မတ်ပဲ၊ ပဲစင်းငုံနီ၊ ပဲတီစိမ်း၊ ပြောင်းဆံ၊ ကြက်သွန်နီ (တစ်ပတ်အတွင်း ဈေးအပြောင်းအလဲများ)

- မတ်ပဲဈေး ၃ ပတ်ဆက်တိုက် တက်နေပြီး ထပ်တက်နိုင်ချေရှိတယ်လို့ ခန့်မှန်းထား

- ပဲစင်းငုံနီကတော့ ပြီးခဲ့တဲ့အပတ်က အနည်းငယ်တက်ခဲ့သလို ဒီတစ်ပတ်မှာလည်း ၁၄ သိန်းကျော်အထိ ဈေးထပ်တက်လာ

- ပဲတီစိမ်းကတော့ အတက်ဈေးနဲ့ဈေးငြိမ်နေပြီး တရုတ်တင်ပို့မှုလည်း ပုံမှန်ဆက်ရှိနေ

- ပြောင်းဆံဈေးကတော့ ပြည်ပတင်ပို့မှု မရှိလို့ ဈေးဆက်ကျနေ

- ကြက်သွန်နီကတော့ အဝင်နည်းနေပြီး ပြည်ပဝယ်ယူမှုများနေလို့ ဈေးဆက်တိုက်တက်ခဲ့ပြီး ဆက်တက်နိုင်ခြေရှိတယ်လို့ ကုန်သည်အများစုက သုံးသပ်

မတ်ပဲ

မတ်ပဲကတော့  ၃ ပတ်ဆက်တိုက် ဈေးတက်လာပါတယ်။ အိန္ဒိယဝယ်ယူမှုက လျော့နည်းနေပေမယ့် ပုံမှန်တင်ပို့မှုကတော့ ရှိနေပါတယ်။ ပဲဝယ်ယူမှုနဲ့ပတ်သတ်ပြီး ဈေးတိုးမြှင့်လိုက်တဲ့ ထုတ်ပြန်ချက် က ဈေးတွေ တက်သလို ပြည်တွင်းပဲကုန်သည်တွေကလည်း အမြင့်ဈေးနဲ့ ရောင်းဝယ်မှုတွေကြောင့် ပဲဈေးက ဆက်တိုက်တက်နေတာဖြစ်ပါတယ်။

ပြီးခဲ့တဲ့ ဧပြီလောက်ကလည်း ဈေးတွေ အမြင့်ဈေးနဲ့ အရောင်းအဝယ်ရှိခဲ့ပြီး အရမ်းဈေးမကျဆင်းအောင် ကုန်သည်အချင်းချင်း ထိန်းရောင်းမှုတွေရှိခဲ့ပါတယ်။လက်ရှိမှာတော့ ပဲဈေးက ထပ်ပြီးတက်နိုင်ခြေရှိသေးတယ်လို့ ခန့်မှန်းထားပေမယ့် ဒီနေ့မှာတော့ တစ်တန်ကို ကျပ် ၁၆ သိန်း ကျော်ထိ ဈေးရှိသွားပြီဖြစ်ပါတယ်။

ရန်ကုန်ဈေးကွက်မှာတော့ မတ်ပဲက တစ်တန်ကို ၁၆၁၀၀၀၀ ကျော်ပေါက်ဈေးရှိပြီး ပြီးခဲ့တဲ့ အပတ်နဲ့ယှဉ်ရင် ၈ သောင်းကျော် ဈေးတက်လာတာပါ။ ‌မနေ့ကနဲ့ ဒီနေ့အတွင်းမှာတင် တစ်တန်ကို ကျပ် ၄ သောင်းကျော်ထိ ဈေးတက်လာတာပါ။

မန္တလေးဈေးကွက်မှာတော့ ပိဿာ (၆၀) တစ်အိတ်ကို ၁၅၅၀၀၀ ကနေ ၁၅၆၀၀၀ ကြား  ပေါက်ဈေးရှိပြီး တစ်အိတ်ကို ၁၀၀၀၀ ကျော်ထိ ဈေးတက်လာပါတယ်။

မြင်းခြံဈေးကွက်မှာတော့ တစ်ပိဿာကို ၂၄၅၀ ကနေ ၂၅၀၀ ကျပ်ပေါက်ဈေးရှိပြီး ၂၀၀ ကျပ် ၊ မုံရွာဈေးကွက်မှာတော့ ၄၈၀၀၀ ကနေ ၅၀၀၀၀  ပေါက်ဈေးရှိပြီး တစ်တင်းကို ၁၇၀၀ ကျပ်၊ အောင်လံဈေးကွက်မှာတော့ တစ်တင်းကို ၅၀၀၀၀ ပေါက်ဈေးရှိပြီး ၁၅၀၀ ကျပ်စီ အသီးသီး ဈေးတက်လာပါတယ်။

ပဲစင်းငုံနီ

ပဲစင်းငုံနီကတော့ ပြီးခဲ့တဲ့အပတ်က အနည်းငယ်တက်ခဲ့သလို ဒီတစ်ပတ်မှာတော့ ၁၄ သိန်းကျော်အထိ ဈေးထပ်တက်လာပါတယ်။ ရက်အတော်ကြာဈေးငြိမ်နေခဲ့ပေမယ့် မတ်ပဲတက်လို့ ပဲစင်းငုံနီဈေးလည်း အနည်းငယ် တက်လာပေမယ့် အိန္ဒိယဝယ်ယူမှုကတော့ လျော့နည်းပါတယ်။ ပြည်တွင်းအရောင်းအဝယ်ကလည်း နည်းပြီး အတက်အကျကလည်း သိပ်မရှိပါဘူး။

ရန်ကုန်ဈေးကွက်မှာ ပဲစင်းငုံနီက တစ်တန်ကို ၁၄ သိန်း ၁ သောင်းပေါက်ဈေးရှိပြီး တစ်တန်ကို ၂ သောင်းလောက်ဈေးတက်လာပါတယ်။

မန္တလေးဈေးကွက်မှာတော့ ပိဿာ (၆၀) တစ်အိတ်ကို ၁၃၀၀၀၀ ကနေ ၁၃၁၀၀၀ ကြား   ပေါက်ဈေးရှိပြီး ၁၀၀၀ ကျပ်ဈေးတက်လာပါတယ်။

ပခုက္ကူဈေးကွက်၊မုံရွာဈေးကွက်၊အောင်လံဈေးကွက်တို့မှာတော့ ပဲစင်းငုံနီက တစ်တင်းကို ၄၃၇၀၀ ကနေ ၄၄၀၀၀ ကြား အရောင်းအဝယ်ရှိနေပြီး တစ်တင်းကို ၇၀၀ လောက်ဈေးတက်လာပါတယ်။

ပဲတီစိမ်း

ပဲတီစိမ်းကတော့ အတက်ဈေးနဲ့ပဲ ဈေးငြိမ်နေပါတယ်။ အရည်အသွေးကောင်းတဲ့ ပဲတီစိမ်းအချို့ကတော့ ဈေးကောင်းရရှိနေပါတယ်။ တရုတ်တင်ပို့မှုကတော့ ပုံမှန်ပဲရှိပြီး အရောင်းအဝယ်ကလည်း ပုံမှန်ရှိပါတယ်။

ပဲတီစိမ်း(ဝါးခယ်မ)ကတော့ တစ်ပိဿာကို ၂၃၁၅ ကနေ ၂၃၅၀ ပေါက်ဈေးရှိပြီး တစ်ပိဿာကို ၁၅ ကျပ်ဈေးတက်လာပြီး အခြားပဲတွေကတော့ ဈေးငြိမ်ပါတယ်၊

မန္တလေးဈေးကွက်မှာတော့ တစ်အိတ်ကို ၁၂၀၀၀၀ ကနေ ၁၅၄၀၀၀ ကြားပေါက်ဈေးရှိနေပြီး တစ်အိတ်ကို ၂၀၀၀ လောက်ဈေးတက်လာပါတယ်။

မုံရွာဈေးကွက်မှာတော့ ပဲတီစိမ်း(ကြီး၊သေး) တစ်တင်းကို ၃၄၀၀၀ ကနေ ၄၃၅၀၀  ပေါက်ဈေး ရှိပြီးဈေးငြိမ်ပါတယ်။

ပခုက္ကူဈေးကွက်မှာတော့ တစ်တင်းကို ၄၁၀၀၀ ကနေ ၄၆၀၀၀ ပေါက်ဈေးရှိပြီး ဈေးငြိမ်ကာ မကွေးဈေးကွက်မှာတော့ တစ်တင်းကို ၄၆၀၀၀ ပေါက်ဈေးရှိပြီး ၃၀၀ ကျပ် ဈေးကျဆင်းသွားပါတယ်။

ပြောင်းဆံ

ပြောင်းဆံကတော့ ပြီးခဲ့တဲ့အပတ်ကတည်းက ဈေးကျဆင်းနေပြီး ဒီတစ်ပတ်မှာလည်း ဈေးက ဆက်ပြီး ကျဆင်းသွားပါတယ်။ ပြည်ပတင်ပို့မှု မရှိတဲ့အတွက်ကြောင့် ဈေးတွေကျဆင်းနေတာဖြစ်တယ်လို့သိရ ပါတယ်။

ရန်ကုန်ဈေးကွက်မှာ ပြောင်းဆံက တစ်ပိဿာကို ၁၀၃၀ ကနေ ၁၀၆၀  ပေါက်ဈေးရှိပြီး တစ်ပိဿာကို ၄၀ ကျပ် ဈေးကျဆင်းသွားပါတယ်။

မန္တလေးဈေးကွက်မှာတော့ စီပီပြောင်းက တစ်အိတ်ကို ၅၁၅၀၀ ကနေ ၅၂၅၀၀ ကြားပေါက်ဈေးရှိနေပြီး တစ်အိတ်ကို ၂၀၀၀ ကျပ် ဈေးကျဆင်းသွားပါတယ်။

အခြားဗမာပြောင်း၊ရှမ်းပြောင်း၊ ပြောင်းနီတို့ကတော့ တစ်အိတ်ကို ၄၀၀၀၀ ကနေ ၅၂၀၀၀ ကြားပေါက်ဈေးရှိပြီး ၂၅၀၀ ကျပ်လောက် ဈေးကျဆင်းသွားပါတယ်။ 

မုံရွာဈေးကွက်မှာတော့ တစ်တင်းကို ၁၆၈၀၀ ပေါက်ဈေးရှိပြီး ၁၂၀၀ ကျပ်ဈေးကျဆင်းသွားပါတယ်။

ကြက်သွန်နီ

ကြက်သွန်နီကတော့ ဆက်တိုက် ဈေးမြင့်တက်နေပါတယ်။ အဝင်နည်းနေပြီး ဘင်္ဂလားဒေ့ရှ်နိုင်ငံ၊ တရုတ်နိုင်ငံနဲ့ ထိုင်းနိုင်ငံတို့က ဝယ်ယူမှုများနေတဲ့အတွက်ဈေးက ဆက်တိုက်တက်နေခဲ့တာဖြစ်ပါတယ်။ ဆက်ပြီးတက်နိုင်ခြေရှိတယ်လို့ ကုန်သည်အများစုက သုံးသပ်ထားပါတယ်။

ရန်ကုန်ဈေးကွက်ကိုတော့ နေ့စဉ် ပိဿာချိန် ၁ သိန်းကျော်ဝင်ရောက်နေပါတယ်။

ရန်ကုန်ဈေးကွက်မှာ ကြက်သွန်နီ ဆိပ်ဖြူက တစ်ပိဿာကို ၁၂၅၀ ကနေ ၂၀၀၀ ကျပ်ပေါက်ဈေးရှိပြီး တစ်ပိဿာကို ၅၀၀  ကျပ် ဈေးတက်လာပါတယ်။ကြက်သွန်နီမုံရွာကတော့ တစ်ပိဿာကို ၁၄၂၅  မှ ၂၁၀၀  ကြားပေါက်ဈေးရှိနေပြီး တစ်ပိဿာကို ၅၀၀  ကျပ် ဈေးတက်လာပါတယ်။

ပခုက္ကူဈေးကွက်မှာတော့ တစ်ပိသာကို ၇၀၀ ကနေ ၁၈၀၀ ထိ ပေါက်ဈေးရှိပြီး တစ်ပိဿာကို ၄၀၀ကျပ် ဈေးမြင့်တက်လာပါတယ်။

မော်လမြိုင်ဈေးကွက်မှာတော့ တစ်ပိဿာကို ၁၉၀၀ ကနေ ၂၁၀၀ ပေါက်ဈေးရှိပြီး ၆၀၀ ကျပ်ဈေးတက်လာပါတယ်။

(ယခုတစ်ပတ် တနင်္လာ (ဇွန် ၁၃ ရက်) မှ သောကြာ (ဇွန် ၁၇) အတွင်း ဈေးကွက်အခြေအနေများကို ဖော်ပြခြင်းဖြစ်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။