ယခုရက်ပိုင်းအတွင်း ဒေသအချို့တွင် မိုးရွာသွန်းမှုနှင့် နေရာကွက်မိုးကြီးမှုများ တောက်လျှောက်ရှိနေမည်

ကပ္ပလီပင်လယ်ပြင်တောင်ပိုင်းမှာ လေဖိအားနည်းရပ်ဝန်းကနေ မုန်တိုင်းအထိ ဖြစ်လာနိုင်တဲ့ စောင့်ကြည့်အခြေအနေ (INVEST-92 B) တစ်ခုဖြစ်လာတဲ့အတွက် မြန်မာနိုင်ငံ ဒေသအချို့မှာ မိုးရွာသွန်းမှု တောက်လျှောက်ရှိနေဦးမယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က ပြောပါတယ်။

“ မိုးကတော့ တောက်လျှောက်ရှိနေမယ်။ နေရာကွက်ပြီး မိုးကြီးတာဖြစ်နိုင်တယ်။ နေရာကွက်လေပြင်းတိုက်တာလည်း ဖြစ်နိုင်တယ်” လို့ ဦးဝင်းနိုင်က ကမ္ဘာလုံးဆိုင်ရာ မိုးလေဝသခန့်မှန်းဝက်ဘ်ဆိုဒ်တွေဖြစ်တဲ့ ECMWF နဲ့ GFS တို့ရဲ့ ထုတ်ပြန်ချက်တွေကို ကိုးကားပြီး သုံးသပ်ပြောကြားပါတယ်။

အခုရက်ပိုင်းအတွင်း နေရာကွက် မိုးရွာသွန်းမှုတွေ ဆက်တိုက်ဖြစ်နေပြီး လွန်ခဲ့သော (၂၄)နာရီအတွင်းကလည်း နေပြည်တော်၊ စစ်ကိုင်းတိုင်းဒေသကြီးအောက်ပိုင်း၊ ဧရာဝတီတိုင်းဒေသကြီးနှင့် တနင်္သာရီတိုင်းဒေသကြီးတို့တွင် နေရာကွက်ကျား၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ချင်းပြည်နယ်နှင့် ရခိုင်ပြည်နယ်တို့တွင် နေရာကျဲကျဲ၊ စစ်ကိုင်းတိုင်းဒေသကြီးအထက်ပိုင်းနှင့် ရှမ်းပြည်နယ်(မြောက်ပိုင်းနှင့် အရှေ့ပိုင်း)တို့တွင် နေရာစိပ်စိပ်နှင့် ကျန်တိုင်းဒေသကြီးနှင့် ပြည်နယ်တို့တွင် နေရာအနှံ့အပြား မိုးထစ်ချုန်းရွာခဲ့ပြီး၊ မန္တလေးတိုင်းဒေသကြီးတွင် ဒေသအလိုက် မိုးကြီးခဲ့တယ်လို့ မိုးလေဝသနှင့်ဇလဗေဒ ညွှန်ကြားမှုဦးစီးဌာနက ဒီနေ့ မနက် ၉ နာရီခွဲအချိန်တိိုင်းထွာချက်ကို ထုတ်ပြန်ရာမှာ ထည့်သွင်းဖော်ပြထားပါတယ်။ 

ဒီနေ့ (မေ ၅ ရက်) နေ့လယ် ၂ နာရီအချိန်မှာရတဲ့ ECMWF Model ရဲ့ INVEST-92B အတွက် ဆက်လက်ဖြစ်လာနိုင်မယ့် လမ်းကြောင်းကြိုတင်ခန့်မှန်းချက်အရ မေလ ၁၃ ရက်နဲ့ ၁၄ ရက်ဝန်းကျင်မှာ မုန်တိုင်းဟာ အရှေ့ဘက်ကို ကွေ့လာနိုင်ကြောင်းနဲ့ ပြီးမှ မေလ ၁၄ ရက် ည ပိုင်းမှာ မြောက်-အရှေ့မြောက်ဘက်ကို ပြန်လည်ချိုးကွေ့ရွေ့လျားမယ်လို့ ခန့်မှန်းချက်အသစ် ထွက်ပေါ်လာတာတွေ့ရပြီး မုန်တိုင်းလမ်းကြောင်းက အရင်ခန့်မှန်းထားစဉ်ကထက် မြန်မာနိုင်ငံနဲ့ ပိုနီးလာကာ မိုးတွေ၊ လေပြင်းတွေ ပိုများနိုင်တယ်လို့ ဦးဝင်းနိုင်က ခန့်မှန်းပါတယ်။

“ အရင်တုန်းကတော့ အိန္ဒိယကမ်းခြေဘက်ကိုနီးတယ်။ အခုကတော့ ဗမာပြည်ဘက်ကို ပိုနီးလာတယ်ဆိုတဲ့အခါကျတော့ မုန်တိုင်းက တည့်တည့်ဝင်တဲ့အနေအထားမျိုးအထိတော့ မမြင်ရသေးဘူး။ သို့သော် အရှေ့ဘက်ကို ပိုနီးလာတဲ့အတွက် သူ့ရဲ့ အရှိန်သက်ရောက်မှုပေါ့နော်။ မုန်တိုင်းဒဏ်သက်ရောက်မှုက ကျွန်တော်တို့က ညာဘက်ခြမ်းမှာရှိတဲ့အတွက် အရင်ခန့်မှန်းထားတာထက်တော့ ပိုပြီးတော့ မိုးပိုများနိုင်တယ်။ လေပြင်းတိုက်တဲ့အချိန်တွေ ပိုပြီးတော့ များနိုင်တယ်” လို့ ဦးဝင်းနိုင်က Green Way ကို ပြောပါတယ်။

မုန်တိုင်းအဆင့်မှာဘယ်လောက်ထိဖြစ်လာနိုင်လဲဆိုတာကိုတော့ မေ ၈ ရက် ၉ ရက် ဝန်းကျန်ခန့်မှာ အတိအကျသိနိုင်မှာဖြစ်ပြီး အဲ့ဒီအချိန်ကျရင် ဘယ်အတိုင်းအတာထိဖြစ်မယ်၊ ဗမာပြည်ကို ဝင်နိုင်တဲ့အခြေအနေရှိနိုင်လား ကို စောင့်ကြည့်နိုင်မယ့်အနေအထားထိ ဖြစ်လာနိုင်မယ်လို့လည်း ဦးဝင်းနိုင်က သုံးသပ်ပါတယ်။

အခုလက်ရှိအချိန်အနေအထားမှာတော့ နေပြည်တော်၊ မန္တလေး၊ ရှမ်းပြည်နယ်တစ်ခုလုံး။ ကယားပြည်နယ်၊ ရခိုင်ပြည်နယ်တောင်ပိုင်း၊ ဧရာဝတီတိုင်းတစ်ခုလုံးနဲ့ ဧရာဝတီတိုင်းမြောက်ပိုင်း အဲ့ဒီနေရာတွေမှာ မိုးရွာဖို့ရှိနေပြီး နည်းတာများတာပဲ ကွာသွားမယ်လို့ ဦးဝင်းနိုင်က ခန့်မှန်းပြောကြားပါတယ်။

Photo crd - Win Naing FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်