သီရိမင်္ဂလာဈေးသို့ ကွမ်းအဝင်နည်းနေပြီး ကွမ်းဈေးကွက်တည်ငြိမ်နေ

11/10/2021 20:00 PM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

    လက်ရှိအခြေအနေတွင် ရန်ကုန်တိုင်းဒေသကြီး၊ သီရိမင်္ဂလာဈေးသို့ ကွမ်းအဝင်နည်းနေပြီး ကွမ်းဈေးကွက်တည်ငြိမ်နေကြောင်း ကွမ်းဒိုင်များမှ သိရသည်။

    ၂၀၂၁ ခုနှစ်၊ အောက်တိုဘာလ (၁၁) ရက်နေ့ ကွမ်းရွက်လက်ကားရောင်းချမှုအနေဖြင့် (ရိုးညို/စိမ်း) ယာကွမ်း တစ်ပိဿာလျှင် အရည်အသွေးပေါ်မူတည်၍ (၄၀၀၀) ကျပ်မှ (၉၀၀၀) ကျပ်အတွင်း၊ ယာဆိုက်ပြည့် တစ်ပိဿာလျှင် အရည်အသွေးပေါ်မူတည်၍ (၅၅၀၀) ကျပ်မှ (၇၀၀၀) ကျပ် အတွင်း၊ ဆိုက်လတ် တစ်ပိဿာလျှင် အရည်အသွေးပေါ်မူတည်၍ (၃၀၀၀) ကျပ်မှ (၅၅၀၀) ကျပ် အတွင်း၊ ဆိုက်သေး တစ်ပိဿာလျှင် အရည်အသွေးပေါ်မူတည်၍ (၁၀၀၀) ကျပ်မှ (၂၅၀၀) ကျပ် အတွင်း၊ ပယ်ကြီး တစ်ပိဿာလျှင် (၃၀၀၀) ကျပ်မှ (၃၅၀၀) ကျပ် ဈေးနှုန်းများဖြင့် ရောင်းဝယ်ဖောက်ကားနေကြောင်း သီရိမင်္ဂလာဈေးရှိ ရွှေရင်အေးရိပ် ကွမ်းနှင့်ကွမ်းသီး ရောင်းဝယ်ရေးမှ သိရသည်။

အခုအချိန်မှာက ကွမ်းသိပ်မပေါသေးဘူး။ အလယ်အလတ်အခြေအနေပေါ့။ ကမ်းနား ရေမြှုပ်ကွင်းတွေက အခုမှစိုက်မလို့ပြင်ကြတုန်းအချိန်၊ ကုန်းကွမ်းသမားတွေကလည်း အခုမှ အညွှန့်စိပ်ကာစဆိုတော့ စပ်ကူးမတ်ကူးအချိန်ပေါ့။ လှိုင်လှိုင်မပေါသေးဘူးဆိုတော့ ဒိုင်ကိုတင်ပို့တာနည်းနေတာပေါ့။ ဈေးကတော့ ဟုတ်တိပတ်တိ မကောင်းသေးဘူး။ နောက်လလောက်ဆိုရင်တော့ ဈေးကောင်းနိုင်တယ်။ ကွမ်းဈေးကွက်ကတော့ ကြိုတင်ခန့်မှန်းရ ခက်ခဲပါတယ်။

ဟု ဧရာဝတီတိုင်းဒေသကြီး၊ ညောင်တုန်းမြို့နယ်ရှိ စီးပွားဖြစ် ကွမ်းခြံလုပ်ငန်းလုပ်ကိုင်သူ ကိုမင်းလွင်က ပြောသည်။

    ကွမ်းဒိုင်များသို့ ကွမ်းရွက်တင်ပို့ရောင်းချရာတွင် အရွယ်အစားခွဲခြား၍ သန့်စင်စီတန်းထားသော ကွမ်းများနှင့် ကွမ်းသားပါးလွှာ/ပျော့ပျောင်းသော ကွမ်းရွက်များမှာ စျေးကောင်းပိုမိုရရှိနိုင်ကြောင်း ကွမ်းဒိုင်များမှ သိရသည်။