ဩစတြေးလျ ပဲတီစိမ်း ကွန်တိန်နာ ၁၀ လုံးကို တရုတ် ငြင်းပယ်လိုက်သဖြင့် တောင်သူများ ပေါင်းသတ်ဆေး အသုံးမပြုရန် စဉ်းစားလာကြ

ငြင်းပယ်ခံရသည့် အကြောင်းရင်း

ကွင်းစလန်း (Queensland) ပြည်နယ်မှ တင်ပို့သော ပဲတီစိမ်းများတွင် Glyphosate (ပေါင်းသတ်ဆေး) ဓာတ်ကြွင်းပါဝင်မှုသည် ခွင့်ပြုထားသည့် ပမာဏထက် ၅ ဆခန့် ပိုမိုများပြားနေကြောင်း စစ်ဆေးတွေ့ရှိခဲ့သဖြင့် တရုတ်နိုင်ငံက ကွန်တိန်နာ (၁၀) လုံးကို လက်ခံရန် ငြင်းပယ်လိုက်သည်။ ဩစတြေးလျရှိ ပဲတီစိမ်းစိုက်ခင်းများ၏ ၉၅ ရာခိုင်နှုန်းခန့်ကို ရိတ်သိမ်းချိန်မတိုင်မီ အခြောက်မြန်စေရန်အတွက် အဆိုပါ Glyphosate ပေါင်းသတ်ဆေးကို အသုံးပြုလေ့ရှိကြသည်။

စိုက်ပျိုးရေးပညာရှင် Paul McIntosh ၏ အဆိုအရ စိုက်ခင်းတစ်ခုလုံး၏ ၉၀ ရာခိုင်နှုန်းကို ဆေးညွှန်းအတိုင်း မှန်ကန်စွာ ဖျန်းသော်လည်း၊ ကျန် ၁၀ ရာခိုင်နှုန်းမှာ စိမ်းနေသေးသည့် အပင်များက ဆေးကို ပိုမိုစုပ်ယူမိတတ်သဖြင့် ရည်ရွယ်ချက်မရှိဘဲ ဓာတ်ကြွင်းကန့်သတ်ချက် (MRL) ကျော်လွန်သွားနိုင်သည့် အန္တရာယ်ရှိကြောင်း သိရသည်။

တရုတ်ဈေးကွက်၏ တင်းကျပ်လာမှု

ယခုနှစ် (၂၀၂၆) တွင် ဩစတြေးလျ ပဲတီစိမ်း တန်ချိန် ၁ သိန်း မှ ၁.၂ သိန်းအထိ အထွက်တိုးရန်ရှိပြီး အများစုကို တရုတ်နိုင်ငံသို့ တင်ပို့ရသည်။ တရုတ်အာဏာပိုင်များသည် ဓာတ်ကြွင်းကန့်သတ်ချက် (MRL) များကို ယခင်ကတည်းက ပြဋ္ဌာန်းထားသော်လည်း ယခုအခါ ပိုမိုတင်းကျပ်စွာ စစ်ဆေးအရေးယူလာခြင်း ဖြစ်သည်။

ပေါင်းသတ်ဆေး အစားထိုး "Swathing" နည်းလမ်းသစ် (ရိတ်သိမ်းပြီး စိုက်ခင်းထဲ အတန်းလိုက် နေလှမ်းအခြောက်ခံသောနည်းစနစ်)

တရုတ်၏ တင်းကျပ်မှုများကြောင့် စိုက်ပျိုးသူများနှင့် ပို့ကုန်လုပ်ငန်းရှင်များသည် ဓာတုဆေးသုံးမည့်အစား "Swathing" ဟုခေါ်သော စက်ဖြင့်ရိတ်သိမ်းပြီး အတန်းလိုက်ချကာ သဘာဝအတိုင်း အခြောက်ခံသည့် နည်းလမ်းကို ပြောင်းလဲအသုံးပြုရန် စမ်းသပ်လာကြသည်။ ဤနည်းလမ်းသည် ၃ ရက်မှ ၅ ရက်အတွင်း အခြောက်ခံနိုင်ပြီး ခြွေလှေ့ရန် အသင့်ဖြစ်စေသည်။

ကြုံတွေ့ရသည့် အခက်အခဲများ

• ဓာတုဆေးလွတ် (Glyphosate-free) ပဲတီစိမ်းများက ဈေးပိုရသော်လည်း Swathing နည်းလမ်းသည် တောင်သူတိုင်းအတွက် အဆင်မပြေနိုင်ပါ။

• ဤနည်းလမ်းကို အသုံးပြုရန်အတွက် မြေပြင်ညီညာပြီး မာကျောရန် လိုအပ်ပါသည်။

• မြေပျော့များ၊ ကျောက်ဆောင်များ နှင့် ကုန်းစောင်းများရှိသည့် အချို့သော စိုက်ခင်းများတွင် စက်ယန္တရားများ ဝင်ရောက်ရန် မဖြစ်နိုင်ပေ။

• ထို့ပြင် အဆိုပါ အထူးပြုစက်ယန္တရားများအတွက် ကုန်ကျစရိတ်မှာလည်း ကြီးမားလှပါသည်။

ရှေ့အနာဂတ် အလားအလာ

အခက်အခဲအချို့ ရှိသော်လည်း ကမ္ဘာတစ်ဝန်းတွင် ဓာတုဆေးကြွင်းဆိုင်ရာ ကန့်သတ်ချက်များ ပိုမိုတင်းကျပ်လာနေသဖြင့် Swathing နည်းလမ်းသည် အနာဂတ်အတွက် မဖြစ်မနေ ရွေးချယ်ရမည့် လမ်းကြောင်းဖြစ်လာနိုင်ကြောင်း တောင်သူအချို့က သုံးသပ်ကြသည်။ ဆေးကြွင်းများပြားမှုကြောင့် ပို့ကုန်များ ငြင်းပယ်ခံရပါက ဖြစ်ပေါ်လာမည့် ဆုံးရှုံးမှုသည် စက်ပစ္စည်း ဝယ်ယူရသည့် ကုန်ကျစရိတ်ထက် များစွာပိုမိုကြီးမားပြီး၊ လယ်သမားများသာ တိုက်ရိုက်နစ်နာမည်ဖြစ်ကြောင်း သတင်းဆောင်းပါးတွင် ဖော်ပြထားပါသည်။

ABC သတင်းကို ဆီလျှော်အောင် ဘာသာပြန်ဆိုထားပါသည်။