လွယ်လွယ်ကူကူ ရိုးရိုးရှင်းရှင်း၊ သပြေပင်စိုက်ကြမယ်..…

ဘုရားပန်းတင်တဲ့အခါ အောင်သပြေပန်းက မပါမဖြစ်ပါ။ အခုဆိုရင် ပန်းစျေးကွက်မှာ မြန်မာသပြေ လို့ခေါ်တဲ့ အောင်သပြေညွန့်အပြင်၊ အဲ့ဒီအောင်သပြေကိုမှ ငုတ်လေးတွေ တူးရောင်းတဲ့ သပြေငုတ်၊ အညွှန့်လေးတွေ ရဲရဲတောက်နေအောင် လှတဲ့ အာဆီယံသပြေ စတဲ့ သပြေပန်းမျိုးစုံကလည်း သူ့စျေးကွက်နဲ့သူ နေရာယူလို့ နေပါတယ်။

ဒို့ အမရပူရနယ်မှာတော့ လယ်ကန်သင်းရိုးမှာ သရက်ပင်တစ်ပင်နဲ့တစ်ပင် ကြားထဲမှာ သပြေပင်စိုက်တယ်။ စပါးလည်းရတယ်။ သရက်သီးပေါ်ချိန်ဆို သရက်သီးလည်းရတယ်။ သပြေပန်းလည်း ခူးရောင်းလို့ရတယ်။ လယ်အဓိကစိုက်တဲ့ လယ်သမားတွေရဲ့စုဗူးကတော့ သရက်နဲ့သပြေပါ။

လို့ မန္တလေးတိုင်း၊ အမရပူရမြို့နယ်က သပြေမျိုးစုံ စိုက်ပျိုးရောင်းချနေသူ ကိုရဲနိုင်၀င်းက ပြောပါတယ်။

သပြေပင်ကို ဘယ်အချိန်မှာ စိုက်ပျိုးရလဲ

သပြေပင်ကို ရာသီမရွေး စိုက်ပျိုးနိုင်ပါတယ်။ ရေကြိုက်တဲ့ အပင်အမျိုးအစား ဖြစ်တာကိုတော့ သတိပြုရမှာမို့၊ သပြေပင်စိုက်တော့မယ်ဆိုရင် ရေရရှိတဲ့ အရပ်ဒေသ၊ ရေသွယ်ယူလို့ လွယ်ကူတဲ့ နေရာမျိုးတော့ ဖြစ်ရပါမယ်။ သပြေပင်က နှစ်ရှည်ပင် အမျိုးအစားတစ်ခုလည်း ဖြစ်ပါတယ်။

ရေဘယ်အချိန်တွေပေးရမလဲ

တစ်နှစ်ပတ်လည်လုံး စပါးစိုက်တဲ့တောင်သူတွေအတွက်တော့ စပါးနဲ့သပြေပင် တွဲဖက်စိုက်ပျိုးတယ်ဆိုရင် ရေအတွက် အထူးပူစရာမရှိပေမယ့်၊ ဧကပြတ်လိုက် သပြေစီးပွားဖြစ် စိုက်တဲ့သူတွေကတော့ မနက် တစ်ရေ၊ ညနေ တစ်ရေ နှုန်းနဲ့၊ တစ်နေ့ကို ရေ(၂)ကြိမ် ပေးသင့်ပါတယ်။ သပြေပင်က အမြစ်ရှည်တဲ့အမျိုးဖြစ်ပြီး၊ ရေကြိုက်တဲ့ အပင်ဖြစ်လို့ပါ။

သပြေစိုက်ဖို့၊ မြေရွေးချယ်မယ်ဆိုရင်…

မြေချဉ်ငံကိန်း ၅.၈ ကနေ ၈.၅ ကြားက သပြေစိုက်ပျိုးလို့ အကောင်းဆုံးအနေအထား ဖြစ်တယ်လို့ ပညာရှင်တွေက ပြောပါတယ်။ အာဆီယံသပြေ စီးပွားဖြစ်စိုက်ပျိုးနေတဲ့ ခြံတွေကို သွားရောက် လေ့လာကြည့်တော့၊ ပင်ရေစိပ်စိပ်နဲ့ စိုက်ကြတာကို တွေ့ရပါတယ်။ တန်းကြားကိုတော့ လူ၀င်ထွက်လို့ရအောင်၊ သပြေညွှန့်ခူးလို့လွယ်အောင် ထားကြတယ်။ ပင်ကြားကိုတော့ (၁၈)လက်မလောက် ထားကြတယ်။ အာဆီယံသပြေမျိုး တင်မက၊ သပြေငုတ်မျိုး စိုက်မယ်ဆိုရင်လည်း အပင်ရေကို ခပ်စိပ်စိပ်ပဲ ထားကြပါတယ်။ 

သပြေပျိုးပင်တွေကိုတော့ တစ်ပင်ကို (၂၀)ကျပ်ကနေ စျေးတအားမြင့်ချိန်ဆိုရင် ကျပ်(၈၀) စျေးတွေနဲ့ ၀ယ်ယူစိုက်ပျိုးလို့ရပါတယ်။ သပြေငုတ်ကို တောင်စောင်းတွေမှာ အစိုက်များပြီး၊ ဓာတ်မြေသြဇာကို အထူးအထွေ ကျွေးမွေးလေ့မရှိပဲ၊ တစ်နှစ်မှာ (၂)ကြိမ်နှုန်းနဲ့ ယူရီးယား လို့ခေါ်တဲ့ ပုလဲမြေသြဇာကို ကျွေးလေ့ရှိပါတယ်။ တချို့တောင်သူတွေကလည်း (၁၅)ပတ်လည် မြေသြဇာကျွေးကြပါတယ်။ သပြေပင်မှာ အဓိက သတိထားရမှာကတော့ မြေအောင်းပိုးဖြစ်ပါတယ်။

စိုက်ပျိုးပြီး ဘယ်လောက်ကြာရင် စျေးကွက်၀င်သလဲ

သပြေငုတ်တွေကိုတော့ စိုက်ပျိုးပြီး (၃)နှစ်ကနေ (၅)နှစ်အကြာမှာ ငုတ်တူးပြီးတော့ စျေးကွက်ပို့နိုင်ပါတယ်။ အာဆီယံသပြေကိုတော့ ပြုစုမှုကောင်းရင်ကောင်းသလို (၈)လကနေ တစ်နှစ်ခွဲကာလမှာ စျေးကွက် တင်ပို့နိုင်ပါပြီ။ နောက်ပိုင်းမှာတော့ (၁၅)ရက်တစ်ခါ ဖြတ်ရောင်းလို့ ရပါတယ်။

သပြေကို ဘယ်ဒေသတွေမှာ အဓိကစိုက်ပျိုးနေကြလဲ

မြန်မာနိုင်ငံမှာ သပြေပင်စိုက်ပျိုးရေးကို ရှမ်းပြည်နယ်တောင်ပိုင်းမှာရှိတဲ့ တောင်ကြီး၊ ရွာငံဒေသတဝိုက်၊ ပဲခူးရိုးမအနီးမှာရှိတဲ့ ရေနီ၊ ရေတာရှည်၊ တောင်ငူ၊ မန္တလေးတိုင်းမှာရှိတဲ့ မန္တလေး၊ အမရပူရ၊ ဒဟပ်တော၊ ရေတံခွန်တောင်၊ ရန်ကုန်တိုင်းဒေသကြီးမှာရှိတဲ့ တိုက်ကြီး၊ မှော်ဘီ၊ ညောင်နှစ်ပင် စတဲ့ဒေသတွေမှာ အများဆုံး စိုက်ပျိုးနေပါတယ်။

ပဲခူးဘက်က သပြေတွေကိုတော့ နေပြည်တော်စျေးကွက်ကို တင်ပို့တယ်။ အာဆီယံသပြေကတော့ မြို့ကြိုက် သပြေပါ။ သပြေငုတ်ကိုကျတော့ တာရှည်ခံတာကို ကြိုက်နှစ်သက်တဲ့သူတွေက အ၀ယ်များကြတယ်။ အာဆီယံသပြေကတော့ လှတယ်။ ရေရှည်တော့မခံဘူး။ သုံးရက်လောက်ဆို နွမ်းပါတယ်။

လို့ ကိုရဲနိုင်၀င်းက ဆက်လက်ပြောပါတယ်။

ရာသီမရွေး စိုက်ပျိုးနိုင်ပြီး၊ မြန်မာလူမျိုးတိုင်းလည်း ကြိုက်နှစ်သက်ကြတဲ့ သပြေပင်လေးတွေ စိုက်ပျိုးရင်း စီးပွားဖြစ်ထွန်းနိုင်ကြပါစေ။

နန်းထက်ထက်ချစ်

( ယခုဆောင်းပါးက ဦးကြီးတို့အတွက် အကျိုးတစ်စုံတရာဖြစ်ထွန်းမှု ရှိ /မရှိ ပေါ်မူတည်ပြီး အောက်မှာဖော်ပြပေးထားတဲ့ "အသုံးဝင်ပါတယ်"  "အသုံးမဝင်ပါ" ဆိုတဲ့ စာတန်းလေးကို ရွေးချယ်နှိပ်ပေးဖို့ တောင်းဆိုပါရစေရှင့် )