ဘင်္ဂလားပင်လယ်အော်အရှေ့တောင်ပိုင်းမှာ လေဖိအားနည်းရပ်ဝန်းတခုဖြစ်လာနိုင်မည် နိုဝင်ဘာလ ၁၁ ရက် ည ၇ နာရီ ==========...

ဘင်္ဂလားပင်လယ်အော်အရှေ့တောင်ပိုင်းမှာ လေဖိအားနည်းရပ်ဝန်းတခုဖြစ်လာနိုင်မည် နိုဝင်ဘာလ ၁၁ ရက် ည ၇ နာရီ =========== အိန္ဒိယမိုးလေဝသဌာနရဲ့ နိုဝင်ဘာ ၁၁ ရက် ထုတ်ပြန်ချက်မှာတော့ ဘင်္ဂလားပင်လယ်အော် အရှေ့တောင်ပိုင်းမှာ လေဖိအားနည်းရပ်ဝန်းတခုဖြစ်လာပြီး အားပိုကောင်းလာမယ်၊ အားကောင်းတဲ့လေဖိအားနည်းရပ်ဝန်းအဆင့်အထိ ရောက်လာနိုင်မယ် လို့ထုတ်ပြန်ထားတာတွေ့ရပါတယ်။ WINDY နဲ့ METEOBLUE တို့မှ သင်္ချာပုံစံခန့်မှန်းရေးမော်ဒယ်တွေဖြစ်တဲ့ ECMWF, GFS နဲ့ NEMS တို့ကလဲ နိုဝင်ဘာလ ၁၄ ရက်နေ့၊ ဘင်္ဂလားပင်လယ်အော်အရှေ့တောင်ပိုင်းမှာ လေဖိအားနည်းရပ်ဝန်းတခုဖြစ်လာနိုင်ကြောင်းပြနေကြတာတွေ့ရပါတယ်။ GFS နဲ့ NEMS ခန့်မှန်းချက်တွေအရ နိုဝင်ဘာလ ၁၇ ရက် နံနက်ပိုင်းမှာ ဘင်္ဂလားဒေ့ရှ်ကမ်းရိုးတန်းကို မုန်တိုင်းငယ်အဆင့်နဲ့ ဖြတ်ကျော်ဝင်ရောက်နိုင်ကြောင်းတွေ့ရပြီး၊ ECMWF ခန့်မှန်းချက်မှာတော့ ၁၇ ရက် နံနက်ပိုင်းမှာ အိန္ဒိယနိုင်ငံအရှေ့ဘက်ကမ်းခြေဆီဦးတည်ရွေ့လျားနိုင်ကြောင်း၊ အားကောင်းသောလေဖိအားနည်းရပ်ဝန်း အဆင့်အထိသာရောက်နိုင်ပြီး နိုဝင်ဘာလ ၂၀ ရက်နေ့ကျရင်ဘင်္ဂလားပင်လယ်အော်အနောက်မြောက်ပိုင်းမှာ အားပျော့သွားနိုင်မဲ့အခြေအနေရှိတာကို တွေ့ရပါတယ်။ အိန္ဒိယမိုးလေဝသဌာနခန့်မှန်းချက်နဲ့ သင်္ချာပုံစံခန့်မှန်းရေးမော်ဒယ် ၃ ခုက ခန့်မှန်းတာတွေအရ နိုဝင်ဘာလ ၁၄ ရက်နေ့ကျရင် ဘင်္ဂလားပင်လယ်အော် အရှေ့တောင်ပိုင်းမှာ လေဖိအားနည်းရပ်ဝန်းဖြစ်လာနိုင်မှာက သေချာသလောက်ရှိနေပြီဖြစ်ပြီး လေဖိအားနည်းရပ်ဝန်းဖြစ်ပြီးတဲ့နောက် ဘယ်ဘက်ကိုဘယ်လိုရွေ့မယ် ဘယ်လောက်အထိ အားကောင်းလာနိုင်မယ်ဆိုတာတွေတော့ ဆက်ပြီး စောင့်ကြည့်သွားကြရမှာဖြစ်ပါတယ်။ အယ်လ်နီညိုဖြစ်နေချိန်၊ အိုင်အိုဒီ positive ဖြစ်နေချိန်တွေမှာဖြစ်တတ်တဲ့သဘာဝအတိုင်း မြန်မာနိုင်ငံရဲ့နေရာအချို့ **အထူးသဖြင့် ရခိုင်ပြည်နယ်၊ ချင်းပြည်နယ်နဲ့နိုင်ငံအထက်ပိုင်းဒေသအချို့မှာ** အချိန်အခါမဟုတ်မိုးတွေရွာနိုင်တာရှိနိုင်ပေမဲ့ ရေကြီးနိုင်လောက်တဲ့အထိတော့ ရောက်မှာမဟုတ်ကြောင်း ကြိုတင်ခန့်မှန်းချက်တွေမှာတွေ့ရပါတယ်။ စပါးရိတ်သိမ်းချိန်တွေဖြစ်တာကြောင့် အချိန်အခါမဟုတ်-ဖျက်မိုးများရွာတဲ့အခါ ထိခိုက်ဆုံးရှုံးမှုများမဖြစ်ရအောင် လိုအပ်တာတွေ ကြိုတင်ပြင်ဆင်ထားကြဖို့ ၃ ရက် ခန့် အချိန်ရနိုင်ပါသေးတယ်။ နေရာအတိအကျကိုတော့ လတ်တလောခန့်မှန်းချက်တွေအရ မပြောနိုင်သေးပါ။ နိုဝင်ဘာလ ၁၄ ရက်နေ့မှာဖြစ်လာမဲ့လေဖိအားနည်းရပ်ဝန်းအခြေအနေကိုစောင့်ကြည့်ပြီး သက်ရောက်နိုင်မဲ့ မိုးလေဝသအခြေအနေများကို ဆက်လက်တင်ပြပေးသွားပါဦးမယ်။