အကြိမ်ကြိမ် ရိတ်သိမ်းနိုင်တဲ့ နှစ်ရှည်စပါးတစ်မျိုးကို တရုတ် မိတ်ဆက်

တရုတ်အစိုးရဟာ အကြိမ်ကြိမ် စိုက်ပျိုးစရာမလိုဘဲ နှစ်များစွာ ရိတ်သိမ်းလို့ရနိုင်တဲ့ နှစ်ရှည်စပါးမျိုးသစ်တစ်မျိုးကို တောင်သူလယ်သမားတွေ စမ်းသပ်စိုက်ပျိုးလာအောင် အားပေးလှုံ့‌ဆော်လျက်ရှိပါတယ်။

ပြီးခဲ့တဲ့လတုန်းက တရုတ်စိုက်ပျိုးရေးနဲ့ ကျေးလက်ရေးရာဝန်ကြီးဌာနက စိုက်ပျိုးထုတ်လုပ်ခဲ့တဲ့ လက်ရွေးစင်စပါးမျိုးတွေထဲမှာ မိရိုးဖလာမျိုးထက် ထွက်နှုန်းနှစ်ဆ ပိုထွက်တဲ့ နှစ်ရှည်မျိုးတစ်မျိုးလည်း ပါဝင်ခဲ့ပါတယ်။

ဒီစပါးဟာ နှစ်ရှည်ပင်အဖြစ် စိုက်ပျိုးဖို့ အလားအလာရှိတဲ့ တစ်ခုတည်းသော မျိုးဖြစ်တယ်လို့ ယူနန်တက္ကသိုလ်နဲ့ ပူးပေါင်းပြီး ဒီစပါးကို ထုတ်လုပ်ခဲ့တဲ့ ရှန်ဇန်မြို့အခြေစိုက် BGI Research သုတေသနလုပ်ငန်းက ထုတ်ပြန်ပါတယ်။

ပုံမှန်ဆိုရင် စပါးကို တစ်နှစ်တစ်ခါ ပြန်လည်စိုက်ပျိုးနေရပေမဲ့ ဒီနှစ်ရှည်မျိုးကတော့ ပြန်စိုက်စရာ မလိုတာကြောင့် စရိတ်စက သက်သာ၊ လုပ်သားလိုအပ်ချက် လျော့နည်းပြီး သဘာဝပတ်ဝန်းကျင်အတွက်လည်း ပိုကောင်းနိုင်တယ်လို့ သိပ္ပံပညာရှင်တွေက ပြောပါတယ်။

BGI Research ရဲ့ အကြီးအကဲ သိပ္ပံပညာရှင် Liu Huan က နှစ်ရှည်စပါးတီထွင်နိုင်ခြင်းဟာ လုံးလုံးလျားလျား အပြောင်းအလဲတစ်ခု ဖြစ်တယ်လို့ ပြောပါတယ်။

"စက်မှုလယ်ယာ အသုံးမပြုနိုင်တဲ့ နေရာတွေ၊ လုပ်သားပြတ်လပ်တဲ့ နေရာတွေနဲ့ မြေယာများစွာ အသုံးမချရသေးတဲ့နေရာတွေ ရှိနေပါတယ်။ ဒီစပါးမျိုးနဲ့ဆိုရင် လှပ်ထားတဲ့မြေတွေကို ကောင်းကောင်း အသုံးချနိုင်ပါတယ်။ ဒါကြောင့်လည်း စိုက်ပျိုးရေးဝန်ကြီးဌာနက ဒီစပါမျိုး စိုက်လာအောင် အားပေးနေတာဖြစ်ပါတယ်" လို့ ၎င်းက ပြောပါတယ်။

သိပ္ပံပညာရှင်တွေဟာ ကောက်ပဲသီးနှံပင်ကို အကြိမ်ကြိမ် ပြန်စိုက်စရာမလိုဘဲ နှစ်ရှည် အထွက်ရရှိစေမဲ့ အယူအဆကို ၁၉၃၀ ပြည့်လွန်နှစ်လောက်က စတင်ကြံဆခဲ့ကြတာပါ။ ဒါပေမဲ့ ဒီအယူအဆအပေါ် အခြေခံပြီး တိုးတက်အောင် လုပ်ဆောင်နိုင်ခဲ့တာကတော့ ၁၉၈၀ နောက်ပိုင်းမှ ဖြစ်ပြီး ဂျုံ၊ ပြောင်းဖူးနဲ့ စပါးနှစ်ရှည်မျိုးတွေကို ကမ္ဘာတစ်ဝန်းမှာ စမ်းသပ်လာခဲ့ကြပါတယ်။

စိုက်ပျိုးရေးဝန်ကြီးဌာနက မိတ်ဆက်လာတဲ့ ယခုမျိုးကို ယူနန်တက္ကသိုလ်လက်အောက်ရှိ စိုက်ပျိုးရေးကောလိပ် ပါမောက္ခတစ်ဦးဖြစ်တဲ့ Hu Fengyi က တီထွင်ခဲ့တာဖြစ်ပါတယ်။

ဒီစပါးမျိုးကို တောင်သူတွေဆီ ပထမဆုံး စိုက်ပျိုးစေခဲ့တာက ၂၀၁၈ ခုနှစ်အတွင်း နိုင်ငံအနောက်တောင်ပိုင်းပြည်နယ်တွေထဲမှာ ဖြစ်ပြီး အထွက်နှုန်း တစ်ဟက်တာ ၁၅ တန်အထိ ရှိခဲ့ရာ မိရိုးဖလာမျိုးတွေရဲ့ ပျမ်းမျှအထွက်နှုန်းထက် နှစ်ဆကျော် ပိုများခဲ့ကြောင်း China Rice Data Centre ရဲ့ ထုတ်ပြန်ချက်အရ သိရပါတယ်။

ဒါ့အပြင် နှစ်ရှည်စပါးဟာ စိုက်ပျိုးရေးသွင်းအားစုစရိတ်ကို ၅၀ ရာခိုင်နှုန်းကျော် သက်သာစေပြီး သီးနှံစီမံရတာလည်း လွယ်ကူစေကြောင်း Hu လုပ်ခဲ့တဲ့ သုတေသနအရ သိရပါတယ်။

စတင်စိုက်ပျိုးတဲ့ ပထမနှစ်မှာတော့ အခြားတစ်သီးစားမျိုးတွေနည်းတူ စရိတ်ကုန်ကျပေမဲ့ နောက်နှစ်တွေမှာ မျိုးစေ့စရိတ်၊ စိုက်စရိတ်နဲ့ ထွန်ယက်စရိတ်တွေ သက်သာတာကြောင့် တောင်သူလယ်သမားတွေဟာ တစ်ရာသီကို ဒေါ်လာ ၁၄၀၀ လောက်အထိ ချွေတာနိုင်တယ်လို့ HU ရဲ့ သုတေသနက တွေ့ရှိခဲ့ပါတယ်။

အမေရိကန်ပြည်ထောင်စုရှိ ကိုလိုရာဒိုပြည်နယ်တက္ကသိုလ်က ဂေဟဗေဒပညာရှင် Laura van der Pol ကလည်း နှစ်ရှည်စပါး စိုက်ပျိုးခြင်းဟာ အစားအစာကို ရေရှည်တည်တံ့စွာ ထုတ်လုပ်နိုင်စေပြီး စိုက်ပျိုးရေးကြောင့် ဖြစ်တတ်တဲ့ ဘေးထွက်ဆိုးကျိုးတွေကိုလည်း လျော့နည်းစေနိုင်တယ်လို့ ပြောပါတယ်။

"နှစ်ရှည်ပင်တွေဟာ အကြောင်းအမျိုးမျိုးကြောင့် မြေတိုက်စားမှုကို သက်သာစေနိုင်ပါတယ်။ အပင်တွေဟာ အခင်းထဲမှာ နှစ်များစွာ ဆက်လက်ကြီးထွားနေတာကြောင့် မြေပြင်ရတာ နည်းပါတယ်။ ဒါကြောင့် စက်ယန္တရားတွေနဲ့ မြေကို ထိုးကော်ပြီး အနှောင့်အယှက်ပေးရတာ သိပ်မရှိတော့ပါဘူး" လို့ ၎င်းက ပြောပါတယ်။

အပင်အမြစ်တွေ မြေကြီးထဲမှာ တစ်နှစ်ပတ်လုံး ကြီးထွားနေခြင်းကလည်း မြေဆီလွှာကို ထိန်းသိမ်းပေးပြီး ပြန်လည်ဖွံ့ဖြိုးလာအောင်လည်း ကူညီပေးနိုင်ပါတယ်။ ဒါ့အပြင် နှစ်ရှည်ပင်တွေဟာ ပေါင်းမြက်ကို လျော့နည်းစေတဲ့အပြင် အပင်ကြီးရင့်လာချိန်မှာ မြေတွင်းသက်ရှိစုံလင်ဖြစ်တည်မှုကို အားပေးပြီး အော်ဂဲနစ်ပစ္စည်း‌တွေကို စုစည်းစေနိုင်ပါတယ်။

ဒါပေမဲ့ နှစ်ရှည်ကောက်ပဲသီးနှံတွေမှာ အချိန်ကြာလာတာနဲ့အမျှ သီးနှံဖျက်ပိုးနဲ့ ရောဂါတွေ စုဝေးလာနိုင်တာကြောင့် အခြားသီးနှံနဲ့ ရောပြီး သီးညှပ်စိုက်ပျိုးသင့်တယ်လို့ van der Pol က ပြောပါတယ်။

လက်ရှိအချိန်အထိ နှစ်ရှည်စပါးကို တရုတ်နိုင်ငံတောင်ပိုင်းက နေရာ ၁၁၇ ခုမှာ စိုက်ပျိုးထားပြီး စိုက်ဧရိယာ ဧက ၄၀၀ ကျော်လောက် ကျယ်ဝန်းပါတယ်။ ဒီစပါးမျိုးကို ယူဂန္ဓာ၊ အီသီယိုးပီးယား၊ လာအို၊ မြန်မာနဲ့ ဘင်္ဂလားဒေ့ရှ်တို့အပါအဝင် အာရှနဲ့ အာဖရိက ၁၇ နိုင်ငံမှာလည်း မိတ်ဆက်ထားကြောင်း BGI Research က ထုတ်ပြန်ပါတယ်။

"တရုတ်ဟာ နိုင်ငံရဲ့စိုက်ပျိုးမြေ ဆယ်ရာခိုင်နှုန်းအောက်ကိုသာ သုံးပြီး ကမ္ဘာ့စပါး လေးပုံတစ်ပုံကို ထုတ်လုပ်လျက်ရှိပါတယ်။ နှစ်ရှည်စပါး စိုက်ပျိုးခြင်းအားဖြင့် သွင်းအားစုစရိတ် ချွေတာနိုင်တယ်၊ အထွက်မြှင့်တင်နိုင်တယ်၊ သဘာဝပတ်ဝန်းကျင် အကျိုးကျေးဇူး‌တွေလည်း ရှိတယ်။ ဒါကြောင့် နှစ်ရှည်စပါးဟာ လယ်သမားတွေအတွက် လုံးလုံးလျားလျား အပြောင်းအလဲတစ်ခု ဖြစ်လာနိုင်ပါတယ်" လို့ Liu က ပြောပါတယ်။

ဝေယံဟိန်း (B.Ag)

Ref: China urges farmers to consider new variety of perennial rice - South China Morning Post

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

စပါးစိုက်ပျိုးဖို့ ပြင်နေကြပြီလား? ဒါဆို Farm Link ရဲ့ အထူး special product တွေနဲ့ မိတ်ဆက်ပေးလိုက်ပါတယ်.. 👉 Erase (အီရေစ့်) က ပေါင်းပင်တွေကို သေစေရုံတင်မကဘဲ နောက်ထပ် ပေါင်းသတ်ဆေး ထပ်ဖျန်းစရာ မလိုလောက်အောင်ကို ပေါင်းပေါက်ရောက်မှုကို ထိထိရောက်ရောက် ဟန့်တားပေးနိုင်ပါတယ်။ 👉 စမတ်သီးစုံဆိုတာ အပင်တိုင်းအတွက် အဓိကအာဟာရNPK (19:7:8)နဲ့ #ဟူးမစ်အက်စစ်တို့ အချိုးကျ ပေါင်းစပ်ထားတဲ့ ကွန်ပေါင်းဓာတ်မြေဩဇာဖြစ်ပါတယ်။ အဓိကအကျိုးကျေးဇူးတွေအနေနဲ့ကတော့ နိုက်ထရိုဂျင် 19%ပါဝင်တဲ့အတွက် ကလိုရိုဖီးလ်ဖွဲ့စည်းမှုကို အားပေးကာ သီးနှံပင်များ၏အရွက်များစိမ်းလန်းသန်စွမ်းပြီး အစာချက်လုပ်မှုအားကောင်းစေပါတယ်။ 👉 ဆလက်ပလက်စ်ဆိုတာ စပါးဆစ်ပိုး (Rice stem borer) ၊ စပါးရွက်လိပ်ပိုး(Rice leaf folder)၊ စပါးငမြောင်တောင်ပိုး( Rice armyworm) စတဲ့ စပါးဖျက်ပိုးတွေကိုလည်း ၇၀%အထိကို ကာကွယ်နှိမ်နင်းနိုင်ပါတယ်။ 👉စပါးနှံတွေ ထွက်လာခါမှ ဂုတ်ကျိုးရောဂါကြောင့် အနှံဖြူပြီး ပျက်စီးသွားတာဟာ တောင်သူတို့အတွက် အကြီးမားဆုံး ဆုံးရှုံးမှုပါပဲ။ ဒီဆုံးရှုံးမှုကို အမြစ်ပြတ် တားဆီးဖို့ဆိုရင် ရှူးဝါး ကိုသာ သတိရလိုက်ပါ။ 👉စပါးခင်းမှာ ရွက်ဖျားဝါပြီး မီးလောင်သလို အကွက်လိုက်ဖြစ်ကာ တဖြည်းဖြည်းခြောက်လိုက်လာပြီဆို အဲ့ဒါကိုဖြုတ်လောင်ခြင်း (hopper burn)လို့ခေါ်ပါတယ်။ မထိန်းချုပ်နိုင်အောင် ဆိုးဆိုးရွားရွာကျရောက်ပါက အထွက်နှုန်းကို ရာနှုန်းပြည့်ထိ ဆုံးရှုံးစေနိုင်တာတာကို ဗိုက်တာဂရိုကိုသာ ထိန်းချုပ်နိုင်တာပါ