့အတူ အိန္ဒိယနိုင်ငံမြောက်ပိုင်း၊ နီပေါလ်နိုင်ငံနှင့် ဘူတန်နိုင်ငံတို့ပေါ်တွင်လည်း ကျယ်ပြန့်သောလေဖိအားနည်းရပ်ဝန်းကြီး ဖြစ်ပေါ်နေတာတွေ့ရပါတယ်။ အရှေ့ဘက် တောင်တရုတ်ပင်လယ်အနောက်မြောက်ပိုင်း ဟိုင်နန်ကျွန်းအနီးမှာတော့ ဩဂုတ်လ ၂၉ ရက်နေ့မှာ လေဖိအားနည်းရပ်ဝန်းတစ်ခု အစပျိုးလာနိုင်မယ့် အခြေအနေရှိနေပါတယ်။

နောက် ၃ ရက်မှ ၅ ရက်အတွင်း ဖြစ်ပေါ်နိုင်မယ့် မိုးလေဝသအခြေအနေ

မြန်မာနိုင်ငံပတ်ဝန်းကျင်မှာ ဖြစ်ပေါ်နေတဲ့ မိုးလေဝသအခြေအနေများကြောင့် နောက်လာမယ့် ၃ ရက်အတွင်း တစ်နိုင်ငံလုံးမှာမိုးရွာသွန်းနိုင်ပြီး ရခိုင်ပြည်နယ်၊ ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ ရှမ်းပြည်နယ်၊ ချင်းပြည်နယ်တောင်ပိုင်း၊ မန္တလေးတိုင်းအထက်ပိုင်း၊ စစ်ကိုင်းတိုင်းအထက်ပိုင်း၊ ကချင်ပြည်နယ်၊ မွန်ပြည်နယ်၊ ကရင်ပြည်နယ်နဲ့ တနင်္သာရီတိုင်းတွေမှာတော့ နေရာကွက်ပြီး မိုးကြီးနိုင်ပါတယ်။

နောက် ၃ ရက်အတွင်း မိုးနည်းနိုင်သည့်ဒေသများ

မန္တလေးတိုင်းတောင်ပိုင်း ရမည်းသင်း၊ ပျော်ဘွယ်နဲ့ သာစည်မြို့နယ်တွေမှာနောက်လာမယ့် ၃ ရက်အတွင်း မိုးရေချိန် ၈ မီလီမီတာခန့်သာရွာနိုင်ပြီး မိုးနည်းနေပါမယ်။

နောက် ၃ ရက်အတွင်း မိုးများနိုင်သည့်ဒေသများ

ရခိုင်ပြည်နယ်မြောက်ပိုင်းမြို့နယ်များ၊ စစ်ကိုင်းတိုင်းအထက်ပိုင်း၊ ကချင်ပြည်နယ်နဲ့ ဧရာဝတီ အနောက်ဘက်ကမ်းရိုးတန်းဒေသ (အပန်းဖြေကမ်းခြေဒေသများ) မှာ ၃ ရက်အတွင်း မိုးရေချိန် မီလီမီတာ ၉၀ ကျော်ရွာသွန်းပြီး မိုးများနိုင်ပါတယ်။ ကျန်ပြည်နယ်နဲ့တိုင်းဒေသအချို့မှာတော့ မိုးအသင့်အတင့် (၃ ရက်အတွင်း မိုးရေချိန် ၅၀ မီလီမီတာခန့်) ရွာသွန်းနိုင်ပါတယ်။

စက်တင်ဘာလဆန်းပိုင်းတွင်ဖြစ်လာနိုင်မယ့် ထူးခြားအခြေအနေ

စက်တင်ဘာလ လဆန်းပိုင်း (နောက်လာမည့် ၇ ရက်အတွင်း) ဘင်္ဂလားပင်လယ်အော် အနောက်အလယ်ပိုင်းနဲ့ အနောက်မြောက်ပိုင်းပင်လယ်ပြင်မှာ လေဖိအားနည်း ရပ်ဝန်းတစ်ခုဖြစ်လာနိုင်ပြီး မုန်တိုင်းငယ်အဆင့်အထိ ရောက်လာနိုင်ချေ ၆၀% ရှိနေကြောင်း ကြိုတင်ခန့်မှန်းချက်များမှာတွေ့ရပါတယ်။ ဒီအခြေအနေကြောင့် စက်တင်ဘာလဆန်းပိုင်း ရက်သတ္တတစ်ပတ်အတွင်းမှာ တစ်နိုင်ငံလုံး မိုးပိုလာနိုင်ဖွယ်ရှိပါတယ်။

Photos Crd_ U Win Naing

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။