ဈေးကွက်ခိုင်မာမှုရှိသည့် ကြော်အာလူးကို အဓိကစိုက်ပျိုးလာကြ

    စားအာလူး (ဟင်းချက်စားသည့် အာလူး) ဈေးကွက်နှင့် နှိုင်းယှဥ်ပါက ဈေးကွက်ပိုင်း ပိုမိုခိုင်မာမှုရှိနေသည့် ကြော်အာလူး (အာလူးကြော် အာလူး) ကို တောင်သူများ အဓိကစိုက်ပျိုးလာကြကြောင်း မကွေးတိုင်းဒေသကြီးရှိ အာလူးစိုက်ပျိုးသူများထံမှ သိရသည်။

အာလူးကို ဧက ၃၀ စိုက်ပျိုးထားပါတယ်။ အရင်ကတော့ စားအာလူးရော ကြော်အာလူးရော နှစ်မျိုး မျှစိုက်ဖြစ်ပေမယ့်၊ အခုနောက်ပိုင်းတော့ ကြော်အာလူးပဲ စိုက်ဖြစ်တော့တယ်ခင်ဗျ။ ကြော်အာလူးကကျတော့ ဈေးလည်းပိုရတယ်။ အအေးခန်းမျိုးတွေကိုပဲ စိုက်ရတာဖြစ်တဲ့အတွက် အထွက်နှုန်းလည်းသေချာတယ်။ အပင်ပေါက်နှုန်းကလည်း သေချာတယ်။ စားအာလူးမှာကျတော့ အအေးခန်းမျိုးလည်း မရှိဘူးလေ။ ကြုံရာ တရုတ်အာလူးမျိုးတို့၊ ဒေသမျိုးတို့ကို စိုက်ရတာဖြစ်တဲ့အတွက် အထွက်နှုန်းရော၊ အပင်ပေါက်ရော စိတ်မချရဘူး။ ရတဲ့ဈေးနှုန်းမှာကျတော့လည်း ကွာခြားမှုရှိပါတယ်။

ဟု မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ဆင်ဖြူကျွန်းမြို့မှ အာလူးစီးပွားဖြစ်စိုက်ပျိုးသူ ကိုကျော်ဇင်ထွန်းက ပြောသည်။

    ယခင်နှစ်က ကြော်အာလူး (အာလူးကြော် အာလူး) တစ်ပိဿာလျှင် ၉၀၀ ကျပ်၊ ၁၀၀၀ ကျပ်ဝန်းကျင် ဈေးနှုန်းများရရှိနေချိန်တွင် စားအာလူး(ဟင်းချက်စားသည့် အာလူး) မှာမူ တစ်ပိဿာလျှင် ၆၀၀ ကျပ်ဝန်းကျင်သာ ဈေးနှုန်းရရှိခဲ့ကြောင်း တောင်သူများထံမှ သိရသည်။ 

စားအာလူးက မျိုးကောင်းမျိုးသန့်ရဖို့အတွက်လည်း ကျွန်တော်တို့ဒေသအတွက်ဆိုရင် တော်တော်လေး ခက်ခဲပါတယ်။ ကြော်အာလူးကျတော့ မျိုးဝယ်ယူဖို့လည်း အဆင်ပြေတယ်။ ဈေးကွက်ကျတော့လည်း ကြော်အာလူးအနေနဲ့က နယ်စုံတင်ပို့ရပါတယ်။ ဒါ့ကြောင့်လည်း ကြော်အာလူးကိုပဲ စီးပွားဖြစ်စိုက်ပျိုးတာပါ။

ဟု ကိုကျော်ဇင်ထွန်းက ဆက်လက်ပြောသည်။

     စိုက်ပျိုးထွက်ရှိလာသည့် ကြော်အာလူးများကို ကျောက်ပန်းတောင်း(အာလူးကြော်ဖိုများ)သို့လည်းကောင်း၊ ရန်ကုန်တိုင်းဒေသကြီးနှင့် မန္တလေးတိုင်းဒေသကြီး ဈေးကွက်တွင်းသို့လည်းကောင်း တင်ပို့ရောင်းချနေကြောင်းသိရသည်။