တစ်ပတ်အတွင်း သတင်းဆောင်းပါးများထဲက ရင်ကိုထိရှစေသည့်အကြောင်းများ

‘ချောင်းရိုး မြောင်းရိုးသာ တိမ်ကောရိုးထုံးစံရှိမယ် မျိုးရိုးကတော့ မတိမ်ကောဘူး’ ဆိုသည့် ဆိုရိုးတစ်ခုရှိသည်။ ဆိုတော့ မျိုးရိုးဆိုသည် ကောင်းနေဖို့လိုသည်။ မျိုးရိုးဗီဇဆိုးတွေလည်း ပါမသွားဖို့လိုသည်။ မျိုးရိုးမကောင်းဘူးဆိုပါက သားစဉ်မြေးဆက် ခေါင်းမဖော်ဝံ့တော့သည့်အဖြစ်မျိုး ကြုံရနိုင်သည်။ ဂဠုန်ဦးစော၏ သမိုင်းအမှားတစ်ခုကြောင့် သူ့မျိုးဆက်တစ်ခုလုံး ယခုအချိန်ထိ နောက်ဆက်တွဲ အကျိုးဆက်များကို ခံစားနေရသေးကြောင်း အင်တာဗျူးတစ်ခုတွင် ဖတ်ရဖူးသည်။ သူတို့မှာ ဘာအပြစ်မှတော့မရှိ။ သို့သော် အရိပ်မည်း၏လွှမ်းမိုးခြင်းကိုတော့ ခံနေရသည်ပင်။

သီးပင်စားပင်ပဲဖြစ်စေ မျိုးကောင်းတွေကိုသာ ဆက်ထိန်းချင်ကြပြီး မျိုးမကောင်းသည်များကိုတော့ မလိုလား ကြတာ သဘာဝပဲဖြစ်ပါသည်။ မျိုးမကောင်းရင်တော့ အနည်းဆုံး မျိုးမကောင်း၊ မျိုးမစစ်ဟု အပြော အဆိုခံရနိုင်သည်။ ဆိုတော့ မျိုးရိုးကောင်းများကို ထိန်းသိမ်းဖို့လိုသလို မျိုးရိုးမကောင်းများကိုလည်း မပြန့်ပွားအောင်လုပ်ကြဖို့ လိုပါသည်။

ဒီတော့ မျိုးကောင်းတွေကို ဆက်ထိန်းနိုင်ဖို့အတွက် တထေရာတည်းရနိုင်မည့် ကလုံးဆိုသည့် ပုံတူမျိုးပွားခြင်း များကို တီထွင်လာကြသည်။ ယခု ဖေဖော်ဝါရီလဆန်းမှာပဲ တရုတ်သိပ္ပံပညာရှင်တွေဟာ သာမန်နို့စားနွားမ တွေထက် နို့ထွက်နှုန်း အများကြီး ပိုကောင်းတဲ့ နွားမတစ်ကောင်ကနေ ပုံတူမျိုးပွားထားတဲ့ နွားမ (cloned super cow) သုံးကောင်ကို အောင်အောင်မြင်မြင် ထုတ်လုပ်နိုင်ခဲ့ပြီဟု ဆိုသည်။

ပြီးခဲ့သည့် တနင်္လာနေ့က Green Way တွင်ဖော်ပြခဲ့သည့် ကမ္ဘာတလွှားစိတ်ဝင်စားဖွယ်မွေးမြူရေးသတင်းများ ထဲမှာ ဒီသတင်းအပါအဝင် သတင်းသုံးပုဒ်ကို ဒေါက်တာသက်ခိုင်က ရေးသားဖော်ပြခဲ့ခြင်းဖြစ်ပါသည်။ တစ်နှစ် ကို နွားနို့ ၁၈ တန်ထိထုတ်နိုင်သည့် ဖရီရှန်နို့စားနွားမမျိုးကနေ သူနဲ့တထေရာတည်းတူသည့် နွားကလေး သုံးကောင်ကို ပုံတူမျိုးပွားယူခဲ့ခြင်းဖြစ်သည်။ (မျိုးမကောင်းသည့်နွားများကိုတော့ သူတို့လည်း ပုံတူပွားလိမ့်မည် မထင်ပါ)

ဒီလို ပုံတူမျိုးပွားနိုင်ခြင်းက အနာဂတ်မွေးမြူရေးကဏ္ဍအတွက် ဘယ်လိုအကျိုးသက်ရောက်မှုတွေရှိမလဲ၊ တရုတ်နိုင်ငံရဲ့စီးပွားရေးအတွက် ဘယ်လိုအကျိုးပြုမှုတွေရှိလာနိုင်လဲ၊ ဘယ်လောက်အထိ ထပ်ပွားဖို့လုပ်နေလဲ ဆိုတာတွေကိုသိချင်ရင်တော့ အောက်ပါလင့်မှာ ဝင်ရောက်ဖတ်ရှုနိုင်ပါသည်။

https://bit.ly/3jOLaPX

“ပြည်တွင်းမှာလူမရှိဘဲနဲ့ ဒီနိုင်ငံက ဘယ်လိုတိုးတက်လာမလဲ” တဲ့။ Borderless Myanmar ရဲ့ စီအီးအို ဂျပန် လူငယ်လေးတိုမိုက အင်တာဗျူးတွင် ပြောလိုက်သည့်စကား။ သူကတော့ မြန်မာနိုင်ငံမှာ Borderless Japan နောက်ခံအကူအညီများကို ရယူခြင်းဖြင့် တောင်သူအကျိုးပြုစီးပွားရေးတွေကို အကောင်အထည်ဖော်နေခြင်း ဖြစ်သည်။

ဆိုတော့ ပြည်တွင်းမှာလူငယ်တွေမနေချင်ကြတော့က ဘာကြောင့်ပါလဲ။ အားလုံးသိသည့်အဖြေဖြစ်သည်။ “ ဒါပေမဲ့ သူတို့အခက်အခဲကို နားလည်ပါတယ်” ဆိုပြီးလည်း ဂျပန်လူငယ်လေးက ဆက်ပြောပါသည်။ သူများ နိုင်ငံသွား သူတို့နိုင်ငံသားတွေမလုပ်ချင်သည့် 3D (Dangerous, Difficult, Dirty - အန္တရာယ်ရှိ, ခက်ခဲ, ညစ်ပတ်) ဆိုသော အလုပ်များကို ပျော်လို့ လုပ်နေကြသည်ဟုတော့ မိမိမထင်ပါ။ ဒီနိုင်ငံအတွင်းမှာ အစွမ်းကုန်ကြိုးစားမယ်ဆိုရင်တောင် လူလိုသူလို ဖြစ်ရန်မသေချာသည့် အခြေအနေတစ်ခုကြောင့်သာ နိုင်ငံစွန့်ခွာစွန့်စားကြခြင်းမျိုးက အများစုပါ။

ဆိုတော့ ‘ ဦးနှောက်ယိုစီးမှု (Brain drain) ကြောင့် နိုင်ငံမတိုးတက်။ သူတို့တွေမယိုစီးဖို့ လုံလောက်သည့် အခြေအနေတစ်ခုကိုကျ မဖန်တီးပေးနိုင်၊ မျက်ဖြူဆိုက်မှ ကြိုက်ကြသူဆရာအချို့ကလည်း လိုချင်သည့်အခြေအနေများကို ဖန်တီးယူ။ ဒီတော့ လူငယ်တွေက နိုင်ငံကထွက်သွားဖို့ပဲ ကြိုးစား၊ ဆိုတော့ ဂျပန်လူငယ်လေးပြောသလို ပြည်တွင်းမှာလူမရှိတော့၊ အဲ့ဒီလိုလူမရှိတော့ နိုင်ငံက မတိုးတက်’ ဆိုပြီး ဂျာအေးသူ့အမေရိုက် တိုင်ပတ်ကုန်သည်။ လောလောဆယ်တော့ ပတ်စ်ပို့လုပ်ပေးခြင်းများကို ကန့်သတ်လိုက်၍ နိုင်ငံခြားထွက်အလုပ်လုပ်ချင်သူတွေပင် မလွယ်ကူကြပါ။

ထားတော့။ ဂျပန်လူငယ်လေးအကြောင်း ပြန်ဆက်ပါမည်။ သူက နိုင်ငံခြားလည်းမထွက်နိုင်၊ အခက် အခဲလည်း ရှိနေသူများကို သူ့နည်းသူ့ဟန်ဖြင့် အလုပ်အကိုင် ဖန်တီးပေးလိုခြင်းဖြစ်သည်။ ဘယ်လိုတွေ ဖန်တီးပေးချင်တာလဲ အပြည့်အစုံကိုတော့ အောက်ပါလင့်တွင် ဝင်ရောက်ဖတ်ရှုနိုင်ပါသည်။

https://bit.ly/3YHfDyb

ပြီးခဲ့သည့်အပတ်အတွင်း ပိုပြီးလှုပ်လှုပ်ရှားရှား ဖြစ်လာသည်က ဆန်ဈေးများဆက်တက်နေခြင်းပင်။ ပြည်ပပို့ကုန်ပဲမျိုးစုံဈေးတွေ တက်ခြင်းက တောင်သူများအတွက်ကောင်းပြီး တခြားသူများအတွက် ထိခိုက်မှုနည်းနိုင်သော်လည်း ဆန်ဈေးတွေတက်ခြင်းကတော့ အခြေခံလက်လုပ်လက်စားသမားများအတွက် ပြဿနာ ဖြစ်သွားသည်။ လယ်သမားများအတွက် ထူးပြီးကောင်းလာသည်မျိုးလားဆိုတော့လည်း မဟုတ်ပြန်။ လောင်စာဆီ၊ အခြားသွင်းအားစု၊ အခြားကုန်ဈေးနှုန်းတွေကိုက တက်နေတော့ အရမ်းကြီးမထူးလှ။ ဝယ်လှောင်ထားနိုင်သည့် ကုန်သည်တွေအတွက်တော့ အကျိုးရှိကြသည်။

လယ်သမားကြီးတစ်ဦးကတော့ ‘ ကလေးနို့မှုန့်ဖိုးကစလို့ တခြားသွင်းအားစုတွေ၊ ကုန်ဈေးနှုန်းတွေသာ မတက်ပါစေနဲ့၊ သူတို့ ဆန်ဈေးတွေလည်း မတက်ချင်ပါဘူး’ လို့ ပြောကြားထားတာမျိုး ဖတ်လိုက်ရသည်။ ဆိုတော့ အရင်းစစ်တော့ အမြစ်မြေကပါပဲ။ အမြစ်ကိုလှန်ထုတ်နိုင်ပြီး အားလုံးအဆင်ပြေကြပါစေဟုသာ ဆုတောင်းလိုပါတော့သည်။

ဒီတစ်ပတ်တော့ ဒီမျှနှင့်ပဲ နိဂုံးချုပ်ပါရစေ။ ဒီနေ့ကျရောက်သော ပြည်ထောင်စုနေ့ကစလို့ ပြည်ထောင်စု တိုင်းရင်းသားပြည်သူအပေါင်းနဲ့ တောင်သူဦးကြီးများအပေါင်း ကိုယ်စိတ်နှစ်ဖြာ ကျန်းမာချမ်းသာပြီး လိုလားတောင့်တသော အစစ်အမှန်ပြည်ထောင်စုကြီးကို ပိုင်ဆိုင်နိုင်ခွင့်ရကြပါစေ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...