အိန္ဒိယ၊ တရုတ်နိုင်ငံများမှ ဝယ်လိုအား မျှော်လင့်ချက် ရှိနေသော်လည်း ဇူလိုင်လ နောက်ဆုံးရက်သတ္တပတ်တွင် ပို့ကုန်ပဲများ၏ ပြည်ပဈေး ငြိမ်နေသည်။ သို့သော် ပြည်တွင်းစားသုံးသည့် ပဲနှင့် ဆီထွက်သီးနှံအချို့ ဈေးနှုန်း အနည်းငယ်သာ အပြောင်းအလဲ ရှိနေသည်။

မတ်ပဲ ပြည်တွင်းဈေး အနည်းငယ်လှုပ်

အိန္ဒိယတွင် မုတ်သုံမိုး ရရှိမှုအခြေအနေနှင့် စိုက်ပျိုးနိုင်မှု ပမာဏအပြောင်းအလဲက မတ်ပဲဈေးနှုန်းအပေါ် သက်ရောက်မှု ရှိနေသည်။

အယ်လ်နီညို ရာသီဥတုကြောင့် လာမည့်လများတွင် မိုးရရှိမှုနည်းပါက ပဲအထွက်နှုန်းအပေါ် ထိခိုက်လာမည်ကိုလည်း စိုးရိမ်မှုများ ရှိနေသည်။ ထို့ကြောင့် အိန္ဒိယ၏ မဟာဗျူဟာမြောက် သီးနှံဖြစ်သည့် မတ်ပဲဈေး အပြောင်းအလဲအပေါ် မတူညီသည့် သုံးသပ်ချက်အချို့ကိုလည်း တွေ့ရသည်။

လက်ရှိ အိန္ဒိယဈေးကွက်တွင် မြန်မာ့မတ်ပဲ FOB ဈေးမှာ မတ်ပဲ FAQ တစ်တန်လျှင် အမေရိကန်ဒေါ်လာ ၈၈၀ မှ ၈၇၅၊ မတ်ပဲ SQ တစ်တန်လျှင် ဒေါ်လာ ၉၇၅ မှ ၉၆၅ သို့ ဈေးအနည်းငယ် ပြောင်းလဲခဲ့သည်။

အိန္ဒိယဈေးကွက်တွင် မတ်ပဲဈေး ကျရိပ်သန်းနေသော်လည်း မြန်မာဈေးကွက်တွင် မတ်ပဲ FOB ဈေးမှာ ငြိမ်နေသည်။ မတ်ပဲ FAQ တစ်တန်လျှင် ဒေါ်လာ ၈၇၀/၈၈၀၊ မတ်ပဲ SQ တစ်တန်လျှင် ဒေါ်လာ ၉၆၀/၉၇၀ ဈေးဖွင့်ထားသည်။

ယခုရက်သတ္တပတ် မတ်ပဲပြည်တွင်းဈေးမှာ မတ်ပဲ FAQ တစ်တန်လျှင် ကျပ် ၃,၅၀၄,၀၀၀ မှ ၃,၅၀၂,၀၀၀ သို့ ဈေးကျပြီး ကျပ် ၃,၅၀၇,၀၀၀ သို့ ဈေးပြောင်းသွားသည်။ မတ်ပဲ SQ တစ်တန်လျှင် ကျပ် ၃,၈၅၄,၀၀၀ မှ ၃,၈၅၂,၀၀၀ သို့ ဈေးပြောင်းသွားသည်။

ဈေးငြိမ်နေသည့် ပဲတီစိမ်း

တရုတ်နိုင်ငံသို့ အဓိကရောင်းချနေသည့် ပဲတီစိမ်းမှာ ယခုရက်သတ္တပတ်တွင် ပြည်တွင်း၊ ပြည်ပဈေး ငြိမ်နေသော်လည်း ဝယ်လိုအားအချို့ ကောင်းလာနိုင်သည်ဆိုသည့် ဈေးကွက်မျှော်လင့်ချက် ရှိနေသည်။

မြန်မာ့ပဲတီစိမ်းကို အဓိကဝယ်ယူနေသည့် တရုတ်ဈေးကွက်က စိုက်ပျိုးမှု၊ အထွက်နှုန်းနှင့် ပိုးသတ်ဆေးဓာတ်ကြွင်းကို တင်းကြပ်စွာ စစ်ဆေးလာမှုမှာ ပို့ကုန်သမားများအတွက် အထူးဂရုစိုက် လုပ်ဆောင်ရမည့် အခြေအနေမျိုး ဖြစ်လာသည်။

ဇူလိုင်လအတွင်း ပဲတီစိမ်း ပြည်ပရောင်းချသည့် FOB ဈေးမှာ ကျဈေးတွင် ငြိမ်နေသည်။ ယခုရက်သတ္တပတ်တွင်လည်း ပဲတီစိမ်း (အညာ) FAQ တစ်တန်လျှင် ဒေါ်လာ ၇၄၀/၇၆၀၊ ပဲတီစိမ်း (ရွှေဝါ) တစ်တန်လျှင် ဒေါ်လာ ၉၀၀/၉၁၀ ဈေးဖွင့်သည်။

ပြည်တွင်းဈေးမှာ ပဲတီစိမ်း (အညာ) တစ်ပိဿာလျှင် ကျပ် ၄,၀၀၀/၄,၀၂၀၊ ပဲတီစိမ်း (ခရမ်းနှင့် ပဲခူး) ရွှေဝါတစ်ပိဿာလျှင် ကျပ် ၅,၅၈၀၊ ပဲတီစိမ်း (ဝါးခယ်မ) တစ်ပိဿာလျှင် ကျပ် ၄,၈၃၀/၄,၈၅၀ ဈေးဖွင့်သည်။

မန္တလေးဈေးကွက်တွင် ပဲတီစိမ်းမှာ တရုတ်ဝယ်အား ပျော့ခြင်းကြောင့် လက်ကျန်များနေပြီး ပဲတီစိမ်း (အညာ) တစ်တန်လျှင် ကျပ် ၂,၇၂၀,၀၀၀ ကျော် ဈေးဖွင့်သည်။

ပြည်တွင်းဈေး အနည်းငယ်ကျသည့် ကုလားပဲ

ပြည်တွင်းစားသုံးမှုများသည့် ကုလားပဲမှာ ယခုရက်သတ္တပတ်တွင် ပြည်ပဈေး ငြိမ်သော်လည်း ပြည်တွင်းဈေး အကျဘက်သို့ အနည်းငယ် အပြောင်းအလဲ ရှိနေသည်။

ရန်ကုန်ဈေးကွက်တွင် ကုလားပဲ ပြည်ပရောင်းချသည့် FOB ဈေးမှာ ကုလားပဲဖြူလုံးကြီး V2 တစ်တန်လျှင် ဒေါ်လာ ၆၆၀/၆၇၀ ဈေးဖွင့်သည်။ ကုလားပဲ ပြည်တွင်းဈေးမှာ ကုလားပဲဖြူလုံး တစ်ပိဿာလျှင် ကျပ် ၃,၇၇၀၊ ကုလားပဲဖြူလုံးကြီး တစ်ပိဿာလျှင် ကျပ် ၄,၂၁၀/၄,၃၃၅ ဈေးဖွင့်သည်။

မန္တလေးဈေးကွက်တွင် ကုလားပဲမှာ အမျိုးအစားအလိုက် ဈေးနှုန်းအပြောင်းအလဲများ ရှိနေသည်။ ပဲကြော်၊ ပဲလှော်လုပ်ငန်းများနှင့် ပဲခွဲစက်လုပ်ငန်းများမှ ဝယ်လိုအားပေါ် မူတည်နေသည့် ကုလားပဲမှာ ယခုရက်သတ္တပတ်တွင် အမျိုးအစားအချို့ ဈေးအနည်းငယ် အားပျော့လာသည်။

မန္တလေးဈေးကွက်တွင် ကုလားပဲဖြူလုံးကြီး V2 မှာ တစ်တန်လျှင် ကျပ် ၂,၄၃၀,၀၀၀ ကျော်တွင် ဈေးငြိမ်နေသည်။ ကုလားပဲ (TW) သစ် တစ်တန်လျှင် ကျပ် ၂,၃၆၀,၀၀၀ ကျော်မှ ၂,၃၄၀,၀၀၀ ကျော်၊ ကုလားပဲ (929) သစ် တစ်တန်လျှင် ကျပ် ၂၅ သိန်းကျော်မှ ၂,၄၈၀,၀၀၀ ကျော်၊ ကုလားပဲဖြူလုံးကြီး V7 တစ်တန်လျှင် ကျပ် ၂,၄၃၀,၀၀၀ ကျော်မှ ၂,၄၂၀,၀၀၀ ကျော်သို့ ဈေးပြောင်းသွားသည်။

အမျိုးအစားအလိုက် နှမ်းဈေးမြင့်လာ

ယခုရက်သတ္တပတ်တွင် ဆီထွက်သီးနှံ နှမ်းမှာ အမျိုးအစားအလိုက် ပြည်ပရောင်းချသည့် ဈေးအပြောင်းအလဲများ ရှိသကဲ့သို့ ပြည်တွင်းဈေး အတက်အကျ ရှိလာသည်။

ရန်ကုန်ဈေးကွက်တွင် တရုတ်နိုင်ငံ၏ ဝယ်လိုအား မျှော်လင့်ချက် လျော့နည်းမှုကြောင့် နှမ်းနက် (စမုံ) FOB ဈေးကျသော်လည်း နှမ်းဖြူနှင့် နှမ်းညိုဈေး မြင့်လာသည်။

နှမ်းနက် (စမုံ) ၏ FOB ဈေးမှာ နှမ်းတစ်တန်လျှင် ဒေါ်လာ ၂,၁၇၅/၂,၁၈၅ မှ ၂,၀၇၅/၂,၀၈၅ သို့ ဈေးပြောင်းသွားသည်။ သို့သော် နှမ်းဖြူမှာ တစ်တန်လျှင် ဒေါ်လာ ၁,၃၆၅/၁,၃၇၅ မှ ၁,၄၀၅/၁,၄၁၅၊ နှမ်းညိုတစ်တန်လျှင် ဒေါ်လာ ၁,၂၉၅/၁,၃၀၅ မှ ၁,၃၄၅/၁,၃၅၅ သို့ ဈေးပြောင်းသွားသည်။

ယခုရက်သတ္တပတ် ပြည်တွင်းနှမ်းဈေးမှာ နှမ်းဖြူ (ဂျပန်) တစ်မျိုးသာ ဈေးအနည်းငယ်ကျပြီး နှမ်းနက် (စမုံ) နှင့် နှမ်းညို (သစ်) မှာ ဈေးမြင့်တက်လာသည်။

ဇူလိုင် ၂၇ ရက်မှ ၃၀ ရက်အတွင်း ပြည်တွင်းနှမ်းဈေးမှာ နှမ်းဖြူ (ဂျပန်) တစ်တန်လျှင် ကျပ် ၅,၅၇၀,၀၀၀ ကျော်မှ ၅,၅၁၀,၀၀၀ ကျော်သို့ ဈေးပြောင်းသွားသည်။ နှမ်းနက် (စမုံ) တစ်တန်လျှင် ကျပ် ၇,၂၁၀,၀၀၀ ကျော်မှ ၇,၃၄၀,၀၀၀ ကျော်၊ နှမ်းညို (သစ်) တစ်တန်လျှင် ကျပ် ၅,၁၇၀,၀၀၀ ကျော်မှ ၅,၂၃၀,၀၀၀ ကျော်သို့ ဈေးပြောင်းသွားသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။