အနာဂတ်လူငယ်တွေရဲ့ စိတ်ဝင်စားမှုစာရင်းထဲပါလာတဲ့ အော်ဂဲနစ်ခြံလုပ်ငန်း

     အော်ဂဲနစ်ရဲ့ ကောင်းကျိုးတွေကို သိလာပြီးတဲ့နောက်မှာ စားသုံးသူရဲ့ ရွေးချယ်မှုတွေက အရည်အသွေးဘက်ကို တဖြည်းဖြည်းရောက်ရှိလာပါတယ်။ စိုက်ပျိုးရေးရဲ့ တစ်ခေတ်က အော်ဂဲနစ်ကိုဦးတည်လာတယ်လို့ နိုင်ငံတော်အတိုင်ပင်ခံ ကိုယ်တိုင်ကအစ ပြောကြားခဲ့တာဟာ အော်ဂဲနစ်စိုက်ပျိုးရေးသမားတွေရဲ့ မျှော်လင့်ချက်တွေကို ပိုခိုင်မာစေပါတယ်။

     အော်ဂဲနစ်အရွေ့ကို လွန်ခဲ့တဲ့ဆယ်စုနှစ်လောက်တည်းက လှုပ်ရှားခဲ့ကြတာဖြစ်ပြီး အခုချိန်မှာတော့ အသီးအပွင့်တစ်ချို့ကို ခံစားနေကြရပြီး ဖြစ်ပါတယ်။ စျေးကွက်ထဲမှာ အော်ဂဲနစ် ပစ္စည်းတွေရဲ့ အရေးပါမှုကို အားလုံးပဲ မြင်တွေ့နိုင်ပြီးဖြစ်ပါတယ်။ ဒီလိုဖြစ်အောင် ကြိုးစားပြသွားကြတဲ့ စီနီယာတွေက ယနေ့ခတ် လူငယ်လေးတွေရဲ့ အိမ်မက်တွေကို ဖန်တီးပေးပါတယ်။ 

အော်ဂဲနစ်ခြံတစ်ခုတည်ဆောက်ဖို့ ဘာတွေလိုအပ်မလဲ?

     အော်ဂဲနစ်ခြံလုပ်ငန်းတစ်ခုပြုလုပ်တဲ့အခါမှာ သီးနှံစိုက်ပျိုးခြင်းထက်ပိုတဲ့ အလေးထားမှုတွေနဲ့ပြုလုပ်ကြပါတယ်။ စားသုံးသူတစ်ယောက်ချင်းစီအတွက် စဉ်းစားပေးပြီး၊ ဂေဟစနစ်မှာပါဝင်တဲ့ သက်ရှိတိုင်းကိုပါ ထည့်သွင်းအသိအမှတ်ပြုပေးတဲ့ အတ္တဟိတ ပရဟိတ ပေါင်းစပ်ထားတဲ့ လုပ်ငန်းတစ်ခုဖြစ်ပါတယ်။ 

     ဂေဟစနစ်ကြီး တစ်ခုလုံးအတွက် တွေးပေးနိုင်တဲ့ စိတ်ထားမျိုးက အော်ဂဲနစ်ခြံတစ်ခုတည်ထောင်ဖို့ အခြေခံလိုအပ်တဲ့အရာ ဖြစ်ပါတယ်။ ဒီလိုစိတ်မျိုး နှလုံးသွင်းနိုင်ပြီဆိုရင်တော့ သင်က အော်ဂဲနစ်ခြံတစ်ခုကို စနိုင်ပါပြီ။

-မှော်ဆန်တဲ့လုပ်ငန်း

     အော်ဂဲနစ်စိုက်ပျိုးရေးကို လုပ်ဆောင်တဲ့အခါမှာ ကျွန်တော်တို့ အဓိက အားထားတာကတော့ မြေကြီးထဲက မမြင်နိုင်တဲ့သက်ရှိတွေဖြစ်ပါတယ်။ အကျိုးပြုသက်ရှိတွေ ပျော်အောင်ထားမယ်။ သူတို့အတွက် နေစရာ စားစရာပေးမယ်။သူတို့ကလည်း ကျွန်တော်တို့သီးနှံတွေအတွက်လည်း ကောင်းမွန်တဲ့အရည်အသွေးတွေရအောင်လုပ်ပေးကြတယ်။ ဒီလို မမြင်ရတဲ့ သက်ရှိတွေနဲ့ ဆက်သွယ်ပြီး လုပ်ဆောင်ရတဲ့ မှော်ဝင်တဲ့ communicationတစ်ခုကိုလည်း လုပ်ရမှာဖြစ်ပါတယ်။

-ကျန်းမာစေတဲ့ ပတ်ဝန်းကျင်

      သဘာဝနည်းလမ်းတွေနဲ့ ပြုလုပ်တာဖြစ်လို့ နေ့စဉ်ဘဝအတွက် အသက်ရှုရတဲ့ လေကအစ သင့်ကျန်းမာရေးအတွက်အထောက်အကူပြုစေပါတယ်။ အော်ဂဲနစ်ခြံလုပ်ငန်းက ကျွန်တော်တို့ရဲ့ လုပ်နိုင်စွမ်းတွေကို ကောင်းကောင်းအသုံးချရပါတယ်။ မြေသြဇာတွေကိုယ်တိုင်လုပ်မယ်။ ပြန်လည် အသုံးပြုသင့်တာတွေစုမယ်။ ခြံထဲက ထွက်တဲ့ ရွက်ကြွေတစ်ရွက်ကစလို့ အလကားမဖြစ်စေရပါဘူး။ ဒီလိုအချိန်ပြည့်ကိုယ်လက်လှုပ်ရှားမှုလုပ်နိုင်မယ့် လုပ်ငန်းတစ်ခုလည်းဖြစ်ပါတယ်။ ဂေဟစနစ်နဲ့ လိုက်လျောညီတွေဖြစ်အောင်ထားရတာဖြစ်လို့ ခြံထဲမှာရေကန်လေးတွေရှိမယ်၊ ပန်းပင်တွေရှိမယ် ပျားပိတုန်းတွေရှိမယ်။ ဒါတွေက သင်ငယ်ငယ်က နားထောင်ခဲ့ရတဲ့ အိပ်ယာဝင်ပုံပြင်တွေထဲကလို ကြည်နူးစရာစိတ်ခံစားမှုတွေကို ရရှိမှာပဲဖြစ်ပါတယ်။

     ဒီလို ဒီဇိုင်းကာလာ အနေအထားနဲ့ အော်ဂဲနစ်ခြံလေးတစ်ခုလုပ်ပြီး ဘဝကိုအေးအေးဆေးဆေးဖြတ်သန်းချင်ကြတဲ့ လူငယ်တွေရှိလားဗျ။အော်ဂဲနစ်ခြံတစ်ခုလုပ်ဖို့ စိတ်လဲပါတယ်။အားပေးမယ့်လက်တွဲဖော်လည်းရှိတယ်ဆိုရင်တော့ မနက်ဖြန်ပဲ စလိုက်ပါတော့။ ( စာခြွင်း- တစ်ယောက်ထဲ သမားတွေလည်း အားမငယ်ပါနဲ့ ဘော်ဒါတွေနဲ့ အော်ဂဲနစ်ခြံလေးတစ်ခု စနိုင်ပါတယ်)

ထွန်းရာဇာ

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကိုထည့်ပေးပါရန် မေတ္တာရပ်ခံအပ်ပါသည်။