ဧည့်မထဆန်တစ်ပြည်ကို ၂၅၀၀ ကျပ်နှုန်းနဲ့ ရန်ကုန်မြို့နယ် (၁၇) မြို့နယ်ရှိ ဆန်ဆိုင် (၄၂) ဆိုင်မှာ ဩဂုတ်လ ၂၅ ရက် ဒီနေ့ကစပြီး စတင်ရောင်းချသွားမယ်လို့ မြန်မာနိုင်ငံဆန်စပါးအသင်းချုပ် (MRF) က မနေ့က သတင်းထုတ်ပြန်ထားတာပါ။
ဘယ်မြို့နယ်မှာရှိတဲ့ ဆိုင်တွေမှာ ဝယ်ယူနိုင်မလဲဆိုတာကိုတော့ အောက်ပါဇယားကွက်မှာကြည့်ရှုနိုင်ပါတယ်။
သက်သာဈေးနှုန်းတွေနဲ့အတူ ဩဂုတ်လ ၇ ရက်နေ့ကတည်းကစလို့ ရန်ကုန်ဝါးတန်းနဲ့ ဘုရင့်နောင်ကုန်စည်ဒိုင်တို့မှာ ပေါ်ဆန်းနဲ့ ဧည့်မထဆန်တို့ကို ရောင်းချပေးနေတာဖြစ်တယ်လို့ မြန်မာနိုင်ငံဆန်စပါး အသင်းချုပ်က ထုတ်ပြန်ထားတာပါ။
နိုင်ငံသားစိစစ်ရေးကတ်ပြားတစ်ခုလျှင် တစ်လအတွက် ပေါ်ဆန်းအမျိုးအစား ဆန်အိတ် (၁) အိတ်နဲ့ ဧည့်မထအမျိုးအစား ဆန်အိတ် (၁) အိတ်ကို ဝယ်ယူနိုင်မှာဖြစ်တယ်လို့ သတင်းထုတ်ပြန်ချက်အရ သိရပါတယ်။
ဒီလိုကုန်စည်ဒိုင်တွေကနေ ရောင်းချပေးနေသလို စက်မှုဇုန်များ၊ စက်ရုံများရှိ ဝန်ထမ်းများ၊ ကုမ္ပဏီဝန်ထမ်းများ၊ ဌာနဆိုင်ရာ ဝန်ထမ်းများအတွက်လည်း လိုအပ်ချက်အရတင်ပြလာမှုအပေါ် ရောင်းချပေးလျက်ရှိနေတဲ့အပြင် လူနေရပ်ကွက်အတွင်းသို့ ကားနဲ့လှည့်လည်ပြီး ဧည့်မထအမျိုးအစား ဆန်တစ်ပြည်လျှင် ၂၅၀၀ ကျပ်နှုန်းနဲ့ ရောင်းချနေပါတယ်လို့လည်း MRF ရဲ့ထုတ်ပြန်ချက်မှာဆိုထားပါတယ်။
Photo Crd# MRF
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။