မိသားစုအပိုဝင်ငွေရရှိစေသည့် ပန်းသီးပင်စိုက်ပျိုးရေးကို ချင်းတောင်၌ တိုးချဲ့စိုက်ပျိုးလာကြ

08/12/2020 10:45 AM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

    မိသားစုအပိုဝင်ငွေရရှိစေသည့် ပန်းသီးပင်စိုက်ပျိုးရေးကို ချင်းတောင်၌ တိုးချဲ့စိုက်ပျိုးလာကြကြောင်း ချင်းပြည်နယ်တောင်ပိုင်းရှိ ဒေသခံတောင်သူများထံမှ သိရသည်။

ဝဥပင်ကို စီးပွားဖြစ် ၅ ဧကလောက် စိုက်ထားတယ်။ ထောပတ်ပင်လည်း နည်းနည်းစိုက်ထားတယ်။ ပန်းသီးပင်ကို ၂ ဧက (အပင်ရေ-၅၀၀) စိုက်ထားတယ်။ စစိုက်တုန်းကတော့ ဈေးကွက်ကောင်းလို့ စိုက်ခဲ့တာမဟုတ်ဘူး။ တောင်ယာတစ်ဖက်၊ နှစ်ရှည်ပင်တစ်ဖက် စိုက်ပျိုးရင်း တစ်ဖက်တစ်လမ်းက မိသားစုအပိုဝင်ငွေရအောင်ဆိုပြီး စိုက်ဖြစ်ခဲ့တာ။ ဒီဘက် ၂၀၁၈ ခုနှစ် ပတ်ဝန်းကျင်ကစပြီး ပန်းသီးပင်စိုက်ပျိုးရေးကို စိတ်ဝင်စားတဲ့သူတွေ တစ်စစများလာတယ်။ အရင်တုန်းကတော့ ပန်းသီးပင်တကူးတကစိုက်တဲ့လူရယ်လို့ မရှိခဲ့ဘူး။ အခုနောက်ပိုင်း ပန်းသီးတွေ ကျွန်တော်တို့ရောင်းရတာ၊ ဈေးကွက်ကောင်းတာကို ကြည့်ပြီးတော့ အားကျလာကြတယ်။ တခြားတောင်သူတွေလည်း စိုက်ပျိုးလာကြပါပြီ။

ဟု ချင်းပြည်နယ်တောင်ပိုင်း၊ မင်းတပ်မြို့နယ်၊ ချပ်ကျေးရွာမှ ပန်းသီးပင်စိုက်ပျိုးသူ ဦးချွမ်ဂေ က ပြောသည်။

    ပန်းသီးပင်သည် နှစ်ရှည်ပင်အမျိုးအစားဖြစ်ပြီး ပြုစုပေးနိုင်ပါက နှစ်ပေါင်း (၂၀) နှင့်အထက် သက်တမ်းရှည်ကြာ ဝင်ငွေရရှိစေနိုင်သည်။ 

ဒီမှာ ကျွန်တော်တို့စိုက်တုန်းကတော့ စိုက်ပျိုးရေးဌာနရဲ့လမ်းညွှန်ချက်နဲ့မဟုတ်ဘူး၊ သာမန်ရိုးကျစနစ်နဲ့ စတင်စိုက်ပျိုးထားခဲ့ကြတာပါ။ အခုဆိုရင် စိုက်ပျိုးရေးဦးစီးဌာနကလည်း တစ်ဖက်တစ်လမ်းက ဝင်ငွေတိုးစေတဲ့ ပန်းသီးပင်တွေကို တိုးချဲ့ပြီးတော့ စိုက်ပျိုးဖို့ တိုက်တွန်းနေပါတယ်။

ဟု ၎င်းက ဆက်လက်ပြောသည်။

    ပန်းသီးပင် စိုက်ပျိုးပါက တစ်ဧကစိုက်ပျိုးစရိတ်စုစုပေါင်း (၁၀) သိန်းကျပ်ဝန်းကျင် ပျမ်းမျှကုန်ကျနိုင်ကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။