အော်ရီဂန်နို(တောရှုံးပင်)

အော်ရီဂန်နိုပင်သည် နှစ်ရှည်သီးနှံပင်ဖြစ်ပြီး၊ အပူချိန် ၂၀ ဒီဂရီဖာရင်ဟိုက် (ရေခဲအမှတ်အောက်) မှ အပူချိန် ၄၀ ဒီဂရီဖာရင်ဟိုက် အတွင်းဖြစ်ထွန်းသည်။ အရွက်နှင့် အပွင့်တို့ကို စားသုံးရပြီး အပင်အမြင့် ၁၂-၂၄ လက်မနှင့် အကျယ် ၂၄-၄၀ လက်မရှိသည်။

မြေထဲပင်လယ်ဒေသ၌ ကူးဆင်းဟင်းလျာများတွင် အထူးပါဝင်သော ပစ္စည်းတစ်မျိုးဖြစ်သည်။ အပင်သည် မြေတွင်ပြန့်နေသော ချုံပုတ်သဖွယ်ရှိပြီး၊ အရွက်များမှ စိတ်ရွှင်လန်းဖွယ်အနံ့ ရှိသည်။ ပန်းပွင့်များမှာ သေးငယ်ပြီး အပြာရောင်၊ ပန်းရောင်၊ အဖြူရောင်ရှိသော ကျည်တောက်ပုံ ဖြစ်သည်။ အရွက်၏အနံ့မှာ ဟင်းလျာမျိုးစုံနှင့် လိုက်ဖက်သည်။ ကြက်ဥနှင့်ချိ(စ်)၊ ကြက်သွန်ဖြူ၊ ပင်စိမ်း၊ သံလွင်ဆီတို့နှင့်မူ ဆိုဘွယ်ရာမရှိ လိုက်ဖက်သည်။

မိမိစိုက်ပျိုးသော ဟင်းခတ်အမွှေးအကြိုင်ပင်များသည် မိမိသုံးရန် ပိုလျှံနေလျှင်ဖြစ်စေ၊ တာရှည်စွာသိုလှောင်လိုလျှင်ဖြစ်စေ၊ ဈေးကွက်သို့ပို့ရန်ဖြစ်စေ၊ အခြောက်လှန်းခြင်းနှင့် အေးခဲခြင်းနည်းလမ်းများဖြင့် တာရှည်ခံအောင်ပြုလုပ်ရသည်။

အရွက်နှင့်အပွင့်များကို အခြောက်လှန်းခြင်း

အရွက်များကို ချိတ်ဆွဲထားပေးခြင်း၊ အခြောက်လှန်းသောစင်ပေါ်မှ ဗန်းတွင်ဖြန့်ချထားခြင်း၊ အခြောက်ခံစက် (Dehydrator) သုံးခြင်းတို့ဖြင့် ခြောက်အောင်ပြုလုပ်နိုင်သည်။ အခြောက်ခံသောအခန်း သို့မဟုတ် ခြောက်ပြီးသိုလှောင်သောအခန်းသည် မှောင် (အလင်းရောင်မရှိ) ရသည်။ ခြောက်သွေ့နေရသည်။ နွေးနေရသည်။ လေဝင်လေထွက် ကောင်းနေရသည်။

ပျက်ဆီးနေသော သို့မဟုတ် အိုဟောင်းနေသောအရွက်နှင့် အပွင့်များကို ပယ်ပစ်ရသည်။ ရိတ်သိမ်းစဉ်က မြေကြီးပေကျံနေသော အစိတ်အပိုင်းကို ရေအေးနှင့် အနည်းငယ်ဆေးကြောပြီး အခြောက်ခံရသည်။ ရိတ်သိမ်းထားသမျှကို ရေဆေးရန် မဟုတ်ချေ။

အပင်ငယ်များ၊ အကိုင်းများကို ချိတ်ဆွဲ၍ အခြောက်လှန်းနိုင်သည်။ အခြောက်လှန်းရန်အတွက် အပင်ငယ်များ၊ အကိုင်းအခက်များ၏အရင်းပိုင်းကို ညီညာအောင်ထားပြီး စု၍စည်းရသည်။ အနေတော်အရွယ်ရှိအစည်းများကို ဇောက်ထိုးချိတ်ဆွဲရသည်။ အကယ်၍ အခြောက်ခံကိရိယာ (Dehydrator) ကိုအသုံးပြုလျှင် ညွှန်ကြားချက် (Instruction) အတိုင်းဆောင်ရွက်ရသည်။ အရွက်များကို အပင်မှခူးဆွတ်၍ အရွက်ချည်း အခြောက်လှန်းလျှင် ပိုမို၍မြန်နိုင်သည်။

ဟင်းခတ်အမွှေးအကြိုင်တို့၏ အရွက်နှင့်အပွင့်တို့သည် ကြွပ်ရွနေလျှင် ခြောက်ပြီဖြစ်သည်။ အပင်ပေါ်တွင် ခြောက်နေသောအရွက်များကို အသာအယာခူးယူ၍ စက္ကူအခြောက်ပေါ် တင်ထားပြီးမှသာ သိုလှောင်ရသည်။ လာဗင်ဒါရေမွှေးပန်းကဲ့သို့သော အမွှေးအကြိုင်ပင်ကို ပန်းပွင့်များ မခူးဘဲ ထားနိုင်သည်။

ဒေါက်တာချစ်၏ စားဖို့ စိုက်စို့ ဈေးကွက်တိုးချဲ့ဗျို့ အတွဲ(၂) စာအုပ်မှ ကောက်နုတ်ဖော်ပြပါသည်။