အိမ်တွင်းအလှစိုက်အပင်တွေ စိုက်မယ်ဆို ဒါတွေသတိထား..

08/02/2022 15:30 PM တွင် ဇင်ထူးနိုင် ဇင်ထူးနိုင် မှ ရေးသား

နေအိမ် (သို့မဟုတ်) ခြံဝန်းအတွင်းမှာ အလှစိုက်အပင်တွေ စိုက်ပျိုးရတာကို နှစ်သက်ပါသလား? 

ကိုယ့်ဝါသနာအရ အလှစိုက်အပင်တွေကိုစိုက်ပျိုးထားတဲ့အခါ အိမ်မှာ ကလေးငယ်တွေနဲ့ အိမ်မွေးတိစ္ဆာန်လေး တွေ ရှိတယ်ဆိုရင်တော့ သတိပြုပေးဖို့လိုအပ်ပါတယ်။ ဘာလို့လဲဆိုတော့ တချို့အလှစိုက်အပင်တွေရဲ့ အစိတ် အပိုင်းတွေက မတော်တဆ စားမိရင် အဆိပ်သင့်တာမျိုး ဖြစ်တတ်လို့ပါ။

အဆိပ်သင့်တယ်ဆိုပေမယ့် အရမ်းဆိုးရွားတဲ့ အဆိပ်သင့်တာမျိုးတော့ မဟုတ်လို့ အစိုးရိမ်တော့ မလွန်စေချင် ပါဘူး။ မတော်တဆ စားမိ၊ မျိုချမိရင်တော့ ခံတွင်းယားယံခြင်း၊ ပါးစပ်၊ နှုတ်ခမ်း၊ လျှာများ ရောင်ရမ်းခြင်း၊ အော့အန်ခြင်း၊ အစာမျိုချရခက်ခဲခြင်း၊ အရေပြားများ ယားယံခြင်း စတာတွေ ဖြစ်နိုင်လို့သာ သတိပြုစေချင်တာ ဖြစ်ပါတယ်။

ယနေ့ခတ်မှာဆိုရင် အိမ်တွင်းအလှစိုက်အပင်တွေကို အမျိုးအစားစုံလင်စွာ ရွေးချယ်ဝယ်ယူနိုင်ပြီး အလွယ်တကူ စိုက်ပျိုးနိုင်ကြပါတယ်။ ပန်းရောင်းတဲ့ဆိုင်မှာ ကိုယ်တိုင်ရွေးချယ်ဝယ်ယူနိုင်သလို အွန်လိုင်းမှာရှိတဲ့ ပန်းဆိုင်တွေ ကနေတစ်ဆင့်လည်း အလွယ်တကူဝယ်ယူနိုင်ပါတယ်။ အိမ်တွင်းအလှစိုက်ပင်တွေ စိုက်ပျိုးရာမှာ အဓိကအားဖြင့် 

- ကန္တာရဆူးပင်လို့ခေါ်ကြတဲ့ ကက်တက်စ်ပင်တွေ (Cactus) 

- လှပပြီး အပင်ပုံစံမျိုးစုံရှိတဲ့ ဆာကူးလက်စ် ပင်တွေ (Succulents) 

- ပန်းပွင့်တဲ့အပင်တွေ (Flowering Plants) 

- အလင်းရောင်နည်းနည်းပဲလိုပြီး ပြုစုရတာနည်းတဲ့အပင်တွေ (Easy and Low Light Plants) 

- လှပတဲ့အရွက်ရှိတဲ့ အပင်တွေ (Foliage Plant) 

- ပြတင်းပေါက်တွေ၊ သစ်ပင်တွေမှာ ချိတ်ဆွဲစိုက်ပျိုးနိုင်တဲ့ အပင်တွေ (Hanging Type Plants) 

- အင်းဆက်ဖမ်းစားတဲ့အပင်တွေ (Unusual Plants) 

- ကျောက်တုံးနဲ့တူတဲ့ အပင်တွေ (Living Stone Types) 

- နွယ်တက်တဲ့အပင်တွေ (Trailing and Climbing Plants) စသဖြင့် အမျိုးအစား စုံလင်စွာရှိပါတယ်။ 

ဒီလိုအပင်တွေစိုက်ပျိုးရာမှာ အိမ်နေရာအကျယ်အဝန်းပေါ်မူတည်ပြီး ခြံထဲမှာစိုက်ပျိုးကြသလို၊ နေအိမ်အတွင်း ဧည့်ခန်းတွေနဲ့ အိပ်ခန်းတွေထဲမှာပါ စိုက်ပျိုးကြလေ့ရှိပါတယ်။ အိမ်တွင်းအလှစိုက်အပင်တွေဟာ စိုက်ပျိုးတဲ့ သူရော မြင်တွေ့ရတဲ့သူပါ မျက်စိပသာဒဖြစ်စေသလို စိတ်ကြည်နူးမှုလည်းရှိစေပြီး ကျန်းမာရေးအတွက်လည်း အထောက်အကူပြုပေးနိုင်ပါတယ်။  

ဒါပေမဲ့ အထက်မှာဆိုခဲ့သလို အန္တရာယ်ဖြစ်နိုင်တဲ့အပိုင်းလေးတွေလည်း ရှိနေလို့ များပြားလှတဲ့ အိမ်တွင်း အလှစိုက်အပင်တွေထဲကမှ ဘယ်အပင်တွေကတော့ ကလေးငယ်တွေနဲ့ တိရိစ္ဆာန်လေးတွေအတွက် သတိထား ရမလဲဆိုတာကို မျှဝေပေးသွားချင်ပါတယ်ဗျ..။ 

၁။ မြစိမ်းရှင် (Amazonian Elephant Ear) 

ဒီအပင်ဟာ အပင်စိုက်ပျိုးသူတွေကြား လူကြိုက်များထင်ရှားတဲ့ ပန်းပင်တွေထဲက တစ်မျိုးဖြစ်ပါတယ်။ အရွက် တွေဟာ ခရမ်းရောင်၊ အစိမ်းရောင်၊ မီးခိုးရောင်နဲ့ ငွေရောင်ဆိုပြီးတော့ရှိကာ အဲ့ဒီအရွက်တွေကြောင့်ပဲ လူကြိုက် များတာလည်း ဖြစ်ပါတယ်။ ဒီအပင်ဟာ မျိုးစိတ်ပေါင်းလည်း များစွာရှိပါတယ်။ သူ့ရဲ့မူရင်းဒေသကတော့ အာရှ အပူပိုင်းဒေသတွေနဲ့ ဩစတြေးလျနိုင်ငံပဲ ဖြစ်ပါတယ်။ 

ဒီအပင်ကို မတော်တဆစားမိခဲ့ရင် လူတွေအတွက် အဆိပ်သင့်နိုင်မှုပြင်းအား အတော်အသင့်ပဲ ရှိပေမယ့် ခွေး၊ ကြောင်၊ မြင်းနဲ့ အခြားတိရိစ္ဆာန်လေးတွေမှာတော့ အဆိပ်သင့်မှု မြင့်နိုင်တာကြောင့် သတိပြုသင့်ပါတယ်။ 

၂။ ကစ်စ်မီပန်းပင် - Kiss Me (Crown of thorns) 

ဒီအပင်ကတော့ အလှပန်းပင် စိုက်ပျိုးသူတွေသာမက သာမန်လူတွေပါ သိတဲ့ပန်းပင်ဖြစ်ပါတယ်။ ဒီပန်းဟာ စာရေးသူတို့ ငယ်စဉ်ကဆိုရင် တော်တော်လေး လူကြိုက်များကြပြီး အိမ်တိုင်းနီးပါးလည်း စိုက်ပျိုးတဲ့ ပန်းပင်ဖြစ်ပါတယ်။ 

ဒါပေမဲ့ အပင်အစိတ်အပိုင်းတွေကို မတော်တဆစားမိခဲ့ရင်တော့ ပါးစပ်နဲ့လည်ချောင်းများယားယံခြင်း၊ အော့အန် ခြင်းနဲ့ ဗိုက်နာခြင်းတို့ ဖြစ်ပွားနိုင်ပါတယ်။ ဒီအပင်ကနေထွက်တဲ့ အစေးကိုလည်းမြင်ဖူးကြပါလိမ့်မယ်။ အဲ့ဒီ အစေးကို မတော်တဆ မျက်လုံးတို့ အရေပြားတို့ကို ထိတွေ့ခဲ့ရင် ယားယံခြင်း၊ ရောင်ရမ်းခြင်းတို့ ဖြစ်စေနိုင် ပါတယ်။ 

၃။ မုံတိုင်ပင် (Sago Palm) 

ဒီအပင်တွေဟာ ဈေးနှုန်းအားဖြင့်ကြီးမြင့်ပြီး အလှဆင်စိုက်ပျိုးရာမှာ အသုံးများတဲ့ အပင်တွေ ဖြစ်ပါတယ်။ ထန်းပင်အသေးစားလေးတွေနဲ့ တူတာကြောင့် လူသိများတာလည်းဖြစ်ပါတယ်။ ဒီအပင်တွေဟာ ကြီးထွားမှု နှေးပြီး  သက်တမ်းရှည်တဲ့ အပင်တွေလည်းဖြစ်ပါတယ်။ 

မတော်တဆ စားခဲ့မိရင်တော့ အော့အန်ခြင်း၊ ဝမ်းလျှောခြင်းနဲ့ ခေါင်းကိုက်ခြင်းတို့ကို ဖြစ်စေနိုင်တာကြောင့် သတိ ပြုရမှာ ဖြစ်ပါတယ်။ 

၄။ ရှင်သီဝလိဂမုန်း (Peace lily) 

ဒီအပင်ဟာ လေသန့်ပင်အမျိုးအစားဖြစ်ပါတယ်။ စိုက်ပျိုးပြုစုရတာ လွယ်ကူပြီး အကြမ်းခံတဲ့အပြင် သူ့ရဲ့ စိမ်းစို နေတဲ့ အရွက်တွေကြောင့် အပင်စိုက်ပျိုးသူတွေ ကြိုက်နှစ်သက်တဲ့ အပင်ဖြစ်ပါတယ်။ 

ဒီအပင်တွေဟာလည်း အပင်ရဲ့အစိတ်အပိုင်းတွေကို စားခဲ့မိရင် အဆိပ်သင့်မှုပြင်းထန်နိုင်တာကြောင့် သတိပြု ပေးကြပါ။ 

၅။ တိုက်ကပ်နွယ်ပင် (English Ivy) 

အိုင်ဗီပင်တွေကတော့ အလွန်သန်စွမ်းပီး အစိမ်းရောင်ရှိတဲ့ နွယ်ပင်အမျိုးအစားဖြစ်ပါတယ်။ နှစ်ရှည်ပင် အမျိုးအစားဖြစ်ပြီး ကျောက်တုံးတွေ၊ အိမ်နံရံတွေ၊ ခြံစည်းရိုးတွေနဲ့ အိမ်အတွင်းမှာပါ ချိတ်ဆွဲပင်အနေနဲ့ အလှဆင်စိုက်ပျိုးနိုင်ပါတယ်။ ပေ ၁၀၀ လောက်အထိရှည်လျားကြီးထွားနိုင်ပါတယ်။

 ဒီအပင်ကိုတော့ တိရိစ္ဆာန်လေးတွေ မတော်တဆစားမိခဲ့ရင် အဆိပ်သင့်မှုပြင်းထန်နိုင်ပြီး အသက်ရှူကျပ်တာတွေ၊ သတိမေ့မြောတာတွေနဲ့ အခန့်မသင့်ရင် သေဆုံးတဲ့ထိ ဖြစ်နိုင်ပါတယ်။ 

၆။ ပါတိတ်ပိန်း၊ ပိန်းရွက်လှ (Angle Wings) 

ဒီအပင်ဟာလည်း အရွက်ဖားဖားကြီးတွေနဲ့ လှပတဲ့အတွက်ကြောင့် အပင်စိုက်ပျိုးသူတွေကြား လူကြိုက်များတဲ့ အလှစိုက်ပင်ဖြစ်ပါတယ်။ ၎င်းရဲ့မူရင်းဒေသတော့ လက်တင်အမေရိကနိုင်ငံတွေပဲ ဖြစ်ပါတယ်။ အရွက်တွေကအရောင်အသွေးစုံပြီး မျိုးကွဲများစွာရှိတဲ့အပြင် နှစ်ရောင်စပ်မျိုးတွေကတော့ ပိုပြီးလူကြိုက်မျာ းကြပါတယ်။ ဒီအပင်ဟာ ဆင်နားရွက်ပိန်းအပင် (Elephant’s Ear) နဲ့လည်း အတူတူပဲ ဖြစ်ပါတယ်။ 

 မတော်တဆ စားမိခဲ့ရင်တော့ အော့အန်တာမျိုးတွေ၊ ဓာတ်မတည့်တာမျိုးတွေ ဖြစ်နိုင်ပါတယ်။ 

၇။ ကြွေလိပ်ပြာ (Persian Cyclamen) 

ဒီအပင်လေးတွေဟာ အသဲပုံစံအရွက်လေးတွေနဲ့ လိပ်ပြာပုံစံရှိတဲ့ ရောင်စုံပန်းပွင့်လေးတွေကြောင့် အပင် စိုက်ပျိုးသူတွေကြား ထင်ရှားတဲ့ပန်းပင်တွေဖြစ်ပါတယ်။ ပန်းတွေဟာ ဆောင်းရာသီမှာ အဓိကဖူးပွင့်ကြပါတယ်။ မူရင်းဒေသတွေကတော့ တူရကီ၊ အစ္စရေးလ်၊ လက်ဘနွန်၊ ပါလက်စတိုင်းနဲ့ ဂျော်ဒန်နိုင်ငံတွေပဲ ဖြစ်ပါတယ်။ 

 အပင်အစိတ်အပိုင်းတွေ မတော်တဆစားခဲ့မိရင်တော့ အော့အန်ခြင်း၊  ဝမ်းလျှောခြင်းနဲ့ ယားယံခြင်းတို့ကို ဖြစ်စေနိုင်ပါတယ်။ 

၈။ ရွှေလာငွေလာ (Golden Pothos)  

ဒီအပင်ကတော့ လူတိုင်းနီးပါးသိတဲ့အပင်ပါ။ နေအိမ်တွေ၊ ရုံးခန်းတွေနဲ့ စားသောက်ဆိုင်တွေမှာ အလှဆင် စိုက်ပျိုးကြတာ များပါတယ်။ ရွှေလာငွေလာပင်တွေဟာ စိုက်ပျိုးရတာလွယ်ကူသလို တော်တော်လေး အကြမ်းခံတဲ့အပြင် ပွားများဖို့လည်းလွယ်ကူတဲ့ အလှစိုက်အပင်အမျိုးအစားဖြစ်ပါတယ်။ တော်ရုံအနေအထား လောက်နဲ့ မသေနိုင်သလို အမှောင်ထဲမှာပါ ရှင်သန်နိုင်လို့ နတ်ဆိုးရဲ့အိုင်ဗီ (Devil’s Ivy) လို့လည်း အပင် စိုက်ပျိုးသူတွေကြား ချစ်စနိုးနဲ့ ခေါ်ဆိုကြပါတယ်။ 

သူ့ကိုကလေးတွေနဲ့ တိရိစ္ဆာန်လေးတွေ မတော်တဆစားခဲ့မိရင် အော့အန်ခြင်း၊ ခံတွင်းယားယံခြင်းနဲ့ အစာမျိုချရ ခက်ခဲခြင်းတို့ဖြစ်စေနိုင်တာမို့ သတိပြုသင့်ပါတယ်။ 

၉။ ခရစ်စမတ်ပင်၊ ပွင့်တူရွက်တူ (Poinsettia)  

ဒီအပင်တွေကိုတော့ ခရစ်စမတ်ပင်ရယ်လို့ အလှပန်းပင်စိုက်ပျိုးသူတွေကြားမှာ ခေါ်ဆိုကြပါတယ်။ ဒါ့အပြင် ပွင့်တူရွက်တူ၊ ဂနိုင့်ကျက်သရေ စသည်ဖြင့်လည်း ခေါ်ဆိုကြပါသေးတယ်။ မူရင်းဒေသကတော့ မက္ကဆီကို နိုင်ငံဖြစ်ပါတယ်။ အပင်ရဲ့မူလပုံစံကတော့ အလေ့ကျပေါက်တဲ့ ပေါင်းပင်၊ ချုံပင်အမျိုးအစား ဖြစ်ပါတယ်။ ယနေ့ ခေတ်မှာတော့ အလှစိုက်အပင်အဖြစ်  အနောက်နိုင်ငံတွေမှာ လူကြိုက်များတဲ့ ပန်းပင်ဖြစ်နေပါတယ်။

ဒီအပင်အစိတ်အပိုင်းတွေကို တိရိစ္ဆာန်လေးတွေ စားခဲ့မိရင်တော့ အဆိပ်သင့်မှုမြင့်မားနိုင်ပါတယ်။ ဒီအပင်မှာ အဆိပ်ရှိပစ္စည်းပါဝင်တဲ့အတွက် အန္တရာယ်ရှိပြီး အပင်ကထွက်တဲ့ အစေးလောင်ခဲ့မယ်ဆိုရင် အရေပြားပူတာတွေ၊ ယောင်ရမ်းတာတွေကို ဖြစ်စေနိုင်ပါတယ်။ 

ဇင်ထူးနိုင် 

ကိုးကားချက်  - http://www.picturethisai.com 

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

 


ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...
Read more Facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်