တောထဲတောင်ထဲက စားစရာအပင်များ

တစ်ချို့တွေက တကယ်ကို ပွေလီလျှာလီစားတတ်ကြတာအမှန်ပါ။ အဲ့လိုစားတတ်တာရဲ့ကောင်းကျိုးတွေကလည်း ရှိတာကိုနော်။ တောင်သူတွေက ဟင်းသီးဟင်းရွက်တွေအနေနဲ့ ထွေထွေထူးထူးကို ဝယ်စားစရာမလိုတာ။ ကိုယ့်ဒေသမှာပေါက်လေ့ရှိတဲ့ စားလို့ရတဲ့အပင်တစ်ချို့ကို ညနေတောထဲကအပြန် ခူးယူလာပြီး ဖွယ်ဖွယ်ရာရာချက်စားကြတာပေါ့။

တောထဲတောင်ထဲကနေ ရရှိနိုင်တဲ့ စားစရာအပင်တွေအနေနဲ့ တောင်ပေါ်ဒေသဘက်မှာ ပေါက်လေ့ရှိပြီး စားလေ့ရှိကြတဲ့အပင်အချို့တွေက..

မှို

မှိုကတော့အားလုံးနဲ့ရင်းနှီးပြီးသားပါ။ ဟင်းခတ်အမွှေးအကြိုင်စုံစုံနဲ့ မချက်စားရင်တောင် ဂျင်းနဲ့ အရည်သောက်လေးချက်စားရင် ထမင်းအရမ်းမြိန်တဲ့ ဟင်းတစ်ခွက်ပါ။

ငါးရံ့ပတူ

ငါးရံ့ပတူရွက်တွေကတော့ မိုးဦးကျချိန်မှာ လှိုင်လှိုင်ပေါတတ်ပြီး အရွက်နုလေးတွေကိုခူးပြီး သုပ်စားကြပါတယ်။

တောင်ပို့လူ့လင်

မိုးဦးကျချိန်မှာပေါက်တတ်ပြီး အရွက်ကိုဟင်းချိုခပ်စားကြပါတယ်။ ဓနုဟင်းတစ်မျိုးဖြစ်ပြီး အာလူးနဲ့ အရည်သောက်လေးခပ်စားကြတာပေါ့။

ရင်းပြား (ယင်းပြား)

တစ်ပေါင်း တန်ခူးမှာထွက်တဲ့ အရွက်နုတွေကို တို့စရာအနေနဲ့ပဲဖြစ်ဖြစ် သုပ်စားရင်ပဲဖြစ်ဖြစ် အရမ်းကောင်းတဲ့ ရင်းပြားရွက်ပဲဖြစ်ပါတယ်။ မိုးများတဲ့အချိန်ရောက်သွားရင်တော့ အရွက်တွေကခါးသွားတတ်ပါတယ်။

မြင်းခွာရွက်

လူတိုင်းကြိုက်ပြီး ဆေးဖက်ဝင်တဲ့ မြင်းခွားရွက်ကဆိုရင်လည်း တောထဲမှာအလေ့ကျပေါက်ပြီး သုပ်စားလေ့ရှိကြတဲ့ အပင်တစ်မျိုးပါ။

အင်ဥ

ဇွန်၊ ဇူလှိုင်မှာပေါတဲ့ အင်ဥလေးတွေကလည်း တောထဲကရတနာလေးတစ်ခုပါပဲ။ အင်ဥတွေ့တဲ့နေ့ဆို မိသားစုတွေပျော်တဲ့နေ့တစ်နေ့ပါပဲ။ အင်ဥကိုတော့ ကြော်စားကြတာများပါတယ်။

မာလာဖူး

မာလာဖူးကိုလည်း လူတိုင်းသိမှာပါ။ ငပိရည်နဲ့ တို့စရာအနေနဲ့စားသုံးမှုများသလို မြေပဲဆံလေးနဲ့ထောင်းရင်လည်း အရမ်းကောင်းပါတယ်ရှင်။

မုံတိုင်

ဒီအပင်လေးကအမွှေးများတဲ့အတွက် စားမယ်ဆိုရင် နည်းနည်းတော့အလုပ်ရှုပ်ပါလိမ့်မယ်။ အလုပ်ရှုပ်တာနဲ့တန်အောင်လည်း စိမ့်စိမ့်လေးနဲ့ စားကောင်းတာကို။ အရင်ဆုံး မုံတိုင်ကိုခူးလာပြီးပြီဆိုရင် ပြာပူထဲမှာပုံထားပေးရပါတယ်။ ပြာပုံကထုတ်ပြီး အဝတ်စနဲ့တိုက်ချပေးတဲ့အခါ အမွှေးတွေကျွတ်သွားပါလိမ့်မယ်။ ပေါ်လာတဲ့အူတိုင်ကို ရေးနွေးနဲ့ပြုတ်ပြီး အနေတော်လေးတွေလှီးပြီး သုပ်စားလို့ရပါပြီရှင်။

ဆက်လက်ပြီးတော့ အညာဒေသဘက်တွေမှာလည်း ပေါပြီး အလွယ်တကူခူးခပ်စားသောက်နိုင်တဲ့ အပင်တစ်ချို့ကိုပြောပြချင်ပါတယ်။

ဖလံတောင်ဝှေး

ဖလံတောင်ဝှေးကိုတော့ အလည်အူတိုင်ကိုစားရတာပါ။ ဖလံတောင်ဝှေးကို ခူးလာပြီဆိုရင် အရင်ဆုံး အရွက်တွေကိုခွာလိုက်ပါ။ အရွက်တွေကုန်ပြီး အူတိုင်ကို ခရမ်းချဉ်သီးအနှစ်လေးနဲ့ ချက်စားလေ့ရှိကြပါတယ်။ ကြော်စားလို့လည်းကောင်းသလို ငါးနဲ့ချက်စားမယ်ဆိုရင်လည်း အရမ်းကောင်းတဲ့ဟင်းတစ်ခွက်ဖြစ်မှာပါ။

လဲလူရွက်

လဲလူရွက်ကလည်း မိုးဦးမှာပေါတာပါ။ အရွက်နုနဲ့ အညွှန့်များကို ဟင်းချိုခပ်ပြီးစားလို့ရပါတယ်။ တို့စရာအနေနဲ့လည်း စားသုံးကြပါတယ်။

ဂုဏ်ရွက်

ဂုဏ်ရွက်ကလည်း နူးနူးညံ့ညံ့လေးနဲ့ ဟင်းချိုချက်စားလို့ကောင်းတဲ့ အရွက်တစ်မျိုးပါ။ ဆူးပုပ်ပေါ်တဲ့ချိန်ဆိုရင် ဆူးပုပ်လေးပါခပ်ပြီး ဟင်းချိုလုပ်သောက်ကြပါတယ်။

ကုက္ကိုရွက်

အပင်ကြီးကြီးကုက္ကိုပင်က အရွက်မဟုတ်ပါဘူးနော်။ စားလို့ရတဲ့ကုက္ကိုရွက် (အရွက်ရှည်မျိုး) သပ်သပ်ရှိပါတယ်။ အရွက်နုလေးတွေကိုသုပ်စားမယ်ဆိုရင် အရမ်းကောင်းတဲ့ဟင်းတစ်ခွက်ပါပဲ။

ပျဉ်းတော်သိမ်

ပျဉ်းတော်သိမ်ရွက်ကိုတော့ တို့စားကြတာများပါတယ်။

မယ်ဇလီဖူး

တောထဲမှာဆိုရင် မယ်ဇလီပင်တွေကလည်း ပေါမှပေါပဲ။ သုပ်စားမယ်ဆိုရင် ဆေးဖက်ဝင်တဲ့ ဟင်းတစ်ခွက်လည်းဖြစ်ပါတယ်။

ပိတ်စွယ်

ရေချောင်းစပ်တွေမှာပေါက်တတ်တဲ့ ပိတ်စွယ်လေးတွေကို ရှာဖွေပြီး အရသာရှိစွာကြော်စားနိုင်ပါတယ်။

သခွပ်ပွင့်

ဆတ်တောက်ဆတ်တောက်နဲ့ စားလို့ကောင်းတဲ့သခွပ်ပွင့်လေးပါ။ တစ်ချို့ကတော့ ရေနွေးဖျောပြီးသုပ်စားကြသလို တစ်ချို့က ဆန်ဆေးရေနဲ့တစ်ညစိမ် နောက်နေ့မှာ အစိမ်းသုပ်စားလေ့ရှိကြပါတယ်။

ကဲ အခုဆိုရင်တော့ တောထဲရောက်ရင်လည်း အရသာရှိပြီး ဆေးဖက်ဝင်တဲ့ ဟင်းတစ်ခွက်ကတော့ မလှမ်းမကမ်းဖြစ်သွားလောက်ပြီနော်။ အစိမ်းရောင်လမ်းပရိတ်သတ်များအားလုံး ကျန်းမာဘေးကင်းကြပါစေ။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...