သင်္ဘောသီးဈေးကွက် ယခင်နှစ်ကထက် ထက်ဝက်ကျဆင်း

    ၂၀၂၀ ခုနှစ်၊ သင်္ဘောသီးရာသီချိန်အတွင်း သင်္ဘောသီးဈေးကွက် ယခင်နှစ်ကထက် ထက်ဝက်ကျဆင်းမှုရှိကြောင်း ကိုယ်တိုင်စိုက်ပျိုးထုတ်လုပ်နေသူများက ပြောသည်။

အရောင်းအဝယ်တော့ ဖြစ်နေသေးတယ်။ ဈေးကတော့ အရင်နှစ်စျေးတွေထက် ထက်ဝက်ကျတယ်။ အမှည့်သီးကျတော့ အချိုပွဲမှာပဲ အသုံးများတယ်လေ။ ဟော်တယ်တွေမဖွင့်ဘူးဆိုတော့ ဈေးကွက်ကျဆင်းတာပေါ့။ သင်္ဘောအစိမ်းသီးဈေးကွက်ကတော့ စာသင်ကျောင်းတွေမဖွင့်တော့ ပိုဆိုးတာ။

ဟု စစ်ကိုင်းတိုင်း၊ ရေဦးမှ သင်္ဘောပင် စီးပွားဖြစ်စိုက်ပျိုးသူ ကိုထက်နိုင်ထွန်း က ပြောသည်။

    သင်္ဘောသီးအရှည် (ရှည်မျောမျောပုံစံ) တစ်လုံးလျှင် (၄၀၀) ကျပ်၊ အဝိုင်းသီး (လုံးဝိုင်းသည့်ပုံစံ သင်္ဘောသီး) 1.5kg အထက် တစ်လုံးလျှင် ၄၀၀ ကျပ်၊ သင်္ဘောသီး ပီနံအိတ်တစ်ပိုင်းလျှင် ၇,၀၀၀ ကျပ် ပေါက်ဈေးရှိနေသည်။

အရင်နှစ်က တစ်လုံးကို ၈၀၀ ကျပ်၊ ၁၀၀၀ ကျပ်လောက် ဈေးရှိခဲ့တာ။ အခုလို ဈေးကွက်မကောင်းတော့ လာမယ့်သင်္ဘောရာသီမှာ စိုက်ဧကတွေ ထက်ဝက်လျော့ကျမယ်ထင်တယ်။ လာမယ့်ရာသီမှာ တကောင်းဘက်၊ နွားထိုးကြီးဘက်တွေပဲ စိုက်ခင်းရှိတော့မှာ။ ကျန်ဒေသတွေတော့ အနည်းငယ်ပဲ စိုက်ကြမယ်ထင်တယ်။ အခု ဈေးကျတာက ကိုဗစ်ကြောင့်ပါ။

ဟု ကိုထက်နိုင်ထွန်း က ဆက်လက်ပြောသည်။

    Covid-19 မတိုင်ခင် ကာလများက ဧပြီလမှ အောက်တိုဘာလများတွင် သင်္ဘောသီးဈေးကွက် ကောင်းမွန်လေ့ရှိပြီး စစ်ကိုင်းတိုင်း၊ မန္တလေးတိုင်း စသည့် ဒေသတို့မှ ထွက်ရှိသည့် သင်္ဘောသီးများကို ရှမ်းပြည်နယ် တောင်ကြီး၊ လားရှိုး၊ နေပြည်တော်နှင့် ရန်ကုန်မြို့များသို့ တင်ပို့ရောင်းချကြသည်။

ဆောင်းပါးများ/ သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။