လက်ရှိ ပြည်တွင်း လက်ကျန်နည်းနေပြီး ပြည်ပ အရောင်းအဝယ် လိုက်နေသည့်အတွက် ကြက်သွန်နီဈေး ဆက်တက်နေကြောင်း ကုန်သည်များထံမှ သိရသည်။

လက်ရှိ တောင်သူများ လက်ဝယ်နှင့် ကုန်သည်အချို့တွင် ကြက်သွန်များ လက်ကျန်နည်းနေပြီး ထိုင်းနိုင်ငံမှလည်း အဝယ်လိုက်နေ၍ ဈေးများ ဆက်တိုက် မြင့်တက်လာခြင်းဖြစ်ကြောင်းလည်း သုံးသပ်ထားကြသည်။

"ဈေးက တက်နေတယ်။ အခုနောက်ပိုင်း ဆက်တိုက်တက်လာတာ။ လက်ရှိ ရန်ကုန် အရောင်းအဝယ်သွက်နေတယ်။ မနက်ဖြန် ဈေးဆက်တက်နိုင်သည်။ ဘာလို့လဲဆိုတော့ ကျွန်တော့်အမြင် နယ်မှာလည်း ကုန်အားနည်းနေပါပြီ" ဟု ရန်ကုန် ဘုရင့်နောင်ပွဲရုံမှ ကုန်သည်တစ်ဦးက ပြောသည်။

ရန်ကုန် ဘုရင့်နောင် ကုန်စည်ဒိုင်တွင် ပြီးခဲ့သည့်အပတ်နှင့် ယှဉ်ပါက တစ်ပိဿာလျှင် ကျပ် ၅၀၀ မှ ၁,၀၀၀ ခန့်အထိ မြင့်တက်လာပြီး လက်ရှိ ဆိပ်ဖြူကြက်သွန် တစ်ပိဿာလျှင် အရွယ်အစား၊ အရည်အသွေးပေါ် မူတည်ကာ ကျပ် ၅,၁၀၀ မှ ၆,၁၀၀၊ မုံရွာတစ်ပိဿာလျှင် ကျပ် ၅,၅၀၀ မှ ၆,၃၀၀ နှင့် မြစ်သားကြက်သွန် တစ်ပိဿာလျှင် ကျပ် ၅,၅၀၀ မှ ၆,၃၀၀ အထိ ဈေးပေါက်ကြောင်း သိရသည်။

ယင်းကဲ့သို့ ဈေးတက်နေ၍ အချို့သော ကုန်သည်များမှာလည်း ထိန်းထိန်းသိမ်းသိမ်း ဆောင်ရွက်နေကြသည့်အတွက် တရိပ်ရိပ်ဖြင့် တက်လာနေခြင်းဖြစ်ကြောင်းလည်း သိရသည်။

လက်ရှိ ဓာတ်မြေဩဇာ၊ ပိုးသတ်ဆေး၊ စက်သုံးဆီနှင့် လုပ်အားခများ ယခင်နှစ်များထက် သိသိသာသာ မြင့်တက်နေခြင်းကြောင့် တောင်သူများအတွက် စိုက်ပျိုးစရိတ်မြင့်နေပြီး တောင်သူအချို့ အခက်အခဲဖြစ်နေကြောင်းလည်း သိရသည်။

"အခုက ဈေးတက်တာဟာ တောင်သူနဲ့ မဆိုင်တော့ပါဘူး။ မရောင်းဘဲ သိုလှောင်ထားနိုင်တဲ့ တောင်သူအချို့ပဲ ဈေးကောင်းနဲ့ ကြုံနိုင်တာပါ။ ဒါကလည်း ရှားပါတယ်။ အခုချိန်မှ တက်လည်း ပွဲစားနဲ့ ကုန်သည်တွေအတွက်ပဲ အကျိုးအမြတ်ရတာပါ။ တောင်သူက စိုက်စရိတ်ကြီးတာကို ဒဏ်ခံရတာ" ဟု ကြက်သွန်နီစိုက် တောင်သူတစ်ဦးက ပြောသည်။

လက်ရှိ အချို့နယ်မြေ မတည်ငြိမ်မှုများနှင့် ရာသီဥတုအခြေအနေကြောင့် စိုက်ပျိုးမှုဧရိယာ လျော့နည်းလာကြောင်း သိရသည်။

မြန်မာနိုင်ငံတွင် ကြက်သွန်နီကို ပခုက္ကူ၊ မုံရွာ၊ မြင်းခြံ၊ တောင်သာ၊ ရေစကြိုနှင့် ဆိပ်ဖြူဒေသများတွင် အများဆုံး စိုက်ပျိုးလျက်ရှိသည်။

ယင်းအပြင် ကြက်သွန်နီကို ပြည်ပတင်ပို့မှု (Export) အနေဖြင့် ထိုင်းနိုင်ငံနှင့် တရုတ်နိုင်ငံ စသည့် နိုင်ငံများသို့ တင်ပို့ရောင်းချလျက်ရှိသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။