ကျွဲ၊ နွား၊ သိုး၊ ဆိတ် တင်ပို့ရောင်းချမှုဈေးကွက် ပြန်လည်ကောင်းမွန်မည့် အလားအလာရှိနေ

    ပြည်တွင်းပြည်ပသို့ ကျွဲ၊ နွား၊ သိုး၊ ဆိတ် တင်ပို့ရောင်းချမှုဈေးကွက် ပြန်လည်ကောင်းမွန်မည့် အလားအလာရှိနေကြောင်း မြန်မာနိုင်ငံ ကျွဲ၊ နွား၊ သိုး၊ ဆိတ် တင်ပို့ရောင်းချသူများအသင်းမှ သိရသည်။

ကျွဲ၊ နွားနဲ့ပတ်သက်ပြီး ဈေးကွက်ကတော့ စတင်လှုပ်ရှားနေပြီ။ ရှေ့လဆန်းမှာ ဈေးကွက်အလားအလာကောင်းဖို့လည်း ရှိနေပါတယ်။ အခုလောလောဆယ်မှာက ရက်အနည်းငယ်စောနေသေးတယ်။ အဆင်ပြေမယ်ဆိုရင်တော့ ပြည်ပဝင်ငွေရဖို့ လမ်းကြောင်းတွေ ရှိလာမှာပါ။

ဟု မြန်မာနိုင်ငံ ကျွဲ၊ နွား၊ သိုး၊ ဆိတ် တင်ပို့ရောင်းချသူများအသင်း၏ ဒုတိယဥက္ကဌ ဦးထက်သူအောင်က ပြောသည်။

    နယ်စပ်လမ်းကြောင်းများမှ အိမ်နီးချင်းနိုင်ငံတချို့ထံ တင်ပို့ရောင်းချခဲ့ကြသည့် ဆိတ်အရှင်တင်ပို့မှုဈေးကွက်သည်လည်း ယခုနောက်ပိုင်းတွင် ပြန်လည်ကောင်းမွန်လာနိုင်သည့် အလားအလာများရှိကြောင်း သိရသည်။

ကျွဲ၊ နွားနဲ့ပတ်သက်ပြီး ဈေးကွက်လိုအပ်ချက်ရှိသလို ဆိတ်ဈေးကွက်ကလည်း အတူတူပါပဲ။ ငွေအနည်းအများတော့ ကွာနိုင်တာပေါ့။ အခုကာလအတွင်းဆိုတော့ လမ်းကြောင်းတွေတော့ အကုန်မပွင့်သေးပေမယ့်လည်း စည်းကမ်းလေးနဲ့သွားလာရင်တော့ ရပါတယ်။

ဟု ဦးထက်သူအောင် က ဆက်လက်ပြောသည်။

    Covid-19 ကာလအတွင်း ပြည်ပတင်ပို့မှုတချို့ ရပ်ဆိုင်းခဲ့သည့်အပြင် စားသောက်ဆိုင်၊ ဟိုတယ်၊ ခရီးသွားလုပ်ငန်းများ လည်ပတ်မှုအားနည်းသဖြင့် ပြည်တွင်းအသားဈေးကွက်မှာလည်း ပုံမှန်ထက်အေးစက်ခဲ့သည်။ ထို့ကြောင့် မွေးမြူရေးလုပ်ငန်းလုပ်ကိုင်သည့် ခြံရှင်များအနေဖြင့် လုပ်သားစရိတ်၊ အစာဖိုး ကုန်ကျစရိတ်များအတွက် ခက်ခဲစွာဖြေရှင်းခဲ့ရကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။