ရခိုင်၊ ကရင်၊ ပဲခူး၊ ဧရာဝတီနှင့် ရန်ကုန်တို့တွင် စက်တင်ဘာ ၂၈ မှ ၃၀အတွင်း မိုးသည်းထန်စွာ ရွာသွန်းနိုင်

စက်တင်ဘာ ၂၈ ရက် နံနက် ၈ နာရီ JTWC ၏ သုံးသပ်ချက်များ၊ ထိုင်းမိုးလေဝသဌာန (TMD) ၏ Weather Advisory No. 18 (234/2026)၊ 18UTC Weather Chart၊ ဂြိုဟ်တုဓာတ်ပုံများ နှင့် Meteoblue ICON Model ၏ စက်တင်ဘာ ၂၈ မှ အောက်တိုဘာ ၄ ရက်အထိ နေ့စဉ် မိုးရေချိန်ပြမြေပုံများ ကို အခြေခံ၍ သုံးသပ်ထားခြင်းဖြစ်သည်။

၁။ INVEST-92W ရွေ့လျားမှုနှင့် အားကောင်းနိုင်ခြေ သုံးသပ်ချက်

လက်ရှိအခြေအနေနှင့် ရွေ့လျားမှု - ထိုင်းမိုးလေဝသဌာန၏ ထုတ်ပြန်ချက်နှင့် Weather Chart များအရ မုတ္တမပင်လယ်ကွေ့ (Gulf of Martaban) အတွင်း တည်ရှိနေသော လေဖိအားနည်းဆဲလ် (Low Pressure Cell) သည် မြန်မာနိုင်ငံ တောင်ပိုင်းနှင့် အလယ်ပိုင်းဒေသများဘက်သို့ ကုန်းတွင်းပိုင်းအတိုင်း အနောက်မြောက်/မြောက်-အနောက်မြောက်ဘက်သို့ ဦးတည်ရွေ့လျားနိုင်ပါသည်။

မုတ်သုံလေနှင့် ပေါင်းစပ်မှု - ကပ္ပလီပင်လယ်နှင့် ဘင်္ဂလားပင်လယ်ကွေ့ တောင်ပိုင်းတို့တွင် အရှိန်ကောင်းနေဆဲဖြစ်သော အနောက်တောင်မုတ်သုံလေ (Strong Southwest Monsoon) နှင့် အဆိုပါ အနိမ့်ဖိအားစနစ်တို့ ပေါင်းစပ်လိုက်ပါသဖြင့် မြန်မာနိုင်ငံ တောင်ပိုင်း၊ မြစ်ဝကျွန်းပေါ်နှင့် အလယ်ပိုင်းဒေသများတွင် မိုးတိမ်တန်းများ အလွန်အားကောင်းစွာ ဖြစ်ထွန်းလျက်ရှိပါသည်။

၂။ တိုင်းဒေသကြီး/ပြည်နယ်အလိုက် (၇) ရက်စာ နေ့စဉ် မိုးရေချိန်နှင့် စုစုပေါင်း ခန့်မှန်းချက် (Sorting ပြုလုပ်ထားသော ဇယား)

Meteoblue ICON Model ၏ နေ့စဉ်မိုးရေချိန် ခန့်မှန်းချက်များ အရ စက်တင်ဘာ ၂၈ မှ အောက်တိုဘာ ၄ ရက်အထိ ၇ ရက်စာ မိုးရေချိန် (mm) များကို စုစုပေါင်း မိုးရေချိန် အများမှ အနည်းသို့ Sorting ပြုလုပ်၍ ဖော်ပြထားပါသည်။

၃။ မိုးရေချိန် အနည်း/အများ ဆန်းစစ်သုံးသပ်ချက်

မိုးအများဆုံး တည်ရှိမည့် ဒေသများ (၃၀၀ mm အထက်) - စက်တင်ဘာ ၂၈ မှ ၃၀ အထိ (အထူးသတိပြုရန်ကာလ) INVEST-92W ၏ အရှိန်ကြောင့် ရခိုင်ပြည်နယ်၊ ကရင်ပြည်နယ်၊ ပဲခူးတိုင်း၊ ဧရာဝတီတိုင်းနှင့် ရန်ကုန်တိုင်း တို့တွင် ပထမ ၃ ရက်အတွင်း နေရာကွက်၍ မိုးကြီးခြင်း/အလွန်ကြီးခြင်း (၂၄ နာရီ မိုးရေချိန် 100 mm မှ 150 mm အထိ) ရွာသွန်းရရှိနိုင်ပါသည်။ စုစုပေါင်း မိုးရေချိန် 300 mm မှ 500 mm အထက်အထိ ရရှိနိုင်ပါသည်။

မိုးအသင့်အတင့်မှ များနိုင်သည့် ဒေသများ (၂၀၀ - ၃၀၀ mm) - မွန်ပြည်နယ်၊ မကွေးတိုင်း၊ တနင်္သာရီတိုင်း၊ ကယားပြည်နယ်၊ ချင်းပြည်နယ်နှင့် စစ်ကိုင်းတိုင်း တို့တွင် လေပွေလှိုင်းစနစ် အနောက်မြောက်ဘက်သို့ ရွေ့လျားမှုအတိုင်း စက်တင်ဘာ ၂၉ နှင့် ၃၀ ရက်များတွင် မိုးအားကောင်းနေမည်ဖြစ်ပါသည်။

မိုးလျော့နည်းမည့် ကာလ (အောက်တိုဘာ ၁ မှ ၄ ရက်) - အောက်တိုဘာ ၁ ရက်မှစ၍ အနိမ့်ဖိအားစနစ် အားပျော့ပျောက်ကွယ်သွားမည်ဖြစ်သဖြင့် မိုးရွာသွန်းမှု သိသိသာသာ လျော့ကျသွားမည်ဖြစ်ပြီး၊ ပုံမှန် မုတ်သုံမိုးအဖြစ် ဆက်လက်ရွာသွန်းရရှိနိုင်ပါသည်။

 ၄။ မြန်မာနိုင်ငံတောင်ပိုင်းနှင့် တိုင်း/ပြည်နယ် (၇) ခုအတွင်း မြို့နယ်များအလိုက် မိုးလေဝသခန့်မှန်းချက်

(၁) ပဲခူးတိုင်းဒေသကြီး (ပဲခူး၊ တောင်ငူ၊ ပြည်၊ သာယာဝတီ ခရိုင်များ)

စက်တင်ဘာ ၂၈ - ၂၉ - အရှေ့ဘက်တောင်တန်းများနှင့် ထိစပ်နေသော မြို့နယ်များ (တောင်ငူ၊ ရေတာရှည်၊ ကျောက်တံခါး၊ ညောင်လေးပင်၊ ပဲခူး) နှင့် အနောက်ဘက် (သာယာဝတီ၊ တောင်တွင်းကြီး-ပြည်လမ်းပိုင်း) တို့တွင် မိုးသည်းထန်စွာ ရွာသွန်းနိုင်ပါသည်။ မိုးရေချိန် စုစုပေါင်း 300 mm ကျော်နိုင်သဖြင့် စစ်တောင်းမြစ်နှင့် ဇမရီချောင်းရေ လျှံတက်ခြင်း၊ ရေကြီးရေလျှံမှုများ ဖြစ်ပေါ်နိုင်ပါသည်။

စက်တင်ဘာ ၃၀ - အောက်တိုဘာ ၄ - မိုးအသင့်အတင့်သို့ လျော့ကျသွားမည်ဖြစ်ပါသည်။

(၂) ရန်ကုန်တိုင်းဒေသကြီး (ရန်ကုန်မြောက်ပိုင်း၊ တောင်ပိုင်း၊ အရှေ့/အနောက် ခရိုင်များ)

စက်တင်ဘာ ၂၈ - ၂၉ - တိုင်းတစ်ခုလုံးတွင် လေပြင်းများတိုက်ခတ်ခြင်းနှင့်အတူ မိုးသည်းထန်စွာရွာသွန်းနိုင်ပြီး၊ မြေနိမ့်ပိုင်းမြို့နယ်များ (လှိုင်သာယာ၊ ရွှေပြည်သာ၊ ဒလ၊ မင်္ဂလာဒုံ၊ မှော်ဘီ) တို့တွင် လမ်းကြောင်းရေလျှံမှုနှင့် ရေဝပ်မှုများ ဖြစ်ပေါ်နိုင်ပါသည်။

စက်တင်ဘာ ၃၀ မှစ၍ မိုးရွာသွန်းမှု လျော့ကျသွားပါမည်။

 (၃) ဧရာဝတီတိုင်းဒေသကြီး (ပုသိမ်၊ ဟင်္သာတ၊ မအူပင်၊ မြောင်းမြ၊ ဖျာပုံ)

စက်တင်ဘာ ၂၈ - ၂၉  မုတ္တမကွေ့/မြစ်ဝကျွန်းပေါ်ကမ်းရိုးတန်းနှင့် ထိစပ်နေသော မြစ်ဝကျွန်းပေါ်မြို့နယ်များ (ဖျာပုံ၊ ဘိုကလေး၊ လပွတ္တာ၊ မအူပင်၊ ပုသိမ်) နှင့် အနောက်ရိုးမအနီး (ဟင်္သာတ၊ ကြံခင်း) တို့တွင် မိုးကြီးပြီး ကမ်းလွန်ပင်လယ်ပြင်တွင် လှိုင်းကြီးနိုင်ပါသည်။

စက်တင်ဘာ ၃၀ မှစ၍: မိုးရွာသွန်းမှု ပုံမှန်အဆင့်သို့ ပြန်လည်လျော့ကျပါမည်။

(၄) ကရင်ပြည်နယ် (ဖားအံ၊ ကော့ကရိတ်၊ မြဝတီ၊ ပလိုင်၊ သံတောင်ကြီး)စက်တင်ဘာ ၂၈ - ၂၉ - INVEST-92W တိုက်ရိုက်ဖြတ်သန်းရာ လမ်းကြောင်းနှင့် နီးကပ်သဖြင့် သံတောင်ကြီး၊ ဖားအံ၊ မြဝတီ၊ ကော့ကရိတ် တို့တွင် အလွန်မိုးကြီးနိုင်ပါသည် (100-150 mm/day) ။ သံလွင်မြစ်နှင့် သောင်းရင်းမြစ်ရေ စိုးရိမ်ရေမှတ်အထက် ရောက်ရှိနိုင်ပြီး တောင်ပြိုမှုနှင့် လျှိုရေလျှံမှုကို အထူးသတိပြုရပါမည်။

(၅) မွန်ပြည်နယ် (မော်လမြိုင်၊ သထုံ၊ ရေး၊ ကျိုက္ခမီ၊ ဘီးလင်း)

စက်တင်ဘာ ၂၈ - ၂၉ - ပင်လယ်ကမ်းရိုးတန်းတစ်လျှောက် လေပြင်းတိုက်ခတ်ပြီး မိုးကြီးမည်ဖြစ်ပါသည်။ ဘီးလင်း၊ သထုံ၊ မော်လမြိုင် တို့တွင် ဘီးလင်းမြစ်ရေလျှံတက်ခြင်းနှင့် ရေဘေးအန္တရာယ် ရှိပါသည်။

စက်တင်ဘာ ၃၀ - အောက်တိုဘာ ၄ - မိုးပါးသွားမည်ဖြစ်ပါသည်။

(၆) ကယားပြည်နယ် (လွိုင်ကော်၊ ဒီးမောဆို၊ ဖားဆောင်း၊ မဲစဲ့)

စက်တင်ဘာ ၂၈ - ၃၀ - ပဲခူးရိုးမနှင့် ကရင်တောင်တန်းများကို ကျော်လွန်လာသော မိုးတိမ်တန်းများကြောင့် ဖားဆောင်း၊ ဒီးမောဆို၊ လွိုင်ကော် တို့တွင် မိုးအသင့်အတင့်မှ သည်းထန်စွာ ရွာသွန်းနိုင်ပါသည်။ ဘီလူးချောင်းနှင့် သံလွင်မြစ်ကြောင်းတစ်လျှောက် ရေမြင့်တက်နိုင်ပါသည်။

(၇) တနင်္သာရီတိုင်းဒေသကြီး (ထားဝယ်၊ မြိတ်၊ ကော့သောင်း)

စက်တင်ဘာ ၂၈ - ၂၉ - မုတ်သုံလေ အားကောင်းမှုကြောင့် မြောက်ပိုင်း (ထားဝယ်၊ ရေဖြူ) တွင် မိုးပိုမိုရွာသွန်းနိုင်ပြီး တောင်ပိုင်း (မြိတ်၊ ကော့သောင်း) တို့တွင် မိုးအသင့်အတင့် ရွာသွန်းမည်ဖြစ်ပါသည်။

ပင်လယ်ပြင်သတိပေးချက် - ကမ်းလွန်ပင်လယ်ပြင်တွင် လှိုင်းအမြင့် ၈ ပေ မှ ၁၀ ပေခန့်အထိ မြင့်တက်နိုင်သဖြင့် ရေကြောင်းသွားလာရေး သတိပြုရန် လိုအပ်ပါသည်။

မိုးလေဝသပညာရှင် ဆရာဦးဝင်းနိုင်၏ ခွင့်ပြုချက်ဖြင့် ပြန်လည်ဖော်ပြသော သတင်းဖြစ်သည်။