ခရေပင် (ချရားပင်)

14/11/2019 13:00 PM တွင် အစိမ်းရောင်လမ်း အစိမ်းရောင်လမ်း မှ ရေးသား ပြီး Greenovator Greenovator မှ ပေးပို့ထားပါသည်။

မျိုးရင်း။    ။ Sapotaceae (သကြားသီးမျိုးရင်း)

မြန်မာနိုင်ငံတစ်ဝန်း မြေပြန့်ဒေသများတွင် အများအပြားတွေ့ရသည်။ သဘာဝအလျောက်ပေါက်ရောက်သည်။

မြန်မာ့ဆေးကျမ်းများအလိုအရ အခေါက်သည် ချိုသည်။ ခါးသည်။ အေးသည်။ နှလုံးကို အားရှိစေသည်။ ဝမ်းမီးကို ပွားစေသည်။ ရောဂါပိုးတို့ကို နိုင်သည်။ သွားဖုံးရောဂါများ၌ အကျိုးပြုသည်။  သည်းခြေဖောက်ပြန်ခြင်းကို ပျောက်ကင်းစေသည်။ အသီးသည် အူကို တွန့်ရှုံ့စေသည်။ နှုတ်ကို မြိန်စေသည်။ သွားတို့ကို ခိုင်စေသည်။ ချုပ်စေသည်။ သလိပ် သည်းခြေကိုနိုင်စေသည်။ အစေ့သည် လှုပ်နေသော သွားတို့ကို ခိုင်စေသည်။ ရှူသော် ခေါင်းကိုက်ခြင်းကို ပျောက်ကင်းစေသည်။ 

အသုံးပြုပုံ

၁။ ခရေပွင့်ကို တစ်ညလုံး ရေစိမ်၍ နံနက်တွင် ထိုစိမ်ရည်ကို စစ်ပြီး ကလေးအားတိုက်လျှင် ချောင်းဆိုးရောဂါပျောက်သည်။ 

၂။ ခရေပွင့်အစိုကို မီးယပ်ဖြူရောဂါနှင့် သွားရောဂါအတွက် အသုံးပြုသည်။

၃။ ခရေပွင့်အခြောက်ကို သနပ်ခါးဖြင့် ရောသွေးလိမ်းက အပူကြောင့်ဖြစ်သော မိတ်နာ၊ ယားနာများ အမြန်ပျောက်ကင်းသည်။

အခေါက်

၁။ အခေါက်ပြုတ်ရည်ကို သောက်ခြင်းဖြင့်လည်းကောင်း၊ အပွင့်ကိုရှူခြင်းဖြင့်လည်းကောင်း၊ အသီးကိုစားခြင်းဖြင့်လည်းကောင်း၊ နှလုံးရောဂါကို ပျောက်စေသည်။ 

၂။ ခရေခေါက်၊ ဆီးဖြူခေါက်၊ ရှားခေါက် ၃ မျိုးပြုတ်၍  ငုံပေးခြင်းဖြင့် ပါးစပ်၌ မက်ခရုပေါက်ခြင်း၊ သွားဖုံးရောင်ခြင်း၊ ပါးစပ်၌ အပူလောင်ခြင်း၊ ရေစီးကမ်းပြိုဖြစ်ခြင်းစသော ခံတွင်းနာအားလုံး ပျောက်ကင်းစေသည်။

၃။ အခေါက်ကို ပြုတ်၍ ဖန်ဆေးရေအဖြစ် အသုံးပြုနိုင်သည်။

အစေ့

၁။ အဆက်မပြတ် သွားသော ဝမ်းရောဂါများအတွက် အစေ့ကို ရေအေးနှင့် သွေးသောက်ခြင်း၊ ခရေသီးအမှည့်၏ အသားကို စားပေးခြင်းဖြင့် ပျောက်ကင်းစေနိုင်သည်။

မြန်မာ့ဆေးဝါးပင်များ