ပြည်ပဝယ်လိုအား များပြားလာခြင်းကြောင့် ဝဥဈေးနှုန်းများ တစ်ဟုန်းထိုးမြင့်တက်

Photo - ရိတ်သိမ်းထားပြီးသော ဝဥများ

၂၀၁၈-၂၀၁၉ ဘဏ္ဍာနှစ်အတွင်း ပြည်ပဝယ်လိုအား များပြားလာခြင်းကြောင့် ဝဥဈေးနှုန်းများ တစ် ဟုန်ထိုးမြင့်တက်လာကြောင်း ချင်းပြည်နယ်ရှိ ဝဥစိုက်ပျိုးထုတ်လုပ်သူများအသင်းမှ သိရသည်။

“အဓိကအားဖြင့် ဝဥကို တရုတ်နိုင်ငံကို ပို့တာများတယ်။ အခုနောက်ပိုင်းကျတော့ ကိုရီးယားနိုင်ငံကပါ အဝယ်လိုက်လာတယ်။ ထိုင်းနိုင်ငံကလည်း ပစ္စည်းတွေကို မေးလာကြပြီပေါ့နော်။ ကုန်ကြမ်းလိုက် ပြည်ပကို သွားနေတာ။ အရင်နှစ်ကထက်ကို ဝယ်သူတွေလည်း ပိုလာတယ်” ဟု ချင်းပြည်နယ်၊ ဝဥ စိုက်ပျိုးထုတ်လုပ်သူများအသင်းမှ အကြံပေး ဦးဖွေးမနားက ပြောသည်။

မြန်မာနိုင်ငံတွင် ဝဥအစိုနှင့်အခြောက်ကို ကုန်ကြမ်း၊ ကုန်ချောများ ထုတ်လုပ်၍ တင်ပို့ရောင်းချနေရာ တွင်၊ ၂၀၁၈ ခုနှစ်က အစိုတစ်ပိဿာလျှင် အမြင့်ဆုံးဈေး (၁၅၀၀)ကျပ်၊ ဝဥအခြောက် တစ်ပိဿာ လျှင် (၈၅၀၀) ကျပ် ရရှိခဲ့ပြီး၊ ယခုနှစ်အတွင် ဝဥအစို တစ်ပိဿာလျှင် ကျပ်(၁၈၀၀)၊ ဝဥအခြောက် တစ်ပိဿာလျှင် (၁၀၅၀၀) ကျပ်အထိ ဈေးနှုန်းများ မြင့်တက်လာကြောင်း သိရသည်။

၂၀၁၇-၂၀၁၈ ဘဏ္ဍာနှစ်က ဈေးကွက်သို့ ဝဥပိဿာချိန် (၂၅)သိန်းဝန်းကျင် တင်ပို့ရောင်းချနိုင်ခဲ့ပြီး၊ ယခုနှစ်တွင် ဝဥပိဿာချိန် သိန်း (၃၀) ဝန်းကျင်အထိ တိုးမြှင့်တင်ပို့သွားမည်ဟု ဝဥ စိုက်ပျိုးထုတ် လုပ်သူများအသင်းမှ သိရသည်။

တိုးတိုးခိုင် (ABM)



ယခုဆောင်းပါးက သင့်အတွက် အသုံးဝင်ပါသလား?

  စကားပုံ  

"ခဝဲပွင့်တုန်း တန်ဆောင်မုန်း"