မွန်နှင့် ကရင်ပြည်နယ်တို့တွင် မိုးသည်းထန်စွာ ဆက်လက် ရွာသွန်းနိုင်

စက်တင်ဘာ ၂ ရက် နေ့လည် ၂ နာရီ အချိန်တွင် အိန္ဒိယမိုးလေဝသဌာန (IMD) ၏ ထုတ်ပြန်ချက်နှင့် Meteoblue (ICON Model) ၏ နေ့စဉ်မိုးရေချိန်ပြမြေပုံများ (Daily Precipitation Maps) အရ စက်တင်ဘာလ ၂ ရက်မှ ၈ ရက်နေ့အထိ (၇ ရက်အတွင်း) ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ မွန်ပြည်နယ်နှင့် ကရင်ပြည်နယ်တို့၏ နေ့စဉ်နှင့် စုစုပေါင်း ခန့်မှန်းမိုးရေချိန် ဇယား (mm)၊ မိုးရွာသွန်းမှု အရှိန်အဟုန် ပြောင်းလဲမှုနှင့် သဘာဝဘေးအန္တရာယ် ဆန်းစစ်သုံးသပ်ချက် ဖြစ်ပါသည်။

၁။ တိုင်းဒေသကြီးနှင့် ပြည်နယ်အချို့ (မွန်/ကရင်/ပဲခူး/ရန်ကုန်/ဧရာဝတီ) ၏ နေ့စဉ်နှင့် ၇ ရက် စုစုပေါင်း ခန့်မှန်းမိုးရေချိန်ဇယား (mm)

(၇ ရက် စုစုပေါင်း ခန့်မှန်းမိုးရေချိန် အများဆုံးမှ အနည်းဆုံးအလိုက် High to Low Sorted ပြုလုပ်ထားပါသည်)

၂။ မိုးလေဝသ အခြေအနေနှင့် မိုးရွာသွန်းမှု အရှိန်အဟုန် ဆန်းစစ်ချက်

လေဖိအားနည်းရပ်ဝန်း အားလျော့သွားခြင်း - အိန္ဒိယမိုးလေဝသဌာန (IMD) ၏ စက်တင်ဘာ ၂ ရက် ထုတ်ပြန်ချက်အရ ဘင်္ဂလားပင်လယ်အော် အနောက်မြောက်ပိုင်း၌ ဖြစ်ပေါ်ခဲ့သော အားကောင်းသော လေဖိအားနည်းရပ်ဝန်း Well Marked LPA သည် အိန္ဒိယကုန်းတွင်းပိုင်း (Madhya Pradesh) သို့ ရွေ့လျားသွားပြီး မကြာမီ ပုံမှန်လေဖိအားနည်းရပ်ဝန်းအဖြစ် အားလျော့သွားမည် ဖြစ်ပါသည်။

မုတ်သုံလေ အရှိန်အဟုန် ပြောင်းလဲမှု

စက်တင်ဘာ ၂ - ၄ ရက် (မိုးအသင့်အတင့် ရှိနေဆဲကာလ): မုတ္တမကွေ့၊ ကပ္ပလီပင်လယ်ပြင်နှင့် ဘင်္ဂလားပင်လယ်အော် တောင်ပိုင်းတို့၌ အနောက်တောင်မုတ်သုံလေ အားအသင့်အတင့် တိုက်ခတ်နေဆဲ ဖြစ်သဖြင့် မွန်နှင့် ကရင်ပြည်နယ်တို့တွင် မိုးသည်းထန်စွာ ဆက်လက် ရွာသွန်းနိုင်သည်။

စက်တင်ဘာ ၅ - ၈ ရက် (မိုးအား သိသိသာသာ လျော့နည်းသွားမည့်ကာလ): လေဖိအားနည်းစနစ် အိန္ဒိယကုန်းတွင်းပိုင်းသို့ အလွန်ဝေးကွာသွားသည်နှင့်အမျှ မြန်မာနိုင်ငံတောင်ပိုင်းနှင့် မြစ်ဝကျွန်းပေါ်ဒေသများအပေါ် မုတ်သုံလေ၏ သက်ရောက်မှု လျော့ပါးသွားမည်ဖြစ်ရာ ဧရာဝတီ၊ ရန်ကုန်နှင့် ပဲခူးတိုင်းတို့တွင် နေ့စဉ် မိုးရေချိန် ပမာဏနှင့် မိုးရွာသွန်းသည့် အကြိမ်ရေ သိသိသာသာ နည်းပါးသွားမည် ဖြစ်ပါသည်။

၃။ ပြည်နယ်နှင့် တိုင်းဒေသကြီးများအလိုက် သဘာဝဘေးအန္တရာယ် သုံးသပ်ချက်

ဧရာဝတီတိုင်းဒေသကြီး (လေးမျက်နှာမြို့နယ် အပါအဝင်) - “၇ ရက်အတွင်း စုစုပေါင်း မိုးရေချိန်” 53mm မှ 107mm ခန့် (၂ လက်မ မှ ၄ လက်မခွဲခန့်)သာ ရှိတော့မည် ဖြစ်သဖြင့် ဒေသတွင်း မိုးရွာသွန်းမှု လျော့နည်းသွားမည် ဖြစ်သည်။ သို့သော် မြန်မာနိုင်ငံအထက်ပိုင်း (စစ်ကိုင်းအထက်ပိုင်းနှင့် ကချင်ပြည်နယ်) တို့မှ စီးဆင်းလာသော အထက်မြစ်ရေများ စီးဆင်းလာခြင်းကြောင့် ငဝန်မြစ်နှင့် ဧရာဝတီမြစ်ရေသည် ဆက်လက်၍မြင့်နေဦးမည် ဖြစ်သည်။ ထို့ကြောင့် ငဝန်မြစ်တာကျိုးမှုကြောင့် ရေကြီးနေသည့် လေးမျက်နှာမြို့နယ်အတွင်း ရေကျဆင်းမှု အလွန်နှေးကွေးနေမည်ဖြစ်၍ ရေဘေး အန္တရာယ်ကို ဆက်လက် သတိပြုရန် လိုအပ်ပါသည်။

မွန်ပြည်နယ်နှင့် ကရင်ပြည်နယ် - မုတ္တမကွေ့အနီး တည်ရှိမှုနှင့် မုတ်သုံလေတိုက်ရိုက် ကျရောက်မှုကြောင့် “၇ ရက်အတွင်း စုစုပေါင်း မိုးရေချိန်” 117mm မှ 255mm ခန့် (၄.၆ လက်မ မှ ၁၀ လက်မ အထက်အထိ) ရှိနိုင်ပါသည်။ ကရင်ပြည်နယ်နှင့် မွန်ပြည်နယ်တို့၏ တောင်ခြေဒေသများ (ဘားအံ၊ လှိုင်းဘွဲ့၊ ရေး၊ သံဖြူဇရပ်) ၌ မိုးစွဲရွာသွန်းမှုကြောင့် သံလွင်မြစ်နှင့် သံဖြူဇရပ်/ရေး ချောင်းရေများ ရုတ်တရက် လျှံတက်ခြင်း နှင့် ကုန်းစောင်း မြေပြိုမှု အန္တရာယ်များကို အထူးသတိပြုရန် လိုအပ်ပါသည်။

ပဲခူးတိုင်းနှင့် ရန်ကုန်တိုင်းဒေသကြီး - စက်တင်ဘာ ၄ ရက်နောက်ပိုင်း မိုးအား လျော့သွားမည်ဖြစ်၍ ပဲခူးမြစ်၊ ငမိုးရိပ်ချောင်းနှင့် စစ်တောင်းမြစ်တို့အတွင်း မိုးရေစီးဝင်မှု လျော့နည်းသွားမည် ဖြစ်သည်။ ထို့ကြောင့် ပဲခူးမြို့နှင့် ရန်ကုန်မြို့တွင်း မြေနိမ့်ပိုင်း လမ်းမကြီးများ၌ ရေကြီးရေလွှမ်းမိုးမှု အခြေအနေများ ပြန်လည်သက်သာ သက်သာလာမည် ဟု သုံးသပ်ရပါသည်။

မိုးလေဝသပညာရှင် ဆရာဦးဝင်းနိုင်၏ ခွင့်ပြုချက်ဖြင့် ပြန်လည်ဖော်ပြသော သတင်းဖြစ်သည်။