စိုက်ပျိုးရေ လုံလောက်စွာ မရရှိခြင်း၏ အကြောင်းရင်းများ

15/12/2017 10:53 AM တွင် အစိမ်းရောင်လမ်း အစိမ်းရောင်လမ်း မှ ရေးသား

               နိုင်ငံအလယ်ပိုင်းဒေသမှ လွဲ၍ အခြားဒေသများတွင် မိုးရေကို လုံလောက်စွာ ရရှိသည်ဟု ဆိုနိုင်ပါသည်။ နိုင်ငံအလယ်ပိုင်းဒေသတွင်မှု ရွာသွန်းသော မိုးရေချိန် ပမာဏ နည်းပါးခြင်း၊ မိုးပြတ်သော ကာလ ကြာမြင့်တတ်ခြင်း၊ အပူချိန်မြင့်မား၍ သီးနှံပင် ရေလိုအပ်မှုများခြင်းအကြောင်းများအပြင် ရွာသွန်းသော မိုးရေကို မြေဆီလွှာ အတွင်း စနစ်တကျ သိုလှောင်သိမ်းဆည်းနိုင်မှုမရှိခြင်းသည်လည်း သီးနှံပင်ရေလုံလောက်စွာ မရခြင်း၏ အကြောင်းရင်း တစ်ရပ် ဖြစ်ပါသည်။

                ရွာသွန်းသောမိုးရေကို မြေဆီလွှာ အတွင်း စိုက်ခင်းအတွင်း စနစ်တကျ သိုလှောင်သိမ်းဆည်းနိုင်ပါက ရက် ၉၀ ရှိ သော သီးနှံတစ်ခုအတွက် မိုးရေချိန် ၁၂ လက်မသည် လုံလောက်သည်။

              အချို့သော ဒေသ (အထူးသဖြင့် မိတ္ထီလာ၊ ပျော်ဘွယ်၊ ရမည်းသင်း) များတွင် ရွာသွန်းသော မိုးရေကို မိရိုးဖလာနည်းဖြင့် ဖမ်းယူ၍ မြေဆီလွှာ စိုက်ခင်းအတွင်း စိမ့်ဝင်သွားအောင် ဆောင်ရွက်နေကြသည်ကို တွေ့မြင်ရသော်လည်း များသောအားဖြင့်မူ မိုးကြီးရွာသွန်းပါက စိုက်ခင်းပြင်ပသို့ စီးထွက်သွားခြင်းဖြင့် ရွာသွန်းသောမိုးရေကို စနစ်တကျ ဖမ်းယူ သိုလှောင်နိုင်ပါက မိုးနှောင်းသီးနှံများ၏ အောင် မြင်မှုနှုန်းသည် ယခုထက်များစွာ မြင့်မားနိုင်ပါသည်။

           မြစ်ချောင်းများ၏ စုစုပေါင်းစီးဆင်းရေ ပမာဏသည် ဧကပေသန်းပေါင်း ၈၇၀ ခန့်ရှိသော်လည်း ဧကပေသန်းပေါင်း ၃၀ ခန့်သာ အသုံးပြုနိုင်ပြီး ကျန်ဧက ပေသန်းပေါင်း ၈၃၀ ခန့်မှာ ပင်လယ်ထဲသို့ စီးဝင်ဆုံးရှုံးရပါသည်။ မြစ်ချောင်းများမှ ရေကို အသုံးမပြုနိုင်ခြင်း၏ အကြောင်းအရင်းများမှာ-

၁။ မြစ်ချောင်းများသည် မြေနိမ့်ပိုင်းတွင် စီးဆင်း၍ စိုက်ခင်းများမှာ အမြင့်ပိုင်းတွင် ရှိနေခြင်း။

၂။ ရေရရှိရေး စီမံကိန်းများ၏ အရည်အသွေးညံ့ဖျင်းခြင်း။

၃။ တည်ဆောက်သော စီမံကိန်းများ၏ အရည်အသွေးညံ့ဖျင်းခြင်း။ 

၄။ ဆည်မြောင်းစီမံကိန်းကြီးများ၏ ရေပေးဝေမှုစနစ် ညံ့ဖျင်းခြင်း။

၅။ အစိုရ၏ မူဝါဒ အားနည်းခြင်း။ 

၆။ စီမံခန့်ခွဲမှုစနစ် အားနည်းခြင်း။

၇။ နည်းပညာပိုင်းဆိုင်ရာ အားနည်းခြင်း စသည်တို့ဖြစ်ပါသည်။

            စာရင်းအရ ဆည်မြောင်းစနစ်ဖြင့် ရေပေးဝေသော ဧရိယာဧက လေးသန်းခန့်ရှိပြီး မြစ်ရေတင်စနစ်ဖြင့် ရေပေးဝေသော ဧရိယာမှာ ငါးသိန်းခန့်ရှိပါသည်။ သို့သော် အမှန်တကယ်စိုက်ပျိုးရေ ပုံမှန်ရရှိသော ဧရိယာမှာ ထိုထက် လျော့နည်းနိုင်ပါသည်။ မြစ်ဝှမ်းဧရိယာ ရှစ်ခုတွင် နှစ်စဉ်ပြန်လည် ဖြည့်တင်းနိုင်သော မြေအောက်ရေ ပမာဏ ဧကပေသန်းပေါင်း ၄၉၀ ခန့်ရှိသည်။ သို့သော်လည်း စာရင်းအရ စက်ရေတွင်းပေါင်း ၈၀၀၀ ကျော်မှ စိုက်ဧက တစ်သိန်းကျော်လောက်သာ မြေအောက်ရေဖြင့် စိုက်ပျိုးလျက်ရှိပါသည်။ မြေအောက်ရေအပြည့်အဝ အသုံးအပြုနိုင်ခြင်း အကြောင်းအရင်းများမှာ-

၁။ မြေအောက်ရေတွင် ဆားများပါဝင်နေခြင်း၊

၂။ စက်ရေတွင်းတူးဖော်သော စာရိတ်ကြီးမားခြင်း။

၃။ စက်တပ်ဆင်ရသော စာရိတ်ဖြင့် ရေတင်ရေသာ စရိတ်ကြီးမားခြင်း။

၄။ စက်ရေတွင်းတူးဖော်ခြင်းနှင့် ရေတင်ခြင်းတွင် နည်းပညာအားနည်းခြင်း။

၅။ မြေအောက်ရေတည်ရှိမှု အနေအထားကို လေ့လာမှုအားနည်းခြင်း။ 

၆။ အစိုးရ၏ မူဝါဒနှင့် စီမံခန့်ခွဲမှု အားနည်းခြင်းတို့ ဖြစ်ပါသည်။

ကိုးကား-စိုက်ပျိုးရေးတက္ကသိုလ် ဘွဲ့ရများအသင်းမှ ထုတ်ဝေသော မဂ္ဂဇင်းမှ ပြန်လည်ကူးယူ ဖော်ပြထားခြင်း ဖြစ်ပါသည်။