မိုးနှမ်းစိုက်တောင်သူများ နှမ်းရိုးမဲရောဂါအပြင် မိုးဦးခေါင်၍ အပူချိန်လွန်ကဲမှုကြောင့် ဆုံးရှုံးနစ်နာမှုများဖြစ်ပေါ်

    စစ်တောင်းမြစ် အရှေ့ဘက်ကမ်းတစ်လျှောက်ရှိ နှမ်းသီးနှံများ နှမ်းရိုးမဲရောဂါနှင့် အပူချိန်ပြင်းမှုကြောင့် ဆိုးရွားစွာ အထွက်နှုန်းထိခိုက်ခဲ့သည်။ တချို့ တံစဉ်လွတ်ကြသည်။

နှမ်းကို အဓိကစိုက်ကြတာ။ ဒီဘက်က ဘာဆေးမှမသုံးဘဲ နှမ်းဖြစ်တယ်။ ဆေးမသုံးပဲတောင် ၁ ဧကကို ၆ တင်းကနေ ၈ တင်းထိက ပုံမှန်အထွက်ကောင်းပဲ။ ဒီနှစ် မိုးနှမ်းကတော့ ရိုးမဲရောဂါကျသွားတာ ဘာဆေးမှ မမီလိုက်ဘူး။ အကုန်နီးပါးဆုံးရှုံးလိုက်ရတာ။ အပင်ငယ်ငယ် ရိုးမဲကျရင်တော့ ဆေးဖျန်းလို့ရသေးတယ်။ ခုက အပွင့်တုံးချိန်လောက်မှ ရိုးမဲကျတော့ အပင်အရပ်က တအားမြင့်နေပြီ။ ဆေးဖျန်းလို့ မရေတာ့ဘူး။အဲါမှာ ပိုဆိုးသွားတာပဲ။

ဟု စစ်တောက်မြစ်အရှေ့ကမ်း ဆွာမြို့နယ် ကတို့ဆိပ်ကျေးရွာမှ တောင်သူဦးမောင်ဆန်းမှ ပြောသည်။ 

    နှမ်းရိုးမဲမကျသော တချို့အခင်းများမှာ သဲနုန်းမြေဖြစ်သောကြောင့် မိုးဦးခေါင်၍ အပူချိန်ပြင်းသောအခါ နှမ်းပင်ငယ်များမှာ ရေပြတ်၍ အပူရှော့ရိုက်ကာ အပင်ကြီးထွားနှုန်းနှေးခဲ့သည်။ တစ်လခွဲကျော်ချိန်မှ မိုးရွာလာသောအခါ ပေါင်းမြက်များလွှမ်းမိုးမှု ခံရသည်။ 

ရိုးမဲမကျတဲ့အခင်းတွေကျတော့လည်း.. အဲ့တုန်းက အပူချိန် တအားပြင်းတယ်။ မိုးဦးခေါင်လိုက်တော့ ရေကလည်းလုံးဝမရတော့ မိုးကြိုရေသွင်းလိုက်တာပေါ့။ အဲ့ချိန်ကျတော့ အပင်ကငယ်သေး ပေါင်းမြက်လည်းမရှိသေးဘူး။ ဒါပေမယ့် နေပူမိပြီး အပင်က ဝပ်နေတာ ထင်သလောက်မကြီးလာတော့ဘူး။ တစ်လခွဲလောက်မှ မိုးလေးဆက်တိုက်လည်းရွာလာရော ပေါင်းမြက်က တဟုန်ထိုးထလာတော့တာပဲ။ အဲ့တော့ နေပူမိပြီး ဝပ်နေတဲ့နှမ်းပင်တွေကို ပေါင်းမြက်က အုပ်သွားတော့တာပဲဟေ။ အဲ့တည်းက ပေါင်းမြက်ကိုမနိုင်တော့ဘဲ နှမ်းပင်ကကျန်ခဲ့ပြီး မအောင်တော့ဘူးလေ။ တချို့ယာခင်းတွေ ရိတ်တောင်မရိတ်ရတော့ဘူး။ ဦးလေး နှမ်း ၆ ဧကလုပ်တာ ၁၀ တင်းတောင် ပြည့်ပြည့်မရတော့ဘူး။

ဟု တောင်သူဦးမောင်ဆန်းမှ ဆက်လက်ပြောသည်။ 

    ယခုနှစ်တွင် နှမ်းဈေးကွက်မှာ ၁၅ ပိဿာ ကို  ၄၅၀၀၀ မှ ၆၅၀၀၀ ကျပ်အထိ ပုံမှန်ပေါက်ဈေးရှိခဲ့သော်လည်း နှမ်းစိုက်တောင်သူအများစု သီးနှံဆုံးရှုံးမှုများကြောင့် ယခုနှစ်တွင် များစွာဆုံးရှံးနစ်နာခဲ့သည်။ 

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)