ခရမ်းချဥ်နဲ့ တွဲဖက်စိုက်ပျိုးသင့်သည့် အကောင်းဆုံးအပင် (၆) မျိုး

အဖော်ပင်စိုက်ပျိုးခြင်း (သို့မဟုတ်) သီးနှံပင်များကို အတူယှဉ်တွဲစိုက်ပျိုးခြင်းဟာ အဖျက်ပိုးမွှားတွေကို တွန်းလှန်နိုင်ပြီး ကျန်းမာသန်စွမ်းတဲ့ အပင်တွေရရှိလာစေဖို့ ကူညီပေးနိုင်တဲ့ သဘာဝစိုက်ပျိုးနည်းစနစ်တစ်ခု ဖြစ်ပါတယ်။ တစ်နည်းအားဖြင့် သီးနှံပင်အချင်းချင်း အပြန်အလှန် အကျိုးပြုနိုင်တဲ့ အပင်တွေကို ဆိုလိုတာ ဖြစ်ပါတယ်။ အဆိုပါ အကျိုးပြုနိုင်တဲ့ပုံစံတွေကတော့ သဘာဝနည်းဖြင့် ပိုးမွှားထိန်းချုပ်နိုင်ခြင်း၊ ၀တ်မှုန်ကူး အင်းဆက်တွေရဲ့ လုပ်ဆောင်မှုကို တိုးမြှင့်ပေးနိုင်ခြင်း၊ အပင်နဲ့ မြေဆီလွှာရဲ့ ကျန်းမာရေးကို ပိုမို ကောင်းမွန်စေခြင်း၊ အရိပ်ရရှိစေခြင်း၊ အထောက်အကူရရှိစေခြင်း၊ ပေါင်းနှိမ်နင်းပေးနိုင်ခြင်းနဲ့ ရောဂါကျရောက်မှုကို ခံနိုင်ရည်ရှိစေခြင်း စတာတွေ ပါဝင်နေတာဖြစ်ပါတယ်။ 

ယခုဆောင်းပါးမှာတော့ ခရမ်းချဥ်ပင်နဲ့ တွဲဖက်စိုက်ပျိုးနိုင်တဲ့ အပင်တွေအကြောင်းကို မျှဝေပေးမှာ ဖြစ်ပါတယ်။

၁။ ပင်စိမ်း 

ခရမ်းချဉ်နဲ့ ပင်စိမ်းဆိုတာ ကြီးထွားမှုဆိုင်ရာ လိုအပ်ချက်တွေတူညီကြတာမို့ အတူယှဥ်တွဲစိုက်ပျိုးနိုင်တာ ဖြစ်ပါတယ်။ အပင်နှစ်မျိုးစလုံးဟာ ပူနွေးတဲ့ရာသီဥတုကို ကြိုက်နှစ်သက်ကြပြီး ၆၀ မှ ၇၅ ဒီဂရီဖာရင်ဟိုက် (၁၅ - ၂၃ ဒီဂရီစင်တီဂရိတ်)  အတွင်းမှာ ကောင်းစွာရှင်သန်နိုင်ကြပါတယ်။

သင်းပျံ့တဲ့ ပင်စိမ်းရဲ့ရနံ့ဟာ ပျ ပိုး၊ မွှားပင့်ကူ၊ လှေးပိုးနဲ့ ခရမ်းချဉ်သီးမှာ ကျရောက်တတ်တဲ့ hornworm ကဲ့သို့ အဖျက်ပိုးမွှားများကို ဖယ်ရှားပေးနိုင်ပြီး ခရမ်းချဉ်ပင်တွေရဲ့ ဝေးရာကိုနှင်ပေးနိုင်ပါတယ်။ အပြန်အလှန်အားဖြင့် ခရမ်းချဉ်ပင်ရဲ့ ဖြန့်ကျက်အုပ်မိုးနိုင်တဲ့ သဘာဝဟာ ပင်စိမ်းရဲ့နူးညံ့သော အရွက်တွေအတွက် နေလောင်မှုကနေ ကာကွယ်ပေးနိုင်ပြီး အရိပ်ထောက်ပံ့ပေးနိုင်တာ ဖြစ်ပါတယ်။ 

၂။ ထပ်တရာပန်း 

ခရမ်းချဉ်စိုက်ခင်းထဲမှာ ထပ်တရာပန်းတွေ စိုက်ပျိုးထားခြင်းဖြင့် တောက်ပသောအရောင်ကြောင့် မျက်စိပသာဒဖြစ်စေရုံသာမက အခြားအကျိုးကျေးဇူးများစွာကိုလည်း ပေးစွမ်းနိုင်ပါတယ်။ လှပတဲ့ ထပ်တရာပန်းတွေဟာ ခရမ်းချဉ်ပန်းပွင့်တွေ ၀တ်မှုန်ကူးဖို့နဲ့ အဖျက်ပိုးမွှားများကို ထိန်းချုပ်ရာမှာ အရေးပါသော ပျစားယင်နဲ့ လိပ်ခုံးကျိုင်းကဲ့သို့သော အကျိုးပြု အင်းဆက်တွေကို ဆွဲဆောင်နိုင်တာ ဖြစ်ပါတယ်။ ထပ်တရာပန်းရဲ့ ပြင်းတဲ့ရနံ့ဟာ ခရမ်းချဉ်စိုက်ခင်းထဲမှာ ကျက်စားလေ့ရှိသော လှေးပိုးတွေကိုလည်း ထိရောက်စွာ တွန်းလှန်ပေးနိုင်တာ ဖြစ်ပါတယ်။ 

ထို့အပြင် ထပ်တရာပန်းမှာ မှိုဆန့်ကျင်နိုင်တဲ့ ဂုဏ်သတ္တိပါ၀င်နေပြီး ဖားဥမှိုကဲ့သို့  မှိုရောဂါကိုလည်း ကာကွယ်ပေးနိုင်တာ ဖြစ်ပါတယ်။ အကောင်းမွန်ဆုံးရလဒ် ရရှိစေဖို့အတွက် နေ့စဥ် ၆ နာရီမှ ၈ နာရီအထိ နေရောင်ခြည် လုံလောက်စွာရရှိပြီး ရေစိမ့်ဝင်မှုကောင်းသော မြေမှာ ခရမ်းချဉ်သီးပင်များနဲ့အတူ ထပ်တရာပန်းများကို စိုက်ပျိုးနိုင်ပါတယ်။ 

၃။ မုန်လာဥနီ

ခရမ်းချဉ်ပင်ရဲ့ အနီးတစ်ဝိုက်မှာ မုန်လာဥနီ စိုက်ပျိုးထားခြင်းဖြင့် ခရမ်းချဥ်သီးအထွက်ကို တိုးစေနိုင်ပါတယ်။ မုန်လာဥနီမှာ ကြီးမားတဲ့ရေသောက်မြစ် ပါရှိတာကြောင့် မြေကြီးကနေ ဆွဲနုတ်ယူလိုက်တဲ့အခါ ရှည်လျားတဲ့ လှိုဏ်ခေါင်းပုံစံများ ချန်ထားခဲ့ခြင်းဖြင့် မြေဆီလွှာကို လေဝင်လေထွက်ကောင်းစေပါတယ်။ အဆိုပါ လှိုဏ်ခေါင်းတွေဟာ လေနဲ့ ရေကို စိမ့်ဝင်ပျံ့နှံ့စေနိုင်ပြီး မြေဆီလွှာရဲ့ကျန်းမာရေးကို မြှင့်တင်ပေးသော မတူကွဲပြားတဲ့ အဏုဇီဝ သက်ရှိများအတွက်လည်း အာဟာရဓာတ်တွေကို ပံ့ပိုးပေးနိုင်တာ ဖြစ်ပါတယ်။

ထို့အပြင် မုန်လာဥနီနဲ့ ခရမ်းချဉ်ပင်တွေကြား အပြန်အလှန်အကျိုးသက်ရောက်မှုဟာ ခရမ်းချဥ်သီးရဲ့အရသာကိုလည်း တိုးမြင့်စေနိုင်တာ ဖြစ်ပါတယ်။ အမြစ်စား (ဥစား) သီးနှံဖြစ်တဲ့ မုန်လာဥနီဟာ အာဟာရစုပ်ယူမှုကို ပိုမိုကောင်းမွန်စေပြီး အပင်သန်မာကြီးထွားမှုကို အားပေးကာ အရသာရှိတဲ့ ခရမ်းချဉ်သီးတွေ ပိုမိုထုတ်လုပ်နိုင်ဖို့ ကူညီပေးနိုင်တာ ဖြစ်ပါတယ်။ 

၄။ ကြက်သွန်ဖြူ 

ကြက်သွန်ဖြူဟာလည်း ပျ ပိုး၊ မွှားပင့်ကူနဲ့ ယင်ဖြူ ကဲ့သို့သော အဖျက်ပိုးမွှားများကို သဘာဝအတိုင်း ကာကွယ်ပေးနိုင်တာ ဖြစ်ပါတယ်။ ထို့အပြင် ကြက်သွန်ဖြူဟာ ခရမ်းချဉ်သီးရဲ့ အရသာကို မြှင့်တင်ပေးနိုင်တဲ့ အကျိုးကျေးဇူးတွေလည်း ရှိနေသေးတာ ဖြစ်ပါတယ်။ တစ်နေ့ကို ၈ နာရီကနေ ၁၀ နာရီအထိ အလင်းရောင် ကောင်းစွာရရှိပြီး ရေဆင်းအားကောင်းတဲ့ မြေဆီလွှာမှာ ကြက်သွန်ဖြူနဲ့ ခရမ်းချဉ်ကို တွဲဖက်စိုက်ပျိုးမယ်ဆိုရင် အဖျက်ပိုးမွှားတွေ ကင်းဝေးစေမှာ ဖြစ်ပါတယ်။ 

၅။ တောရှုံးပင်

မွှေးရနံ့ရှိတဲ့ တောရှုံးပင်ဟာလည်း မွှားပင့်ကူနဲ့ ပျပိုးကဲ့သို့ အင်းဆက်ပိုးမွှားများကို ထိရောက်စွာ ဟန့်တားပေးနိုင်တာ ဖြစ်ပါတယ်။ တောရှုံးပင်ဟာ ခရမ်းချဉ်ပင်ကို မလိုလားအပ်သော အဖျက်ပိုးတွေရန်ကနေ ကာကွယ်ပေးရုံသာမက ၎င်းတို့ရဲ့ အရသာနဲ့ ကြီးထွားဖွံ့ဖြိုးမှုကိုလည်း မြှင့်တင်ပေးနိုင်တာ ဖြစ်ပါတယ်။ ထိရောက်တဲ့ အကျိုးကျေးဇူး ရရှိနိုင်ဖို့ နေရောင်ခြည်အပြည့်အဝရပြီး ရေစိမ့်ဝင်မှုကောင်းသော မြေဆီလွှာမှာ စိုက်ပျိုးထားသင့်ပါတယ်။ ထို့အပြင် မွှေးကြိုင်ပြီး ဝတ်ရည်နဲ့ပြည့်နေတဲ့ တောရှုံးပန်းပွင့်တွေဟာ ပျားနဲ့ ပျစားယင်တို့ကို ဆွဲဆောင်နိုင်တာ ဖြစ်ပါတယ်။ ဝတ်မှုန်ကူး အင်းဆက်တွေ လာရောက်နိုင်တာကြောင့် အနီးနားမှာရှိတဲ့ ခရမ်းချဉ်ပင်တွေဆီကိုလည်း လည်ပတ်မှုတိုးစေပြီး ၀တ်မှုန်ကူးရန် လွယ်ကူစေကာ အထွက်နှုန်း မြင့်မားစေခြင်းဖြင့် အပင်နှစ်မျိုးစလုံးကို တစ်ပြိုင်နက် အကျိုးပြုစေတာ ဖြစ်ပါတယ်။ 

၆။ ကညွတ် 

ကညွတ်နဲ့ ခရမ်းချဉ်ပင်တို့ဟာ အလွန်ကောင်းမွန်တဲ့ အဖော်ပင်တွေ ဖြစ်ကြပါတယ်။ ခရမ်းချဉ်ပင်ကနေ ဆိုလနင် (solanine) ဓာတ်ကို ထုတ်လွှတ်ပေးပြီး ၎င်းဓာတ်ဟာ ကညွတ်မှာ ကျရောက်တတ်တဲ့ ပိုးတောင်မာတွေကို သဘာဝအတိုင်း တွန်းလှန်ပေးတယ်လို့ လူသိများပါတယ်။ အပြန်အလှန်အားဖြင့် ကညွှတ်ဟာလည်း ခရမ်းချဉ်ပင်ရဲ့ အမြစ်တွေကို ထိခိုက်ပျက်စီးစေနိုင်တဲ့ အန္တရာယ်ရှိသော နီမတုတ်တွေကို တိုက်ဖျက်ရာမှာ ကူညီပေးနိုင်တာ ဖြစ်ပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်