အထွက်နှုန်းနည်းလို့ ပဲကြီးဈေးနှုန်းမြင့်တက်လာ

စိုက်ပျိုးရေးလုပ်ကိုင်ရန် အခက်အခဲရှိခြင်းက ပြည်တွင်းအဓိကစားသုံးသည့် ပဲကြီးဈေးကို မြင့်တက်လာစေသည်ဟု ကုန်သည်အချို့က ပြောကြားသည်။

တောင်သူများ စိုက်ပျိုးထုတ်လုပ်ပြီး ပြည်ပဈေးကွက်သို့ တင်ပို့နေသည့် မတ်ပဲနှင့် ပဲစင်းငုံတို့မှာ ယခုနှစ်တွင် ဈေးအနည်းငယ် မာလာချိန်၌ ပြည်တွင်း အဓိကစားသုံးသည့် ပဲကြီးမှာ နယ်ဈေးကွက်တွင် ဈေးနှုန်းနှစ်ဆခန့် မြင့်တက်လာသည်ဟု ကုန်သည်အချို့က ဆိုသည်။

မြန်မာနိုင်ငံအလယ်ပိုင်းတွင် ပဲကြီးစိုက်ပျိုးနိုင်မှု လျော့နည်းခြင်းနှင့် စိုက်ပျိုးထားသည့် ပဲများ အထွက်နှုန်း အားနည်းခြင်းတို့က ဈေးကွက်အတွင်း ပဲကြီးဈေး မြင့်တက်ရန် တွန်းအားတစ်ခု ဖြစ်လာခဲ့သည်။

"စိုက်ပျိုးထုတ်လုပ်နိုင်တဲ့ အင်အားနည်းတော့ ပစ္စည်းရှားပါးပြီး ဈေးမာလာတဲ့ သဘောပါပဲ" ဟု မကွေးတိုင်းမှ ပဲကုန်သည်တစ်ဦးက ပြောသည်။

လက်ရှိတွင် ရှမ်းပြည်နယ်တောင်ပိုင်းမှ စိုက်ပျိုးထားသည့် ပဲကြီးအသစ်များ ဈေးကွက်အတွင်း ဝင်ရောက်နေသော်လည်း ပမာဏ နည်းပါးနေသည့်အတွက် ဈေးနှုန်းအပေါ် သိသာစွာ ပြောင်းလဲနိုင်ခြင်း မရှိသေးကြောင်း ၎င်းက ရှင်းပြသည်။

ပဲကြီးအသစ်ပေါ်ချိန်တွင် နယ်ဈေးကွက်၌ တစ်တင်းလျှင် ကျပ် ၈၀,၀၀၀ ဝန်းကျင်ဖြင့် ဈေးဖွင့်ခဲ့သော်လည်း လက်ရှိအချိန်တွင် တစ်တင်းလျှင် ကျပ် ၁၆၀,၀၀၀ အထိ ဈေးနှုန်း မြင့်တက်လာခြင်းဖြစ်သည်။

မြန်မာနိုင်ငံတွင် ပဲကြီးကို ပြည်တွင်း၌ အဓိက စားသုံးကြသလို အိန္ဒိယကဲ့သို့ ပြည်ပနိုင်ငံများသို့လည်း တင်ပို့လျက်ရှိသည်။ လက်ရှိ ပြည်တွင်းဈေးကွက်တွင် ပဲကြီးမှာ အမြင့်ဈေး၌ အနည်းငယ် ငြိမ်နေကြောင်း သိရသည်။ 

ရန်ကုန်ဈေးကွက်တွင် ပဲကြီး FOB ဈေးနှုန်းမှာ တစ်တန်လျှင် အမေရိကန်ဒေါ်လာ ၁,၂၀၅ မှ ၁,၂၁၅ အတွင်း ဈေးဖွင့်ထားသည်။ ရန်ကုန် ပြည်တွင်းဈေးကွက်၌ ပဲကြီး တစ်ပိဿာလျှင် ကျပ် ၁၀,၄၄၀ မှ ၁၀,၈၃၅ ဝန်းကျင် ဈေးပေါက်နေသည်။

မြန်မာနိုင်ငံအလယ်ပိုင်း မန္တလေးဈေးကွက်တွင် ပဲကြီး အမျိုးအစားတစ်မျိုးသာ ဈေးဖွင့်ထားပြီး ပဲကြီး (သေး) တစ်တန်လျှင် ကျပ် ၄,၈၄၀,၀၀၀ ကျော်ဖြင့် ဈေးဖွင့်ထားကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။