တစ်ပတ်စာ ဈေးကွက်သုံးသပ်ချက် (၂၄ -၂၈.၈.၂၀၂၆)

ပြည်ပပို့ကုန်ပဲများ ဈေးကွက်မျှော်လင့်ချက် ရှိနေသော်လည်း ပြည်တွင်းဈေးနှုန်းအပေါ် သိသာသည့် အပြောင်းအလဲများ မရှိသေးပေ။ သို့သော် ပြည်တွင်း အဓိက စားသုံးသည့်ပဲနှင့် နှမ်းမှာ ပြည်တွင်းဈေး လှုပ်လာသည်။

ဈေးကွက်မျှော်လင့်ချက် ရှိနေသည့် ပဲတီစိမ်း

လူဦးရေ ၁ ဒသမ ၃ ဘီလီယံကျော် တည်ရှိနေသည့် တရုတ်ဈေးကွက်၏ ဝယ်လိုအား မျှော်လင့်ချက်က ပြည်တွင်း ပဲတီစိမ်းစိုက်ပျိုးသည့် တောင်သူလယ်သမားများအပေါ် သက်ရောက်မှု ရှိနေသည်။

ပြီးခဲ့သည့် ဘဏ္ဍာနှစ်တွင် ပဲတီစိမ်း တန်ချိန် သုံးသိန်းခွဲကျော် ဝယ်ယူခဲ့သည့် တရုတ်ဈေးကွက်က လက်တလော ဝယ်လိုအား နည်းသည်။ တရုတ်နိုင်ငံအတွင်း စိုက်ပျိုးထားသည့် ပဲတီစိမ်းအသစ်များ ဈေးကွက်ဝင်ချိန် ဖြစ်သောကြောင့် ဝယ်အားနည်းခြင်းဆိုသည့် သုံးသပ်ချက်များ ရှိနေသည်။

သို့သော် တရုတ်နိုင်ငံသားများ၏ စားသုံးမှုပမာဏက တိုးတက်နေခြင်းကြောင့် မြန်မာ့ပဲတီစိမ်းအတွက် ဈေးကွက်မျှော်လင့်ချက်များ ရှိနေသည်။

လက်ရှိ ဈေးကွက်အတွင်း ပဲတီစိမ်းမှာ ပြည်ပဈေး ငြိမ်ပြီး ပြည်တွင်းဈေးကွက်တွင် အမျိုးအစားအလိုက် ဈေးနှုန်းပြောင်းလဲမှုများ ရှိနေသည်။

ယခုရက်သတ္တပတ် ပဲတီစိမ်း FOB ဈေးမှာ ပဲတီစိမ်း (အညာ) တစ်တန်လျှင် အမေရိကန်ဒေါ်လာ ၇၅၀/၇၆၀၊ ပဲတီစိမ်း (ရွှေဝါ) တစ်တန်လျှင် အမေရိကန်ဒေါ်လာ ၉၀၀/၉၁၀ ဈေးဖွင့်သည်။

ရန်ကုန်ဈေးကွက်တွင် ပဲတီစိမ်း ပြည်တွင်းဈေးမှာ ဝါးခယ်မ (FAQ) တစ်ပိဿာလျှင် ကျပ် ၄,၈၃၀/၄,၈၅၀ မှ ၄,၆၆၅/၄,၆၈၅ သို့ ဈေးပြောင်းသည်။ ပဲတီစိမ်း (အညာ) မှာ တစ်ပိဿာလျှင် ကျပ် ၄,၀၀၀/၄,၀၂၀၊ ပဲတီစိမ်း (ခရမ်းနှင့် ပဲခူး) ရွှေဝါ တစ်ပိဿာလျှင် ကျပ် ၅,၆၆၅ ဖြင့် ဈေးငြိမ်နေသည်။

မန္တလေးဈေးကွက်တွင် ပဲတီစိမ်း (အညာ) မှာ တစ်တန်လျှင် ကျပ် ၂,၆၁၀,၀၀၀ ကျော် ဈေးဖွင့်သည်။

ပြည်တွင်းဈေး ကျရိပ်သန်းနေသည့် ပဲစင်းငုံ

အိန္ဒိယနိုင်ငံအတွင်း ပွဲတော်ရက်များ နီးလာသဖြင့် ပဲစင်းငုံဈေး အနည်းငယ် လှုပ်လာသည်။ ကာလတိုအတွင်း ပဲစင်းငုံဈေး အတက်ဘက်သို့ ပြောင်းနေသည်။

အယ်လ်နီညို ရာသီဥတုအကျိုးဆက်ကို စောင့်ကြည့်နေရသဖြင့် အိန္ဒိယအစိုးရက အရံပဲ ထုတ်ရောင်းမည့် အလားအလာ မရှိသေးပေ။ ထို့ကြောင့် အိန္ဒိယဈေးကွက်တွင် မြန်မာ့ပဲစင်းငုံမှာ တစ်တန်လျှင် ၁၀ ဒေါ်လာဝန်းကျင် ဈေးတက်လာသည်။

ယခုရက်သတ္တပတ်အတွင်း အိန္ဒိယဈေးကွက်တွင် မြန်မာ့ပဲစင်းငုံ FOB ဈေးမှာ တစ်တန်လျှင် အမေရိကန်ဒေါ်လာ ၈၂၅ မှ ၈၃၅ သို့ ဈေးပြောင်းသွားသည်။

အိန္ဒိယဈေးကွက်တွင် ပဲစင်းငုံဈေး တက်ရိပ်ပြနေသော်လည်း မြန်မာနိုင်ငံတွင် ပဲစင်းငုံ (ပြည်ပရောင်းချသည့်) FOB ဈေး ငြိမ်နေသည်။ ပဲစင်းငုံ (နီ) 2024-25 တစ်တန်လျှင် အမေရိကန်ဒေါ်လာ ၇၆၀/၇၇၀၊ ပဲစင်းငုံ (နီ) 2025-26 တစ်တန်လျှင် အမေရိကန်ဒေါ်လာ ၇၉၀/၈၀၀ ဈေးဖွင့်သည်။

သို့သော် ပြည်တွင်းဈေးကွက်တွင် ပဲစင်းငုံ (နီ) ဈေး အပြောင်းအလဲများ ရှိနေသည်။ ယခုရက်သတ္တပတ်အတွင်း ရန်ကုန်ဈေးကွက်တွင် ပဲစင်းငုံ (နီ) တစ်တန်လျှင် ကျပ် ၃,၃၅၈,၀၀၀ မှ ၃,၃၉၀,၀၀၀ သို့ ဈေးတက်ပြီး ၃,၃၅၀,၀၀၀ သို့ ဈေးပြန်ဆင်းလာသည်။

မန္တလေးဈေးကွက်တွင် ပဲစင်းငုံ (နီ) သစ်မှာ တစ်တန်လျှင် ကျပ် ၃,၁၉၀,၀၀၀ ကျော်မှ ၃,၂၂၀,၀၀၀ ကျော်သို့ ဈေးပြောင်းသွားသည်။

ပြည်တွင်းနှမ်းဈေး အနည်းငယ်လှုပ်

တရုတ်ဈေးကွက်မှ ဝယ်လိုအား မျှော်လင့်ချက် ရှိနေသဖြင့် အရည်အသွေးကောင်း နှမ်းများ သိုလှောင်ထားရန် တိုက်တွန်းမှုအချို့ကို တွေ့မြင်လာရသည်။ လက်ရှိ ပြည်တွင်းဈေးကွက်တွင် အရည်အသွေးပိုင်း အားနည်းချက်၊ အက်စစ်မလွတ်သည့် နှမ်းများ ဈေးနှိမ်ခံရသည်ဆိုသည့် ပြောဆိုမှုများလည်း ရှိနေသည်။

ယခုရက်သတ္တပတ်တွင် နှမ်း၏ ပြည်ပရောင်းချသည့် FOB ဈေး ငြိမ်နေသော်လည်း ပြည်တွင်းဈေးကွက်တွင် နှမ်းအမျိုးအစားအချို့ ဈေးလှုပ်လာသည်။

ရန်ကုန်ဈေးကွက်တွင် နှမ်း ပြည်ပ FOB ရောင်းဈေးမှာ နှမ်းဖြူ တစ်တန်လျှင် အမေရိကန်ဒေါ်လာ ၁,၅၀၀/၁,၅၁၀၊ နှမ်းညို တစ်တန်လျှင် အမေရိကန်ဒေါ်လာ ၁,၄၈၀/၁,၄၉၀၊ နှမ်းနက် (စမုံ) တစ်တန်လျှင် အမေရိကန်ဒေါ်လာ ၁,၉၅၅/၁,၉၆၅ ဈေးဖွင့်သည်။

ယခုရက်သတ္တပတ် ဩဂုတ် ၂၇ ရက်အထိ ပြည်တွင်းဈေးကွက်တွင် နှမ်းနက် (စမုံ) တစ်မျိုးသာ ဈေးငြိမ်ပြီး နှမ်းဖြူ (ဂျပန်) နှင့် နှမ်းညို (သစ်) မှာ ဈေးအပြောင်းအလဲ ရှိနေသည်။

နှမ်းနက် (စမုံ) တစ်တန်လျှင် ကျပ် ၇,၃၄၀,၀၀၀ ကျော်ဖြင့် ဈေးငြိမ်နေပြီး နှမ်းဖြူ (ဂျပန်) တစ်တန်လျှင် ကျပ် ၅,၉၈၀,၀၀၀ ကျော်မှ ၆,၁၉၀,၀၀၀ ကျော်၊ နှမ်းညို (သစ်) တစ်တန်လျှင် ကျပ် ၅,၅၇၀,၀၀၀ ကျော်မှ ၅,၆၄၀,၀၀၀ ကျော်သို့ ဈေးပြောင်းသွားသည်။

ကုလားပဲဈေး လှုပ်လာ

ပြည်တွင်း အဓိကစားသုံးပြီး ပြည်ပဈေးကွက် တင်ပို့ရန် အလားအလာကောင်း ရှိနေသည့် ကုလားပဲမှာ ယခုရက်သတ္တပတ်တွင် ဈေးမြင့်တက်နေသည်။ ပြည်တွင်းဈေး သာမက ပြည်ပရောင်းချသည့် FOB ဈေးပါ မြင့်တက်လာသည်။

ရန်ကုန်ဈေးကွက်တွင် ကုလားပဲ ပြည်ပရောင်းချမည့် FOB ဈေးမှာ ကုလားပဲဖြူလုံးကြီး V2 FAQ တစ်တန်လျှင် ဒေါ်လာ ၃၀ ဈေးမြင့်တက်သွားသည်။ ပဲတစ်တန်လျှင် အမေရိကန်ဒေါ်လာ ၆၆၅/၆၇၅ မှ ၆၉၅/၇၀၅ သို့ ဈေးပြောင်းသွားသည်။

ပြည်တွင်းဈေးကွက်တွင် ကုလားပဲဖြူလုံး တစ်ပိဿာလျှင် ကျပ် ၃,၈၆၀ မှ ၄,၀၃၅ သို့ ဈေးပြောင်းပြီး ကုလားပဲဖြူလုံးကြီး တစ်ပိဿာလျှင် ကျပ် ၄,၂၁၀/၄,၃၇၅ ဈေးဖွင့်သည်။

မန္တလေးဈေးကွက်တွင် ကုလားပဲ (TW) တစ်တန်လျှင် ကျပ် ၂,၅၅၀,၀၀၀ ကျော်ဖြင့် ဈေးငြိမ်နေသည်။ ကုလားပဲဖြူလုံးကြီး V2 သစ်မှာ တစ်တန်လျှင် ကျပ် ၂,၆၅၀,၀၀၀ ကျော်မှ ၂,၅၇၀,၀၀၀ ကျော်၊ ကုလားပဲဖြူလုံးကြီး V7 တစ်တန်လျှင် ကျပ် ၂,၆၇၀,၀၀၀ ကျော်မှ ၂,၆၉၀,၀၀၀ ကျော်သို့ ဈေးပြောင်းသွားသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။