သယ်ယူစရိတ်တွေမြင့်တက်လို့ မတ်ပဲတင်ပို့မှုလျော့ကျပြီး အရောင်းအဝယ် အေးနေ

လောင်စာဆီ အခက်အခဲကြောင့် ကုန်တင်ကားများ မထွက်နိုင်သည့်အတွက် ဧရာဝတီတိုင်း၊ ဟင်္သာတမှ မတ်ပဲများ ရန်ကုန်သို့ တင်ပို့ရောင်းချနိုင်မှု လျော့ကျနေကြောင်း ဟင်္သာတကုန်စည်ဒိုင်မှ သိရသည်။

မတ်ပဲကို ရန်ကုန်သို့ တင်ပို့ရောင်းချနိုင်မှု လျော့ကျသည့်အပြင် မတ်ပဲသယ်ယူစရိတ် တန်ဆာခလည်း မြင့်တက် လာခြင်းကြောင့် ဟင်္သာတပဲဈေးကွက်တွင် မတ်ပဲအရောင်းအဝယ် အေးနေပြီး ဈေးနှုန်းများလည်း ကျဆင်းနေ ကြောင်း သိရသည်။

ပဲသယ်ယူစရိတ် မြင့်မားလာခြင်းကြောင့် ကုန်သည်များက မတ်ပဲပိဿာ ၂၀ ဝင် တစ်တင်းလျှင် လက်ရှိ ပေါက်ဈေးထက် ၂,၀၀၀ ကျပ်ခန့် ခွာ၍ ဝယ်ယူမှုများ ရှိလာသည်။

"သယ်ယူစရိတ်က အရင်က ပိဿာ ၃၀ ဝင် တစ်အိတ်ကို ၁,၇၅၀ ကျပ်ပဲ ရှိတာ။ အခု ၃,၅၀၀ ကျပ် ဖြစ်သွားပြီ။ အဲဒီတော့ ပဲတစ်တင်းကို တန်ဆာခဖိုး ထပ်နှုတ်ပြီးမှ ဝယ်ယူတော့ ပဲဈေးက မတက်နိုင်ဘူး။ တက်မယ့်ဟာက တန်ဆာခထဲ ရောက်သွားတာပေါ့" ဟု ကုန်သည်တစ်ဦးက ပြောသည်။

လက်ရှိတွင် ဟင်္သာတရှိ ပဲတင်ဆောင်သည့် ကုန်တင်ကားများမှာ စက်သုံးဆီ အခက်အခဲရှိနေသောကြောင့် မထွက်နိုင်ဘဲ ဖြစ်နေပြီး ပွဲရုံများတွင်လည်း ပဲအရောင်းအဝယ် အေးနေခြင်းဖြစ်သည်။

"ဥပမာပြောရရင် အရင်က ကား ၁၀ စီး ထွက်နိုင်ရင် အခုက ၂ စီးလောက်ပဲ ထွက်နိုင်သည်။ ကားမထွက်နိုင်တော့ ပဲတွေလည်း ပုံနေတယ်။ အဲဒီတော့ အရောင်းအဝယ်လည်း သိပ်မဖြစ်တော့ဘူး" ဟု ဟင်္သာတကုန်စည်ဒိုင်မှ တာဝန်ရှိသူတစ်ဦးက ဆိုသည်။

လက်ရှိ ဟင်္သာတကုန်စည်ဒိုင်တွင် မတ်ပဲပိဿာ ၂၀ ဝင် တစ်တင်းလျှင် ၉၆,၅၀၀ ကျပ်ဝန်းကျင် ဈေးပေါက်နေသော်လည်း အရောင်းအဝယ် အေးနေကြောင်း သိရသည်။

ရန်ကုန် ဘုရင့်နောင်ကုန်စည်ဒိုင် ဈေးကွက်တွင်မူ မတ်ပဲ FAQ တစ်တန်လျှင် ၃,၀၈၃,၀၀၀ ကျပ် ဈေးရှိပြီး FOB ဈေးမှာ တစ်တန်လျှင် အမေရိကန်ဒေါ်လာ ၈၀၀ မှ ၈၁၀ အတွင်း ရှိနေသည်။

မတ်ပဲသည် ဧရာဝတီတိုင်းတွင် ယခုနှစ် အထွက်နှုန်း သိသိသာသာ လျော့ကျခဲ့ခြင်းကြောင့် လက်ရှိတွင် တောင်သူလက်ဝယ်၌ မတ်ပဲလက်ကျန် အများအပြား မရှိတော့ကြောင်း သိရသည်။ မတ်ပဲအထွက်နှုန်း လျော့ကျမှုကြောင့် တောင်သူများအနေဖြင့် အကျိုးအမြတ် မရရှိသည့်အပြင် အရှုံးနှင့်ပင် ကြုံတွေ့ခဲ့ရသည်ဟု ဆိုပါသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။