ကျန်းမာရေးအတွက် လက်ဖက်ရည်ကြမ်း

လက်ဖက်ရည်ကြမ်းကတော့ ဦးကြီးတို့ အန်တီတို့နဲ့ မစိမ်းပါဘူး။ ယာထဲ ခြံထဲ လယ်ထဲ မှာပဲဖြစ်ဖြစ် အလုပ်လုပ်ပြီးလို့ ခဏနားတဲ့အချိန်၊ ထမင်းစားတဲ့အချိန်တွေ၊ စကားဝိုင်းဖွဲ့ပြောတဲ့နေရာမှာတော့ မပါမဖြစ်ပါပဲ။ ဆိုတော့ အမြဲသောက်ဖြစ်နေတဲ့ လက်ဖက်ရည်ကြမ်းက ကျန်းမာရေးအတွက် ဘယ်လိုအထောက်အကူပြုမလဲဆိုတာ ဒီနေ့မှာ ဖော်ပြပေးလိုက်ပါတယ်။

တစ်ရက်လျှင် အနည်းဆုံး လက်ဖက်ရည်နှစ်ခွက်ခန့်သောက်ပေးခြင်းသည် ကင်ဆာရောဂါကို ၅၀ ရာခိုင်နှုန်းနီးပါးမျှ လျော့နည်းစေသည်ကို ကာရိုလင်စကာသိပ္ပံမှ သုတေသီများက တွေ့ရှိခဲ့ကြသည်။ ဒီတွေ့ရှိချက်ကို လက်ဖက်ရည်ကြမ်းတွင်ပါဝင်သော အင်တီအောက်ဆီးဒင့် (Antioxidants) ဓာတ်တိုးဆန့်ကျင်မှု၏ ဂုဏ်သတ္တိကြောင့်ဖြစ်နိုင်ကြောင်း အနီးစပ်ဆုံး ဆုံးဖြတ်ထားကြပါသည်။ 

လက်ဖက်ရည်ကြမ်းတွင်ပါဝင်သော သဘာဝဓာတ်များ

အမိုင်နိုအက်စစ်၏ အနွယ်ဝင်ဖြစ်သော သိုင်ယာနင်းဓာတ် အများဆုံးပါဝင်သည်။ ဆေးသိပ္ပံပညာရှင်များ၏ အဆိုအရ သိုင်ယာနင်း သဘာဝဓတ်သည် ဦးနှောက်ကို အေးငြိမ်းစေသည့်အာနိသင် ဂုဏ်သတ္တိများကို ပေးစွမ်းနိုင်သောကြောင့် စိတ်ပိုင်းဆိုင်ရာဖိစီးမှုကို သက်သာစေသည်ဟု သိရသည်။

လက်ဖက်ရည်ကြမ်းကို တစ်နေ့လျှင် လေးခွက်နှင့်အထက် သောက်သုံးသူများသည် လုံးဝမသောက်သူများနှင့်စာလျှင် စိတ်မပျော်ရွှင်မှုနှင့် စိတ်ကျရောဂါခံစားရမှုများကို ၄.၄ % ပိုမိုနည်းပါးကြောင်းကို သိရှိရသည်။

ထို့အပြင် လက်ဖက်ရည်ကြမ်းကို နေ့စဉ်သောက်သုံးပေးခြင်းသည် ကျောက်ကပ်ရောဂါကိုမဖြစ်ပွားစေရန် ကာကွယ်ပေးနိုင်ကြောင်း ဆေးသုတေသနသတင်းတွင် ဖော်ပြထားသည်။ လက်ဖက်ရည်ကြမ်းတွင်ပါဝင်သော သဘာဝဆေးဖက်ဝင်ဓာတ်များသည် သွေးတွင်း ကိုလက်စထရောများကို ကျဆင်းစေရန် ကူညီဆောင်ရွက်ပေးနိုင်ပါသည်။ ထို့ပြင် သွေးသန့်မှုကိုလည်း ဆောင်ရွက်ပေးသည်။ ခန္ဓာကိုယ်မှ မလိုလားအပ်သော အညစ်အကြေးများကိုလည်း ဖယ်ရှားရာတွင် အထောက်အကူပြုစေနိုင်သည်။ သွေးတွင်း သကြားဓာတ်ပမာဏကိုလည်း လျော့နည်းကျဆင်းစေနိုင်ကြောင်း အမေရိကန် သုတေသနပညာရှင်များမှ ထုတ်ဖော်ပြောဆိုခဲ့ပါသည်။ 

လက်ဖက်ရည်ကြမ်းကို နေ့စဉ် ပုံမှန် နှစ်လီတာ (ရေသန့်ဘူးနှစ်ဘူး) ခန့်ကို သောက်ပေးသည့် အလေ့အကျင့်သည် ကျောက်ကပ်အတွင်းတည်ရှိနေသော အညစ်အကြေးများ၊ အဆိပ်အတောက်များကို သန့်စင်ပေးနိုင်ပေသည်။ ကျောက်ကပ်၏ ထာဝရကျန်းမာရေးကို ကူညီမှုပေးနိုင်သည်။

လက်ဖက်ရည်ကို ပုံမှန်သောက်ပေးခြင်းသည် ဦးနှောက်နှင့် နာ့ဗ်ကြောများအား လန်းဆန်းမှုရရှိစေပြီး ဦးနှောက်ဆဲလ်များ ပျက်စီးမှုကိုလည်း ကာကွယ်ပေးနိုင်ပါသည်။

မမျိုးဥကင်ဆာနှင့် လက်ဖက်ရည်ကြမ်း

မမျိုးဥကင်ဆာရောဂါခံစားရမှုကို လက်ဖက်ရည်ကြမ်းသောက်ခြင်းဖြင့် လျှော့ချပေးစေနိုင်ကြောင်းကိုလည်း ဆွီဒင်ဆေးသိပ္ပံ သုတေသနပညာရှင်များမှလည်း ထုတ်ပြန်ထားပါသည်။ တစ်နေ့တာအတွက် အနည်းဆုံး လက်ဖက်ရည်တစ်ခွက်နှင့်အထက်သောက်ပေးခြင်းဖြင့် ၄၆ ရာခိုင်နှုန်း၊ တစ်ခွက်နှုန်းသောက်ပေးခြင်းဖြင့် ၂၄ ရာခိုင်နှုန်း၊ တစ်ခွက်အောက် သောက်ပေးခြင်း (ရက်ခြားသောက်လေ့ရှိသူများ) ဖြင့် ၁၈ ရာခိုင်နှုန်း ရောဂါအန္တရာယ်နည်းပါးကြောင်းကို သိရှိရပါသည်။ 

သွေးအားနည်းရောဂါရှိသူများအနေဖြင့် နံနက်စာစားသုံးခြင်းနှင့် ညစာစားသုံးရာတွင် လက်ဖက်ခြောက်ခတ်ထားသော ရေနွေးကြမ်းသောက်ခြင်း၊ အစာစားပြီးနောက် လက်ဖက်ရည်သောက်ခြင်း၊ လက်ဖက်သုပ်စားခြင်းတို့ကို ရှောင်ကြဉ်သင့်ပါသည်။ လက်ဖက်နှင့် လက်ဖက်ရည်တို့တွင်ပါဝင်သော အဖန်ဓတ်သည် အစာခြေလမ်းကြောင်းတစ်လျှောက်တွင် ရောက်ရှိနေသော အာဟာရဓာတ်များစုပ်ယူမှုကို နှေးကွေးစေခြင်းကြောင့် ခန္ဓာကိုယ်အတွက် လိုအပ်သော အာဟာရဓာတ်များကို ဆုံးရှုံးစေနိုင်သောကြောင့်ပင်ဖြစ်သည်။

ဒါကြောင့် လက်ဖက်ရည်ကြမ်းကိုရှောင်ရှားသင့်သည့် အနေအထားမှာလည်း ရှောင်ရှားနိုင်ပြီး ကျန်းမာရေးအရ အသုံးတည့်ပုံများကြောင့်လည်း အကျိုးရှိစွာအသုံးချနိုင်ကြပါစေ။

အံ့ဖွယ်ဆေးဖက်ဝင် သဘာဝဟင်းသီးဟင်းရွက်များ ကျော်တင့်ဆွေ စာအုပ်မှကောက်နုတ်ဖော်ပြပါသည်။