မြန်မာနိုင်ငံအထက်ပိုင်းတွင် မိုးတိမ်ထုများ ဆက်လက် ဖြစ်ထွန်းနေမည်

Meteoblue (ICON Model) ၏ ၂၀၂၆ ခုနှစ် စက်တင်ဘာလ ၁ ရက်နေ့ ထုတ်ပြန်သော နေ့စဉ်မိုးရေချိန်ပြမြေပုံများ၊ ထိုင်းမိုးလေဝသဌာန၏ Synoptic Weather Chart၊ ဂြိုဟ်တုဓာတ်ပုံနှင့် Weather Advisory No. 12 တို့အရ စက်တင်ဘာလ ၁ ရက်မှ ၇ ရက်နေ့အထိ (၇ ရက်အတွင်း) မြန်မာနိုင်ငံ ပြည်နယ်နှင့် တိုင်းဒေသကြီးများအလိုက် ခန့်မှန်းမိုးရေချိန် ဇယား (mm)၊ မိုးလေဝသဆန်းစစ်ချက်နှင့် သဘာဝဘေးအန္တရာယ် ကြိုတင်ခန့်မှန်းချက် ဖြစ်ပါသည်။

မြန်မာနိုင်ငံ ပြည်နယ်နှင့် တိုင်းဒေသကြီးများအလိုက် နေ့စဉ်နှင့် စုစုပေါင်း ခန့်မှန်းမိုးရေချိန်ဇယား (mm)

(၇ ရက် စုစုပေါင်း မိုးရေချိန် အများဆုံး ရရှိနိုင်သည့် ဒေသမှ အနည်းဆုံး ဒေသအလိုက် High to Low Sorted ပြုလုပ်ထားပါသည်)

မြန်မာနိုင်ငံအပေါ် သက်ရောက်နိုင်သည့် မိုးလေဝသ အခြေအနေ ဆန်းစစ်ချက်

မုတ်သုံမြောင်တန်းနှင့် အပူပိုင်းမုန်တိုင်း SAUDEL သက်ရောက်မှု

မုတ်သုံမြောင်တန်း (Monsoon Trough) သည် မြန်မာနိုင်ငံ အထက်ပိုင်း၊ ထိုင်းနိုင်ငံ မြောက်ပိုင်းတို့ကို ဖြတ်သန်း၍ တောင်တရုတ်ပင်လယ်မြောက်ပိုင်းရှိ ပြန်လည်အားကောင်းလာသော အပူပိုင်းမုန်တိုင်း SAUDEL ဆီသို့ ဆက်သွယ်တန်းလျက် တည်ရှိနေပါသည်။ မုန်တိုင်း SAUDEL သည် ထိုင်ဝမ်ဘက်သို့ ဆက်လက် ရွေ့လျားမည်ဖြစ်ရာ မြန်မာနိုင်ငံအတွင်းသို့ တိုက်ရိုက် ဝင်ရောက်မည်မဟုတ်သော်လည်း မုတ်သုံမြောင်း အရှိန်ကြောင့် မြန်မာနိုင်ငံအထက်ပိုင်းတွင် မိုးတိမ်ထုများ ဆက်လက် ဖြစ်ထွန်းနေမည် ဖြစ်ပါသည်။

မိုးအား ရက်အလိုက် ပြောင်းလဲမှု

စက်တင်ဘာ ၁ - ၃ ရက် (မိုးအရှိန် အသင့်အတင့်ရှိချိန်) - ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ အနောက်တောင်မုတ်သုံလေ အားအသင့်အတင့် တိုက်ခတ်နေဆဲ ဖြစ်သဖြင့် တနင်္သာရီ၊ မွန်၊ ကရင်၊ ရခိုင်နှင့် စစ်ကိုင်းအထက်ပိုင်းတို့တွင် မိုးအတန်အသင့်မှ သည်းထန်စွာ ရွာသွန်းနိုင်ပါသည်။

စက်တင်ဘာ ၄ - ၇ ရက် (မိုးအား လျော့ပါးချိန်) - မုန်တိုင်း SAUDEL အရှေ့မြောက်ဘက်သို့ ပိုမိုဝေးကွာသွားပြီးနောက် မုတ်သုံလေအရှိန် လျော့ပါးသွားမည် ဖြစ်ရာ မြန်မာနိုင်ငံတစ်ဝှမ်း မိုးရွာသွန်းမှု ပမာဏနှင့် အကြိမ်ရေ ပိုမိုနည်းပါးသွားမည် ဖြစ်ပါသည်။

တိုင်းဒေသကြီးများအလိုက် မိုးလေဝသနှင့် ဧရာဝတီတိုင်း လေးမျက်နှာမြို့နယ် ရေကြီးမှု သုံးသပ်ချက်

ဧရာဝတီတိုင်း လေးမျက်နှာမြို့နယ် ရေကြီးမှု အခြေအနေ သုံးသပ်ချက် - ငဝန်မြစ် တာကျိုးမှုကြောင့် ရေလွှမ်းမိုးခံနေရသော လေးမျက်နှာမြို့နယ်နှင့် မြစ်ဝကျွန်းပေါ် ဒေသများတွင် စက်တင်ဘာ ၁ ရက်မှစ၍ နေ့စဉ်မိုးရွာသွန်းမှု လျော့နည်းလာကာ ၇ ရက်အတွင်း စုစုပေါင်း မိုးရေချိန် 60mm မှ 122mm ခန့်သာ ရှိတော့မည် ဖြစ်သည်။ စစ်ကိုင်းအထက်ပိုင်းနှင့် ကချင်ပြည်နယ်တို့တွင် ရွာသွန်းခဲ့သော မိုးရေများကြောင့် စီးဆင်းလာမည့် အထက်မြစ်ရေစီးဆင်းလာခြင်းသည် ဧရာဝတီမြစ်နှင့် ငဝန်မြစ်ကြောင်းအတိုင်း ဆက်လက် စီးဆင်းနေဦးမည် ဖြစ်သည်။ ထို့ကြောင့် လေးမျက်နှာမြို့နယ်အတွင်း ငဝန်မြစ်ရေ ပြန်လည်ကျဆင်းရန် နှေးကွေးနေဦးမည်ဖြစ်ပြီး ရေလွှမ်းမိုးမှု အခြေအနေမှာ ချက်ချင်း ပျောက်ကွယ်သွားမည်မဟုတ်ဘဲ တဖြည်းဖြည်းမှသာ ပြန်လည်လျော့ကျလာနိုင်မည် ဟု ခန့်မှန်းရပါသည်။

တောင်ကျရေနှင့် မြေပြိုမှု အန္တရာယ် - စစ်ကိုင်းအထက်ပိုင်း၊ ကချင်၊ ရခိုင်နှင့် တနင်္သာရီ တောင်ခြေဒေသများတွင် လွန်ခဲ့သောရက်များက မိုးစွဲရွာသွန်းထားမှုကြောင့် မြေဆီလွှာရေပြည့်ဝနေခြင်းကြောင့် မြေပြိုခြင်းနှင့် ချောင်းရေ ရုတ်တရက် လျှံတက်ခြင်းများ ကို ဆက်လက် သတိပြုရန် လိုအပ်ပါသည်။

ပင်လယ်ပြင် သတိပေးချက် - မြန်မာ့ကမ်းရိုးတန်းနှင့် ကပ္ပလီပင်လယ်ပြင်တို့တွင် အနောက်တောင်မုတ်သုံလေ အားအသင့်အတင့် ရှိနေသဖြင့် လှိုင်းအသင့်အတင့်မှ လှိုင်းကြီးနိုင်ပြီး လှိုင်းအမြင့် ၇ ပေမှ ၉ ပေ ခန့် ရှိနိုင်ပါသည်။

မိုးလေဝသပညာရှင် ဆရာဦးဝင်းနိုင်၏ ခွင့်ပြုချက်ဖြင့် ပြန်လည်ဖော်ပြသော သတင်းဖြစ်သည်။