ပြည်တွင်းဈေးကွက်ကိုသာ အမှီပြုနေရခြင်းကြောင့် ကွမ်းသီးဈေးတက်ချိန်ဖြစ်သော်လည်း ဈေးကောင်းမရ

13/08/2020 13:30 PM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား ပြီး Greenovator Greenovator မှ ပေးပို့ထားပါသည်။

    ပြည်တွင်းဈေးကွက်ကိုသာ အားထားအမှီပြုနေရခြင်းကြောင့် ကွမ်းသီးဈေးတက်ချိန်ဖြစ်သော်လည်း ဈေးကောင်းမရရှိသေးကြောင်း ဈေးကွက်ကျွမ်းကျင်သူများထံမှ သိရသည်။

ကျွန်တော်တို့က ရေးမြို့နဲ့ မြိတ်မြို့ကထွက်တဲ့ကွမ်းသီးတွေကို ဝယ်ယူနေတာပါ။ ကွမ်းသီးဈေးကျနေတာ လေးလလောက်ကိုရှိနေပြီ။ တမူးလမ်းပိတ်ထားတာကြောင့် အဓိကတင်ပို့တဲ့ အိန္ဒိယဘက်ကို ကွမ်းသီးတွေမထွက်နိုင်တော့ ရန်ကုန်နဲ့ပြည်တွင်းဈေးကွက်မှာပဲ လည်ပတ်နေလို့ ဈေးတက်မလာတာပါ။

ဟု ရန်ကုန်မြို့၊ ဘုရင့်နောင်ပွဲရုံရှိ ကွမ်းသီးဒိုင်မှ ကိုမျိုးမြင့်လတ်က ပြောသည်။

    လက်ရှိ ဈေးကွက်တွင် ကွမ်းသီးတစ်ပိဿာလျှင် အရည်အသွေးအနိမ့်အမြင့်အပေါ် မူတည်၍ ၄၀၀၀ ကျပ်မှ ၄၇၀၀ ကျပ် အတွင်း ဈေးနှုန်းများဖြင့် ရောင်းဝယ်နေသည်။

ဒီနှစ်က ကွမ်းသီးအထွက်နည်းတယ်။ မြိတ်၊ ရေးဘက်ကဒေသတချို့မှာ ရေတက်တယ်။ ကွမ်းခြံတွေ ရေဝင်တယ်။ ဒီလိုမျိုး ရာသီဥတုမကောင်းတဲ့ကာလဆိုတော့ ကွမ်းသီး အထွက်လည်းနည်းတယ်။ အထွက်နည်းတယ်ဆိုတော့ ဈေးတက်ရမယ့်ဟာကို မတက်ဘူး။ ဈေးကွက်ဖြုန်းအား နည်းနေလို့ပါ။

ဟု ကွမ်းသီးပင်စိုက်ပျိုးသူ ကိုနိုင်အောင်က ပြောသည်။

    ၂၀၁၉ ခုနှစ် (Covid-19 ကာလ မတိုင်မီ) က ကွမ်းသီးတစ်ပိဿာလျှင် အရည်အသွေးပေါ်မူတည်၍ (၄၅၀၀) ကျပ်မှ (၆၀၀၀) ကျပ် အတွင်း ဈေးရရှိခဲ့ကြောင်းသိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကိုထည့်ပေးပါရန် မေတ္တာရပ်ခံအပ်ပါသည်။