"စိုက်ပျိုးရေးတွင် စီးပွားရေးအား နားလည်ခြင်း"

"စိုက်ပျိုးစီးပွား  ပြည်ထွန်းကား"ဟူသောဆောင်ပုဒ်အား လွန်ခဲ့သော ဆယ်စုနှစ်များကတည်းကကြားခဲ့ရပါသည်။ ၇၀%သောပြည်သူလူထုအတွက် အားဖြစ်စေသောဆောင်ပုဒ်ဟုဆိုသော်လည်း ယခုအခါ ပျက်ရယ်ပြုချင်မိသည်အထိ တောင်သူတို့၏စိတ်ထဲတွင်ဖြစ်ပေါ်နေရပါသည်။ရှေးယခင်နှစ်ပေါင်းများစွာကတည်းက စိုက်ပျိုးရေးအားလုပ်ကိုင်လာပါလျက် တောင်သူတို့၏လူနေမှုအခြေအနေများဖွံ့ဖြိုးတိုးတက်မှုနှောင့်နှေးဆဲပင်ဖြစ်သည်။အဘယ်ကြောင့်နည်း။
ကျွန်မတို့တောင်သူဦးကြီးများမညံ့ကြပါ။စိုက်ပျိုးထုတ်လုပ်မှုတွင် တစ်ဖက်ကမ်းခတ် တော်ကြသူများဖြစ်ပါသည်။ စိုက်ပျိုးနည်းပညာပံ့ပိုးမှု များသည်လည်း တောင်သူများစီသို့ အရှိန်အဟုန်နှင့်စီးဝင်လျက်ရှိပါသည်။ စိုက်နိုင်သည်။ ထုတ်နိုင်သည် အဘယ်ကြောင့်အမြတ်မရကြပါသနည်း။
ကျွန်မတို့တောင်သူများရောင်းတတ်ရန်လိုနေပါပြီ။ ရောင်းတတ်သည်ဆိုရာတွင် မသမာသောနည်းလမ်း များကိုတော့ရှောင်ကြဉ် သင့်သည်။ စား၊ ဝတ်၊ နေရေးဟူသော အရေး (၃)ပါးတွင် ပထမဆုံးလိုအပ်ချက်ဖြစ်သော စားရေးတွင် တောင်သူဦးကြီးများသည် အရေးကြီးဆုံးနေရာတွင် ပါဝင်နေကြသည်။ စားသုံးသူတို့၏ လိုအပ်ချက်များအား လိမ္မာပါးနပ်စွာ အချိန်ကိုက် သိရှိခြင်းအားဖြင့် စီမံခန့်ခွဲတတ်ခြင်းသည် စိုက်ပျိုးစီးပွားတွင် အဓိကကျသောအချက်တစ်ခုဖြစ်ပါသည်။
စိုက်ပျိုးရေးနှင့်ဆိုင်သော စီးပွားရေးဟူသည် လယ်ယာလုပ်ငန်းခွင် တစ်ခုအားကောင်းစွာလည်ပတ်ရန် မည်ကဲ့သို့ စီမံခန့်ခွဲရမည်ကို သိရှိခြင်းပင်ဖြစ်ပါသည်။ ထိုအထဲတွင် ဈေးကွက်ရလာရန်ဖန်တီးမှုများ၊ စိုက်ပျိုးအသုံးစရိတ်စီမံခန့်ခွဲမှုများ၊ သယ်ယူပို့ဆောင်မှုအဆင့်ဆင့်တွင်အလေ့အလွင့်နည်းစေခြင်းများ၊ ယှဉ်ပြိုင်ဈေးကွက်၏မာယာများ၊ စသည့်အကြောင်းအရာတို့အား  စိုက်ပျိုးထုတ်လုပ်သူ တောင်သူဦးကြီးများသိထားရန်လည်းလိုအပ်ပါသေးသည်။
ထိုသို့သော ဗဟုသုတများနှင့်စိုက်ပျိုးထုတ်လုပ်မှုကို လုပ်ကိုင်ကြရာတွင်လည်း လေ့လွင့်ဆုံးရှုံးမှုများနည်းစေရန်လည်း ဂရုစိုက်သင့်ပါသည်။ ဥပမာ-ရှားပါးသယံဇာတများဖြစ်သည့် ရေချိုအရင်အမြစ်များ၊ စိုက်ပျိုးမြေများ စသည့် အဖိုးတန်သဘာဝပတ်ဝန်းကျင်အားလည်း ထိန်းသိမ်းရင်းလုပ်ဆောင်သင့်ပါသည်။ သို့မှသာ  အတ္တဟိတ နှင့် ပရဟိတ ၂ မျိုးလုံးအား မျှတစွာဖော်ဆောင်သည့် စစ်မှန်သော စိုက်ပျိုးရေးလုပ်ငန်းဟု ဆိုနိုင်မည်ဖြစ်ပါသည်။
စိုက်ပျိုးရေးလုပ်ငန်းတစ်ခုအား စီးပွားဖြစ်ထုတ်လုပ်သည့်အခါ စိုက်ပျိုးစီးပွားဆိုင်ရာ အယူအဆတစ်ချို့အားလည်း နားလည်ရန်လိုအပ်ပါသည်။ ထည့်သလောက် ပြန်မရနိုင်သည့် သဘောတရားများ စိုက်ပျိုးထုတ်လုပ်မှုတွင် ရှိပါသေးသည်။ ထည့်သလောက် ထွက်မည်ဆိုပါက လယ်တစ်ကွက်ထဲမှပင် တစ်နိုင်ငံလုံးစာအတွက် ထုတ်လုပ်တော့မည်ဖြစ်ပါသည်။ ဤသို့သော ဗဟုသုတများဖြင့် စိုက်ပျိုးစရိတ်အားကောင်းစွာ စီမံခန့်ခွဲသင့်ပါသည်။
ထို့ပြင် စိုက်ပျိုးထုတ်လုပ်မှုအား စီးပွားဖြစ်လုပ်ကြရာတွင် စဉ်းစားလုပ်ဆောင်စရာများလည်းရှိ ပါသေးသည်။
၁။ စားသုံးသူတို့လိုချင်သောအရာနှင့် ထိုအချိန်အား ကောင်းစွာခန့်မှန်းကာ မည်သို့သော သီးနှံကိုစိုက်မည်နည်း။
၂။ စိုက်မည့်သီးနှံ စဉ်းစားရွေးချယ်ပြီးပါက မည်သို့ထုတ်လုပ်မည်နည်း။ အထက်တွင်ဖော်ပြခဲ့သည့် သဘောတရားများ
  (ကုန်ကျစရိတ်စီမံခန့်ခွဲမှုများစသည်) ပါထည့်သွင်း စဉ်းစား စီစဉ်သင့်သည်။
၃။ ထုတ်လုပ်ပြီးပါကလည်း မည်သို့သောနည်းလမ်းများဖြင့် ဖြန်းဖြူးရောင်းချမည်နည်း။
၄။ ရောင်းချပြီးသည့်အခါတွင်လည်း ဝယ်ယူသူတို့ထပ်မံလိုချင်လာစေရန် မည်သို့မည်ပုံ လုပ်ဆောင်မည်နည်း။
၅။ ထိုသို့ လိုချင်ပါက မိမိဘက်မှ ရောင်းနိုင်မည့် အရန်ထားရှိမည် ပမာဏများအထိပါ စဉ်းစားသင့်သည်။
စသည်ဖြင့် စဉ်းစားဆုံးဖြတ်ခြင်းကို အရင်ပြုလုပ်သင့်ပါသည်။ မည်သည့်နယ်ပယ်တွင်မဆို ကြိုတင်ပြင်ဆင်ထားသူသည် ပြိုင်ပွဲတစ်ဝက်အား နိုင်ထားသည့်သူဖြစ်သည်ဟူ၍လည်း မှတ်သားဖူးပါသည်။ ကျွန်မတို့တောင်သူများသည်လည်း စိုက်ပျိုးထုတ်လုပ်ခြင်များမလုပ်မီ ကြိုတင်စဉ်းစားခြင်းဖြင့် အောင်မြင်သော စိုက်ပျိုးရေးလုပ်ငန်းရှင်ကြီး များဖြစ်လာစေရန် ရည်ရွယ်လျက် ရေးသားဖော်ပြလိုက်ရပါသည်။

ကြိုးစားပါအုံမည်....