သဘာဝမှိုများထွက်သည့် ရာသီချိန်ဖြစ်သော်လည်း စိုက်ပျိုးရေးမှိုဈေးကွက် ကျဆင်းမှုမရှိ

မိုးရာသီတွင် အလေ့ကျပေါက်ရောက်သည့် သဘာဝမှိုများထွက်ရှိနေသော်လည်း စိုက်ပျိုးရေးမှို (ကောက်ရိုးမှို၊ ငွေနှင်းမှို၊ ကြွက်နားရွက်မှို စသည့်) ဈေးကွက်များမှာ ကျဆင်းမှုမရှိကြောင်း သိရသည်။

ဖြတ်သန်းခဲ့ဖူးသမျှ နှစ်တွေထက် ဒီနှစ်မှာတော့ ဈေးကွက်အကောင်းဆုံးလို့ ပြောလို့ရပါတယ်။ ရာသီပေါ်မှိုတွေ ဘယ်လိုထွက်ထွက် ရန်ကုန် မှိုဈေးကွက်က အကြီးကြီးမို့လို့ လုံးဝ ထိခိုက်မှု မရှိနိုင်ပါဘူး။

ဟု ရန်ကုန်တိုင်း၊ မှော်ဘီမြို့နယ်မှ မှိုမျိုးစုံ စီးပွားဖြစ်စိုက်ပျိုးထုတ်လုပ်နေသူ ကိုဇော်မျိုးအောင်က ပြောသည်။

Covid-19 ကာလအတွင်း ရောဂါသက်ရောက်မှုအပေါ် စိုးရိမ်စိတ်ဖြင့် တောင်သူတချို့ မှိုစိုက်ပျိုးထုတ်လုပ်မှုကို လျှော့ချစိုက်ပျိုးကြသည့်အပြင် ပြီးခဲ့သည့်နွေရာသီက အပူချိန်မြင့်မားသည့်အတွက် အရှုံးပေါ်ကာ စိုက်ပျိုးမှု ရပ်နားသွားသူများလည်း ရှိခဲ့သည်။

အဲ့ဒါကြောင့် ကောက်ရိုးမှိုစိုက်သားက တိုးမလာဘူးလေ။ အခုအချိန်မှာ လယ်တွေ ရေမြှုပ်တော့ ကောက်ရိုးမှိုကို စင်စနစ်၊ ရုံစနစ်တွေနဲ့ စိုက်သူတွေလောက်ပဲ ကျန်တယ်။ စားသုံးသူကတော့ Covid-19 ဖြစ်ပွားချိန်ဆိုရင်လည်း စားနေကြဦးမှာပဲ။ မှိုဆိုတာက ပုံမှန် စားသောက်ကုန် ဖြစ်တဲ့အတွက် Covid-19 ဖြစ်လို့ဆိုပြီး မစားပဲနေမှာ မဟုတ်ဘူးလေ။ ဒါ့ကြောင့် လုံးဝ ဈေးကွက်ပျက်တာမျိုး မရှိဘူး။ ဒီ Covid-19 ကာလမှာလည်း နားကိုမနားရဘူး။ ရောင်းနေရတာပါဘဲ။

ဟု ကိုဇော်မျိုးအောင်က ဆက်လက်ပြောသည်။

လက်ရှိမှိုဈေးကွက်တွင် လက်ကားဈေး (ဒိုင်ဈေး) အနေဖြင့် ငွေနှင်းမှို တစ်ပိဿာလျှင် ၂၅၀၀ ကျပ်၊ ကောက်ရိုးမှို တစ်ပိဿာလျှင် ၆၅၀၀/၇၀၀၀ ကျပ် ပေါက်ဈေး ရှိနေကြောင်း သိရသည်။

နန်းထက်ထက်ချစ်(ABM)

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)