ယခုတစ်ပတ်အတွင်း စျေးနှုန်းအပြောင်းအလဲဖြစ်ပေါ်ခဲ့သည့်သီးနှံများ

(၇.၅.၂၀၁၈ မှ ၁၁.၅.၂၀၁၈)ထိ

စပါး
ပြီးခဲ့တဲ့အပတ်က ပုသိမ်စျေးကွက်မှာ စပါးစျေးကငြိမ်ပြီး ဆန်စျေးတွေတက်ခဲ့ပေမယ့် ဒီတစ်ပတ်မှာတော့ စပါးစျေးရော ဆန်စျေးပါတက်လာပါတယ်။ ဒေသအချို့ကနေ ဆန်ရော စပါးရော အဝင်နည်းလာတဲ့အတွက် စျေးကမြင့်တက်လာတာလည်း ဖြစ်ပါတယ်။ ပထမတန်းစားစပါးဖြစ်တဲ့ ဧရာဝတီပေါ်ဆန်းစပါးက တင်း ၁၀၀ ကို ၁၀၉၅၀၀၀ ကျော်ပေါက်စျေးရှိပြီး တင်း ၁၀၀ ကို ငွေကျ့ပ် ၃ သောင်းကျော် စျေးတက်လာပါတယ်။ ပေါ်ဆန်းရင်အမျိုးအစားကလည်း တင်း ၁၀၀ ကို ၉၈၁၀၀၀ ကျော်ပေါက်ပြီး ၄ သောင်းနီးပါး စျေးတက်လာပါတယ်။ ဒုတိယတန်းစားဖြစ်တဲ့ ရွှေသွယ်လေး နဲ့ဧရာမင်း အမျိုးအစားကလည်း တင်း ၁၀၀ ကို ၇၃၆၀၀၀ ပေါက်စျေးရှိပြီး တင်း ၁၀၀ ကို ၄ သောင်းခွဲ နီးပါးစျေးတက်လာပါတယ်။ သီးထပ်ရင်စပါးကတော့ တင်း ၁၀၀ ကို ၅၂၅၀၀၀ ပေါက်စျေးရှိပြီး ၁ သောင်းနီးပါးစျေးတက်လာပါတယ်။ မနောသုခနဲ့မီးကောက်တို့ကတော့ သုံးပတ်ဆက်တိုက် စျေးငြိမ်နေပြီး မနောသုခက တင်း ၁၀၀ ကို ၅၇၀၀၀၀ ကျော်၊ မီးကောက်ကတော့ တင်း ၁၀၀ ကို ၅၉၈၀၀၀ အသီးအသီးပေါက်စျေးရှိပါတယ်။

မတ်ပဲ(FAQ/RC)
မတ်ပဲကို နှစ်စဉ်တန်ချိန် တစ်သိန်းခွဲဝယ်ယူမယ်လို့ အိန္ဒိယနိုင်ငံက ပြီးခဲ့တဲ့ မတ်လ ၅ ရက်နေ့ထုတ်ပြန်လိုက်တဲ့အချိန်မှာ စျေးကွက်အတွင်း မတ်ပဲက အနည်းငယ်စျေးပြန်တက်လာခဲ့ပါတယ်။ ပြီးခဲ့တဲ့ အပတ်တွေက အိန္ဒိယနိုင်ငံကလည်း ပြည်တွင်းပဲဖူလူမှုကြောင့် ဝယ်ယူမှုလျော့နည်းခဲ့ရာမှ စျေးက ၄ သိန်းအောက်ထိလျော့ကျလာခဲ့ပါတယ်။ ထပ်ပြီး ကိုတာစနစ်နဲ့သွားဖို့အတွက်လည်း အလားအလာရှိနေပြီး အိန္ဒိယနိုင်ငံကလည်း ပဲဝယ်တဲ့အတွက် သူတို့နိုင်ငံဘက်ကသကြားကို ပြန်လည်ဝယ်ယူဖို့ကို ဆွေးနွေးမှုတွေပြုလုပ်နေတယ်လို့လည်း သိရပါတယ်။ ထပ်မံပြီး အိန္ဒိယအစိုးရက မတ်ပဲကိုအလုံးနဲအခြမ်း သီးခြားခွဲဝယ်မယ်ဆိုတဲ့ ကန့်သတ်ချက်တွေ ပါလာတဲ့အပြင် ပိုပြီးသတ်မှတ်ချက်တွေက ပြင်းထန်လာတဲ့ သဘောလည်း ရှိပါတယ်။ ဒီတစ်ပတ် ရန်ကုန်စျေးကွက်မှာတော့ မတ်ပဲက တစ်တန်ကို ၄၅၀၀၀၀ အကျော်အထိ ပြန်လည်စျေးတက်လာပါတယ်။ မုံရွာမှာတော့ မတ်ပဲက တစ်တင်းကို ၁၃၅၀၀ နဲ့ ၁၀၀၀ လောက်စျေးပြန်တက်လာသလို ပြည်ကုန်စည်ဒိုင်မှာလည်း တစ်တင်းကို ၁၄၀၀၀ နဲ့ ၈၀၀ ကျော်စျေးတက်လာ ပါတယ်။နေပြည်တော်မှာတော့ သုံးတင်းဝင်တစ်အိတ်ကို ၄၀၀၀၀ နဲ့စျေးငြိမ်နေခဲ့ပါတယ်။ မတ်ပဲက ပြီးခဲ့တဲ့ ၂၀၁၇ ခုနှစ် မေလ ပိုင်းမှာ တစ်တန်ကို ၉၇၀၀၀၀ ကျော် စျေးရရှိခဲ့ပါတယ်။

ပဲစင်းငုံနီ
ပြီးခဲ့တဲ့အပတ်က ပဲစင်းငုံနီစိုက်တဲ့ တောင်သူတွေကို ပဲကုန်သည်များအသင်းက ဒေသနဲ့ကိုက်ညီမယ့် စီးပွားဖြစ် ဆီထွက်သီးနှံတွေ၊ တစ်ခြားပဲအမျိုးအစားတွေကိုသာ စိုက်ပျိုးဖို့အတွက် တိုက်တွန်းမှုတွေ ပြုလုပ်လိုက်တဲ့အချိန်မှာ ပဲစင်းငုံစိုက်တဲ့ တောင်သူတွေအပြင် ပဲစင်းငုံလှောင်ထားတဲ့ကုန်သည်တွေ မေးခွန်းထုတ်မှုများစွာ ဖြစ်ခဲ့ပြီး အလွန်ထိတ်လန့်သွားတဲ့အခြေအနေလည်း ဖြစ်သွားခဲ့ပါတယ်။ ဒါပေမယ့် ဒီတစ်ပတ်မှာတော့ အိန္ဒိယက ပဲစင်းငုံနီကို တန်ချိန် ၂ သိန်းထပ်ပြီး တင်ပို့ခွင့်ပြုလိုက်တဲ့အချိန်မှာ စျေးကွက်အတွင်း စျေးအနည်းငယ်ပြန်တက်လာခဲ့သလို တောင်သူတော်တော်များများလည်း သက်သာရာရတဲ့ အခြေအနေ ဖြစ်သွားပါတယ်။ ဒါပေမယ့် အိန္ဒိယအစိုးရက ပဲစင်းငုံနီကို ပဲအလုံးအပြင် ပဲအခြမ်းပါ တင်ပို့ရမယ့်ဆိုတဲ့ ကန့်သတ်ချက်အချို့ကြောင့် ပဲကုန်သည်အချို့ကတော့ နောက်ဆက်တွဲ ခွဲခြမ်းတဲ့စက်လိုအပ်ချက်တွေကို စိုးရိမ်မှုတွေ ရှိလာပါတယ်။ ပဲခြမ်းတွေ ကိုတော့ အိန္ဒိယနိုင်ငံအပြင် အခြားတရုတ်နိုင်ငံ၊ ယူအေအီးနိုင်ငံတို့ကလည်း ဝယ်ယူတာဖြစ်တဲ့အတွက် စျေးကွက်က ပျက်သွားလောက်တဲ့အခြေအနေတော့ မရှိတော့ဘူးလို့လည်း ကုန်သည် အချို့သုံးသပ်ထားပါတယ်။ အဆိုပါ ထုတ်ပြန်ချက် မတည်ငြိမ်မှုတွေကြောင့် ရန်ကုန်စျေးကွက်မှာ ပဲစင်းငုံနီက ၃ ရက်လောက်စျေးမဖွင့်ခဲ့ဘဲ စျေးပြန်ဖွင့်တဲ့ အချိန်မှာတော့ တစ်တန်ကို ၃၇၇၀၀၀ နဲ့ စျေးပြန်ဖွင့်ခဲ့ပါတယ်။ မုံရွာကုန်စည်ဒိုင်မှာတော့ တစ်တင်းကို ၉၀၀၀ နဲ့စျေးအနည်းပြန်တက်ခဲ့ပါတယ်။ ပခုက္ကူကုန်စည်ဒိုငမှာ ပဲအဟောင်းသာ တစ်တင်းကို ၁၁၀၀၀ ကျော်နဲ့ ပေါက်စျေးရှိပြီး ပဲအသစ်ကတော့ စျေးမဖွင့်တာကို တွေ့ရပါတယ်။ ပဲစင်းစုံနီကတော့ ပြီးခဲ့တဲ့ နှစ် ၂၀၁၇ ကာလတူအခြေအနေမှာ တစ်တန်ကို ၆၇၀၀၀၀ ကျော်စျေးရရှိခဲ့ပါတယ်။

နှမ်းနက်

နှမ်းနက်ကတော့ လက်ရှိမှာ တရုတ်နိုင်ငံက အဝယ်လိုက်နေတဲ့အတွက်ကြောင့် စျေးတက်နေပါတယ်။ တစ်ခြားနှမ်းအမျိုးအစားတွေကလည်း စျေးကွက်ထဲကို ဝင်တစ်ရက် မဝင်တစ်ရက် ဖြစ်တဲ့အတွက်ကြောင့် နှမ်းနက်က စျေးပိုရပြီး အရောင်းအဝယ်ကလည်းသွက်နေပါတယ်။ ပြည်ကုန်စည်ဒိုင်မှာ နှမ်းတစ်အိတ်ကို ၁၀၀၀၀၀ ကျော် စျေးရရှိပြီး ၁၀၀၀၀ ကျော်စျေးတက်လာပါတယ်။ ပခုက္ကူကုန်စည်ဒိုင်မှာလည်း တစ်အိတ်ကို ၁၀၂၀၀၀ ကျော်ရှိပြီး ၂၀၀၀ ကျော်စျေးတက်လာပါတယ်။ နေပြည်တော်ကုန်စည်ဒိုင်မှာလည်း တစ်အိတ်ကို ၁၂၀၀၀၀ ရှိပြီး တစ်အိတ်ကို ၅၀၀၀ စျေးတက်လာပါတယ်။ မန္တလေးကုန်စည်ဒိုင်မှာလည်း တစ်အိတ်ကို ၁၀၅၀၀၀ ကနေ ၁၀၈၀၀၀ အထိ စျေးရရှိပြီး ၃၀၀၀ နီးပါးစျေးတက်လာပါတယ်။

နှမ်းဖြူ
လက်ရှိစျေးကွက်အတွင်း နှမ်းဖြူက အဝင်နည်းလာတဲ့အတွက် စျေးကောင်းကလည်း ရရှိနေပါတယ်။ ပြည်တွင်းစားသုံးမှုအပြင် ပြည်ပကိုလည်း တင်ပို့နေတာဖြစ်တဲ့အတွက် လက်ရှိအချိန်ထိ အကျစျေးနဲ့ မရှိသေးပဲ စျေးကွက်အတွင်း စျေးမာနေခဲ့ပါတယ်။ မုံရွာကုန်စည်ဒိုင်မှာတော့ နှမ်းဖြူက ဒီတစ်ပတ်မှာ စျေးမဖွင့်ခဲ့ပါဘူး။ မန္တလေးကုန်စည်ဒိုင်မှာတော့ တစ်အိတ်ကို ၁၂၅၀၀၀ ကနေ ၁၃၅၀၀၀ အထိ ပေါက်စျေးရှိပါတယ်။

၀တ်ရည်မွန်(AMIA)

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...