ကွမ်းတွေမှာဆီစွန်း ရိုးမဲတွေဖြစ်နေပါတယ်သက်သာပျောက်ကင်းနိုင်မည့် နည်းလမ်းတွေရှိရင် ပြောပြပေးစေလိုပါတယ်။

ကွမ်းရိုးမဲမှာ ဖြစ်စဉ် ၂မျိုးရှိတတ်ပါတယ်။ တခုက Phythopthra ခေါ်တဲ့ မှိုမျိုးစိတ်ကြောင့်ဖြစ်ပြီး နောက်တခုက Xnthomophs ခေါ်တဲ့ bacteria ကြောင့်ဖြစ်တတ်ပါတယ်။ မေးခွန်းမေးတဲ့သူကတော့ ကွမ်းရိုးမဲကို ဘယ်လို ကုသရမလဲ မေးလိုက်ပေမယ့် ဖြေရမယ့် ကျွန်တော်က အသေးစိတ်ဖြေပေးရတဲ့အတွက် စာရှည်နေတာ နားလည်ပေးစေ့လိုပါတယ်။ကွမ်းရိုးမဲ ဖြစ်ရင် မနိုင်ဘူး ဆိုတဲ့ စကားဟာ မှန်လည်းမှန်တယ် ဆိုပေမယ့် တခါတရံမမှန်ပါဘူး။ တခါတရံမှာ တခြံလုံးပျက်စီးတတ်သလို တခါတရံမှာ ပြန်လည်ကောင်းမွန်တတ်လို့ပါ။ ဖြေရမှာက ၂ပိုင်းပေါ့။ အရင်ဆုံး Phythopthra ခေါ်တဲ့ မှိုမျိုးစိတ်ကြောင်းဖြစ်တာကို အရင် ပြောချင်ပါတယ်။ သူကြောင့် ဖြစ်လေ့ရှိတာ မျိုးပင်တည်းက ပါလာတတ်တတ်တာကြောင့် နဲ့ မြေဆောင်မှိုအဖြစ် တည်ရှိတတ်တာကြောင့်ဖြစ်တတ်ပါတယ်။ သူဖြစ်ခဲ့လျှင် မြေကြီးမှအပင် ထိပ်ဖျားထိ တဖြည်းဖြည်းပျက်စီးစေကာ အမြစ်ပိုင်း ပင်စည်အခြေတွေမှာ ပုပ်နေတာတွေ့ရတတ်ပါတယ်။ အမြစ်မှ အစပြုကာ အပင်ထိပ်ဖျားအထိ ရောက်တတ်ပါတယ်။ ရေစိုနာ အကွက်များဖြစ်ပေါ်ပြီး အပင်ခြေမှစတင် ညိုးသွားတတ်ပါတယ်။ တပတ်အတွင်း ကွမ်းခြံတခု၏ ၈၀-၉၀% အထိ ပျက်စီးစေနိုင်ပါတယ်။ အပင်အကြွင်းအကျန်များ မြေကြီးတွင်း နှစ်ရာသီကျော်အထိ ရှင်သန်ခိုအောင်းနိုင်ပါတယ်။ မိုးဦးရာသီ အပူချိန်မြင့်မားချိန်နှင့် မိုးစရွာချိန် မြေတွင်းအပူချိန်မြင့်ချိန် အဖြစ်များလေ့ရှိတယ်။ ကာကွယ် ကုသမှုအနေဖြင့် ဆစ်ပြုတ်ဖြစ်ပွားမှု မရှိသောခြံမှ မျိုးပိုင်းများကို သာစိုက်သင့်ပါတယ် ။နွားချေးကြက်ချေးကို အဆွေးခံပြီး သေချာဆွေးမြေ့မှာသာ အသုံးပြုသင့်ပြီး ဘူကာရှီ မြေဆွေး ထရိုင်ကိုဒါးမားမှို မြေတွင်း ထည့်သွင်းမွေးမြူပြီး ကာကွယ်နိုင်သလို စိုက်ခင်းသန့်ရှင်းရေးအဖြစ် အပင်အကြွင်းအကျန်များ ပေါင်းမြက်များ ခြံတွင်း ခြံပြင်မရှိရန် လိုအပ်ပါတယ်။ ရောဂါဖြစ်စ အပင်များကို အမြစ်မှ နှုတ်ယူဖျက်စီး ခြံပြင် လွှင့်ပစ်ရန် လိုအပ်ပါတယ် ။ဖြစ်နိုင်ပါက မီးရှို့ဖျက်စီးပေးပါ။ ကွမ်းခြံများအတွက် မဖြစ်မနေ ဘော်ဒို ဖျန်းခြင်း ဖော့စ်ဖောရစ် အက်ဆစ်ဖျန်းခြင်းသည် မှိုကြောင့်ဖြစ်တတ်သော ရိုးမဲ ရောဂါကို ကာကွယ်နိုင်ပါတယ်။ ဖော့စ်ဖောရစ်အက်ဆစ်ဟာ Phythopthora မှိုရောဂါကို ထိန်းသိမ်းနိုင်ပါတယ်။မြေသြဇာအလွန်အကျွံသုံးစွဲမှုကြောင့် ရောဂါတိုးစေပါတယ်။Propiconazole ,Strobilurin,Fosetyl-Al ဆေးများဖြင့် ကုသနိုင်ပါတယ်။ Bacteria ကြောင့် လည်း ရိုးမဲ ဆစ်ပြုတ်ဖြစ်တတ်ပါတယ်။ အပင်ထိပ်ဖျား အရွက်မှ စတင်ကာ အပင်အမြစ်ထိ တိုက်ခိုက်လေ့ရှိပြီး ခြံတွင်း အစိုဓာတ်များချိန်မှာ အဆိုးရွားဆုံး တိုက်ခိုက်ပါတယ်။ခြံတွင်း အမိုးအကာများဖွင့်ပြီး အသိုဓာတ်လျော့ကျအောင်လုပ်ပြီးကာကွယ်နိုင်သလို ခြံအပြင်ပတ်ပတ်လည် ရေထုတ်မြောင်းများထားပြီး အစိုဓာတ်လျော့ချကာကွယ်နိုင်ပါတယ်။ သွင်းရေကို စနစ်ကျရန်လိုအပ်ပါတယ်။ သွင်းရေကြောင့်လည်း တနေရာမှ တနေရာ ကူးဆက်စေပါတယ်။ ကော့ပါးဟိုက်ဒရောဆိုဒ် ဖျန်းခြင်း ဖြင့် ကာကွယ်နိုင်ပါတယ်။