အစေ့ထုတ်ပြောင်းဈေးနှုန်းများ ကျဆင်းလာ

22/08/2019 10:31 AM တွင် အစိမ်းရောင်လမ်း အစိမ်းရောင်လမ်း မှ ရေးသား ပြီး Greenovator Greenovator မှ ပေးပို့ထားပါသည်။

ယခုတစ်ပတ်အတွင်း အစေ့ထုတ်ပြောင်းဈေးနှုန်းများ အနည်းငယ်ကျဆင်းလာကြောင်း မြန်မာနိုင်ငံပြောင်းစိုက်ပျိုးထုတ်လုပ် တင်ပို့ရောင်းချသူများအသင်းမှ သိရပါတယ်။ 

ထိုင်းနိုင်ငံမှ ပြောင်းရာသီရောက်လာတော့မှာဖြစ်တာကြောင့် အစေ့ထုတ်ပြောင်းဝယ်ယူမှု ရပ်တန့်တော့မှာဖြစ်တဲ့အတွက် ဈေးနှုန်းများကျဆင်းလာတာဖြစ်တယ်လို့ မြန်မာနိုင်ငံပြောင်းစိုက်ပျိုးထုတ်လုပ် တင်ပို့ရောင်းချသူများအသင်းမှ ဥက္ကဌ ဦးမင်းခိုင်ကပြောပါတယ်။

“ ပြည်ပနိုင်ငံတွေကလည်း တရုတ်ဘက်ကတင်ပို့ခွင့်မရသေးဘူး။ ထိုင်းဘက်ကလည်း ပြောင်းကိုဝယ်ယူနေပေမယ့် ဒီလကုန်တာနဲ့ ပြောင်းမဝယ်တော့ဘူး။ ဟိုဘက်မှာက ရာသီချိန်ရောက်လာပြီဆိုတော့ မြန်မာ့ပြောင်းကိုဝယ်ယူသေးမှာ မဟုတ်ဘူး။ အဲဒါကြောင့် ပြောင်းဈေးနှုန်းကကျဆင်းလာတာပါ”

မြန်မာ့အစေ့ထုတ်ပြောင်းတစ်ပိဿာကို ယခင်လများက တစ်ပိဿာကို ၅၄၀ ဝန်းကျင်ရှိခဲ့ပေမယ့် အခုရက်ပိုင်းအတွင်း တစ်ပိဿာကို ကျပ် ၅၀၀ ဝန်းကျင်ခန့်သာရှိတော့ကြောင်း အဆိုပါအသင်း မှသိရပါတယ်။

ယခုလက်ရှိအချိန်တွင် မြန်မာ့ပြောင်းကို ထိုင်းနိုင်ငံကို အဓိကထားတင်ပို့နေတာဖြစ်ကြောင်း မြန်မာနိုင်ငံပြောင်းစိုက်ပျိုးထုတ်လုပ် တင်ပို့ရောင်းချသူများအသင်းမှ သိရပါတယ်။ 

တိုးတိုးခိုင်(ABM)