တစ်ပတ်တာအတွင်း ဈေးကွက်သုံးသပ်ချက်

(၆.၉.၂၀၂၁ ) မှ (၁၀.၉.၂၀၂၁) ထိ အပြောင်းအလဲဖြစ်ပေါ်ခဲ့သည့် လယ်ယာထွက်ကုန်သီးနှံများ

ဆန်

ဒီတစ်ပတ်မှာတော့ ရန်ကုန်ဈေးကွက်မှာ ဆန်ဈေးတွေက ဆက်တိုက်ကို တက်နေပါတယ်။ ပြည်တွင်းဝယ်ယူမှုများပြားတဲ့အတွက် ဈေးတက်နေတာဖြစ်ပါတယ်။

ရန်ကုန်ဝါးတန်းလမ်းဈေးကွက်မှာတော့ ဖျာပုံပေါ်ဆန်းမွှေးက တစ်အိတ်ကို ၄၄၀၀၀ ကနေ ၄၆၀၀၀ ပေါက်ဈေးရှိပြီး ၂၀၀၀ ကျပ်၊ ဒေးဒရဲပေါ်ဆန်းမွှေးကတော့ တစ်အိတ်ကို ၄၄၀၀၀ ကနေ ၄၆၀၀၀ ပေါက်ဈေးရှိပြီး ၅၀၀၀ ကျပ်၊ မြောင်းမြပုသိမ်ပေါ်ဆန်းမွှေးက တစ်အိတ်ကို ၄၅၀၀၀ ကနေ ၄၈၀၀၀ ပေါက်ဈေးရှိပြီး ၁၀၀၀ ကျပ်၊ ရွှေဘိုပေါ်ဆန်းသစ်ကတော့ တစ်အိတ်ကို ၄၈၀၀၀ ကနေ ၅၄၀၀၀ ပေါက်ဈေးရှိပြီး ၁၀၀၀ ကျပ် အသီးသီးဈေးတက်လာပါတယ်။

ပြီးခဲ့တဲ့အပတ်ကတော့ ဆန်ကြမ်းဈေးတွေက အနည်းငယ်တက်ခဲ့ပေမယ့် ဒီတစ်ပတ်မှာတော့ ပြည်ပပို့ကုန်အဓိကဖြစ်တဲ့ ဧည့်မထဆန်တွေကလည်း ဈေးတက်လာပါတယ်။

ဧည့်မထဆန်က တစ်အိတ်ကို ၂၃၅၀၀ ကနေ ၂၅၀၀၀ပေါက်ဈေးရှိပြီး ၁၀၀၀ ကျပ်၊ ဧည့်မထ ၂၅% က တစ်အိတ်ကို ၂၂၃၀၀ ကနေ ၂၂၈၀၀ ပေါက်ဈေးရှိပြီး ၈၀၀ ကျပ်၊ မြီးဒုံးဆန်ကတော့ တစ်အိတ်ကို ၃၇၀၀၀ ကနေ ၃၈၀၀၀ ပေါက်ဈေးရှိပြီး ၁၀၀၀ ကျပ်၊ ငစိန်ဆန်က တစ်အိတ်ကို ၂၃၀၀၀ ကနေ ၂၄၀၀၀ပေါက်ဈေးရှိပြီး ၁၅၀၀ ကျပ်၊ ဆန်သီးထပ်ကတော့ တစ်အိတ်ကို ၂၄၀၀၀ကနေ ၂၅၀၀၀ပေါက်ဈေးရှိပြီး ၅၀၀ ကျပ် အသီးသီးဈေးတက်လာပါတယ်။

မော်လမြိုင်ဈေးကွက်မှာတော့ ပေါ်ဆန်း(ဆန်သား ၈၀)က တစ်အိတ်ကို ၄၃၇၀၀ ပေါက်ဈေးရှိပြီး တစ်အိတ်ကို ၁၀၀၀ကျပ်၊ ပေါ်ဆန်း(ဆန်သား ၉၀)ကတော့ တစ်အိတ်ကို ၄၅၉၀၀ ပေါက်ဈေးရှိပြီး ၁၀၀၀ကျပ်၊ ပေါ်ကျွဲ (ဆန်သား ၈၀)က တစ်အိတ်ကို ၃၅၆၀၀ပေါက်ဈေးရှိပြီး ၁၀၀၀ ကျပ်၊ ပေါ်ကျွဲ(ဆန်သား ၉၀)ကတော့တစ်အိတ်ကို ၃၇၁၀၀ပေါက်ဈေးရှိပြီး ၁၀၀၀ ကျပ် အသီးသီးဈေးတက်လာပါတယ်။

မတ်ပဲ

မတ်ပဲကတော့ တစ်တန်ကို ၁၅ သိန်းနီးပါးရောက်ခါနီးအထိ ဈေးမြင့်တက်လာပါတယ်။ အိန္ဒိယရဲ့ ဝယ်ယူမှုမြင့်မားတဲ့အပြင် လက်ရှိ ပြည်တွင်းငွေလဲလှယ်နှုန်းဈေးမြင့်တက်မှုကလည်း ပဲဈေးကို အမြင့်ဆုံးရောက်ရှိနေတာဖြစ်ပါတယ်။

အိန္ဒိယနိုင်ငံမှာ စိုက်ခင်းတွေပျက်စီးပြီး ပဲအထွက်နည်းနိုင်မယ်လို့ခန့်မှန်းမှုတွေကြောင့် အိန္ဒိယနိုင်ငံမှာလည်း မတ်ပဲဈေးတွေက မြင့်တက်နေခဲ့တာဖြစ်ပါတယ်။

ရန်ကုန်ဈေးကွက်မှာ မတ်ပဲက တစ်တန်ကို ၁၄ သိန်း၈ သောင်း ၈ ထောင်အထိ ပေါက်ဈေးရှိနေပြီး တစ်ပတ်အတွင်း တစ်တန်ကို ငွေကျပ် ၈ သောင်းကျော်အထိ ဈေးမြင့်တက်လာခဲ့ပါတယ်။

မန္တလေးဈေးကွက်မှာလည်း မတ်ပဲက သုံးတင်းဝင် တစ်အိတ်ကို ၁၄၅၀၀၀ ကနေ ၁၄၈၀၀၀အထိ ပေါက်ဈေးရှိပြီး တစ်အိတ်ကို ၁၅၀၀၀ နီးပါးထိ ဈေးမြင့်တက်လာပါတယ်။

ပြည်ဈေးကွက်မှာတော့ တစ်တင်းကို ၅၀၀၀၀ပေါက်ဈေးရှိပြီး ၅၀၀၀ ကျပ်၊ အောင်လံဈေးကွက်မှာတော့ ၄၇၀၀၀ ရှိပြီး ၃၀၀၀ ကျပ်၊ မော်လမြိုင်မှာတော့ တစ်တင်းကို ၄၉၀၀၀ ကျပ်ရှိပြီး ၄၀၀၀ကျပ် အသီးသီးဈေးမြင့်တက်လာပါတယ်။

ပဲစင်းငုံနီ

ပဲစင်းငုံနီကလည်း ဒီတစ်ပတ်မှာ ဈေးတွေထပ်ပြီး တက်လာပါတယ်။ ပဲစင်းငုံနီကလည်း တစ်တန်ကို ၁၄ သိန်းနားထိ ရောက်ခါနီးနေပါပြီ။ အဓိက အိန္ဒိယနိုင်ငံရဲ့ဝယ်လိုအားရှိနေသလို ပြည်တွင်းမှာလည်း လက်ကျန်မရှိတော့တဲ့အတွက် ဈေးတွေကမြင့်တက်နေတာဖြစ်ပါတယ်။ ငွေလဲလှယ်နှုန်းဈေးကြောင့်လည်း ဈေးတွေက ဆက်တိုက်ကို မြင့်တက်နေခဲ့တာဖြစ်ပါတယ်။

အိန္ဒိယနိုင်ငံရဲ့လိုအပ်ချက်ကြောင့် ပဲစင်းငုံနီက ထပ်ပြီးဈေးတက်နိုင်ခြေရှိသေးတယ်လို့လည်း ကုန်သည်တွေက သုံးသပ်ထားပါတယ်။

ရန်ကုန်ဈေးကွက်မှာတော့ ပဲစင်းငုံနီက တစ်တန်ကို ၁၃ သိန်း ၈ သောင်းထိ ပေါက်ဈေးရှိပြီး တစ်ပတ်အတွင်း တစ်တန်ကို ငွေကျပ် ၇ သောင်းနီးပါးအထိ ဈေးမြင့်တက်လာခဲ့ပါတယ်။

မန္တလေးဈေးကွက်မှာတော့ ပဲစင်းငုံနီက တစ်အိတ်ကို ၁၃၅၀၀၀ ပေါက်ဈေးရှိပြီး တစ်အိတ်ကို ၁၀၀၀၀ ကျပ်ဈေးတက်လာပါတယ်။

ပြည်ဈေးကွက်မှာတော့ တစ်တင်းကို ၄၃၅၀၀ ကနေ ၄၃၈၀၀ ပေါက်ဈေးရှိပြီး တစ်တင်းကို ၂၀၀၀ နီးပါးဈေးတက်လာပါတယ်။

အောင်လံမှာတော့ တစ်တင်းကို ၄၃၀၀၀ပေါက်ဈေးရှိပြီး ၇၀၀ ကျပ်ဈေးတက်လာပါတယ်။

နှမ်းနက်(စမုံ)

နှမ်းနက်(စမုံ)ကတော့ ဒီတစ်ပတ်မှာ ဈေးတက်လာပါတယ်။ အကျဈေးနဲ့ ပြီးခဲ့တဲ့ ၈ လ နီးပါးလုံးဈေးငြိမ်နေခဲ့တာဖြစ်ပြီး လက်ရှိမှာတော့ အဝယ်ရှိလာတဲ့အပြင် အသစ်တွေလည်း ဈေးတက်လာတာဖြစ်လို့ ဈေးတွေက တောက်လျှောက်တက်လာတာဖြစ်ပါတယ်။

နှမ်းနက်(စမုံ)က လက်ရှိပေါက်ဈေးက တစ်အိတ်ကို ၁၂၅၀၀၀ ကနေ ၁၉၀၀၀၀ ပေါက်ဈေးရှိနေပြီး အက်စစ်လွတ် ရှယ်ကတော့ ဈေးအမြင့်ဆုံးရရှိနေပါတယ်။ မန္တလေးဈေးကွက်မှာ တစ်ပတ်အတွင်း တစ်အိတ်ကို ၁၅၀၀၀ နီးပါးဈေးတက်လာခဲ့ပါတယ်။

အောင်လံဈေးကွက်မှာလည်း တစ်အိတ်ကို ၁၃၀၀၀၀ ကနေ ၁၇၀၀၀၀ ပေါက်ဈေးရှိပြီးတစ်အိတ်ကို ၂၀၀၀၀ လောက်ဈေးတက်လာပါတယ်။

ဆင်ဖြူကျွန်းမှာတော့ တစ်တင်းကို ၅၅၀၀၀ ပေါက်ဈေးရှိနေပါတယ်။

ပြည်ဈေးကွက်မှာတော့ တစ်အိတ်ကို ၁၂၀၀၀၀ ပေါက်ဈေးရှိပေမယ့် အရောင်းအဝယ်ကတော့ ရက်ခြားသာရှိပါတယ်။

ကြက်သွန်နီ

ဆက်တိုက်ဈေးကျဆင်းနေတဲ့ကြက်သွန်နီက လက်ရှိမှာ ပြည်တွင်းဝယ်ယူမှုကြောင့် ဈေးအနည်းငယ်ပြန်တက်လာခဲ့ပါတယ်။ ပြည်ပတင်ပို့ရောင်းချမှုကတော့ လတ်တလောမရှိသေးတဲ့အတွက်ကြောင့်ကြက်သွန်နီက ယခုထက် ဈေးအများကြီးတက်နိုင်ခြေမရှိပါဘူး။

ရန်ကုန်ဈေးကွက်မှာ ကြက်သွန်နီ(ဆိပ်ဖြူ၊မြင်းခြံ၊ပခုက္ကူ)တို့က တစ်ပိဿာကို ၂၅၀ ကနေ ၅၅၀ ပေါက်ဈေးရှိပြီး ၁၀၀ ကျပ်ဈေးတက်လာပါတယ်။

မော်လမြိုင်ဈေးကွက်မှာတော့ ကြက်သွန်နီ(မြစ်သား) က တစ်ပိဿာကို ၄၇၀ ကနေ ၅၅၀ ပေါက်ဈေးရှိနေပြီး တစ်ပိဿာကို ၃၀ လောက်ဈေးတက်လာပါတယ်။

အာလူး

အာလူးကလည်း ဒီတစ်ပတ်မှာ ဈေးတက်လာပါတယ်။ ဝယ်ယူစုဆောင်းမှုတွေကြောင့် ဈေးတွေတက်လာတာဖြစ်ပါတယ်။

ရန်ကုန်ဘုရင့်နောင်ဈေးကွက်မှာ တစ်ပိဿာကို ၆၅၀ ကနေ ၁၄၀၀ ပေါက်ဈေးရှိပြီး တစ်ပိဿာကို ၂၀၀ ကျပ်ဈေးတက်လာပါတယ်။

မော်လမြိုင်ဈေးကွက်မှာတော့တစ်ပိဿာကို ၉၅၀ ပေါက်ဈေးရှိပြီး ၁၀၀ ကျပ်ဈေးတက်လာပါတယ်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...