ဝက်အလေးချိန်ကို မချိန်ကြည့်ဘဲ သိနိုင်မယ့်နည်းလမ်းနှင့် တစ်ပတ်အတွင်း စိတ်ဝင်စားစရာအမေးအဖြေများ

မင်္ဂလာပါရှင့်

စိတ်ဝင်စားစရာ အမေးအဖြေတွေကို လေ့လာရမဲ့ စနေနေ့လေး ပြန်လည် ရောက်ရှိလို့လာပါပြီ။

ဒီတစ်ပတ်မှာတော့ မုန်တိုင်းလာမယ်ဆိုပြီး ခန့်မှန်းချက်တွေရှိနေတော့ တောင်သူတချို့ စိုက်သင့်မစိုက်သင့် ဝေခွဲရခက်နေတဲ့ မေးခွန်းလေးနဲ့ပဲ စတင်လိုက်ပါမယ်။

၁။ မေး (amo) မဂ်လာပါ ဆရာတို့၊ တောင်ယာသီးနှံအတွက် မိုးဦးကာလ မုန်တိုင်းမဝင်ခင်အချိန်နဲ့ မုန်တိုင်းဝင်ပြီးအချိန် ဘယ်အချိန်စိုက်တာ ပိုသင့်တော်ပါသလဲခင်ဗျာ။

ဖြေ (  ဒို့ဦးလေး) - မုန်တိုင်း က ဘယ်အချိန်လာမယ်၊ ဘယ်လောက်ပြင်းထန်မယ်ဆိုတာ.. ပညာရှင်တွေတောင် အနီးကပ်မှသိရတာပါ။ တောင်ယာသီးနှံတွေက၊ မိုးဦးကျ အစိုဓာတ်လေးနဲ့ အသက်ဆက်ရတာမို့. မိုးဦးကျပြီးတာနဲ့ စိုက်သင့်ပါပြီ။ အချို့ဒေသတွေမှာ အခြောက်ကြဲထားကြပါတယ်။ ပေါင်းအုပ်ဆေးကို မိုးရွာပြီးတာနဲ့ ဖျန်းပါ။

ဒီမေးခွန်းလေးကတော့ မြေချဉ်တာကို သက်သာအောင် EM..လိုမျိုးအားဆေးမျိုးနဲ့ ပြုပြင်၍ မရနိုင်ကြောင်း တခြားဦးကြီးတွေပါ သိရှိစေဖို့အတွက် ဖော်ပြပေးလိုက်ရပါတယ်ရှင့်။

၂။ မေး ( Ye Kyaw) - စပါးမစိုက်မီ လယ်ထွန်ယက်နေချိန် EM နဲ့ ငါးအမိုင်နိုအသုံးပြုခြင်းက မြေချဥ်တာကိုလျော့ကျစေနိုင်ပါသလား။

ဖြေ (ဒို့ဦးလေး) - မြေချဥ်တာကို လျှော့ချဖို့လုပ်ဆောင်ပေးတာထက်၊ မြေငံကို ချဥ်အောင် ပိုပြုလုပ်ပေးနိုင်ပါလိမ့်မယ်။ သေချာတာကတော့၊ အီးအမ် ၊ ငါးအမိုင်နိုက အပင်ဖျန်းတာ၊ အပင်ခြေ ဖျန်းတာက ပိုကောင်းပါလိမ့်မယ်။

(ဖုန်းမာန်တိုး) - ငါးအမိုင် နိုကော အီးအမ်သည် အချဉ်ဓာတ် သဘောရှိတဲ့အတွက် သဘာဝမြေဆွေး သို့ နွားချေးစတာတွေနဲ့ရော၍ သုံးပေးတာ ပိုအဆင်ပြေပါတယ်ခင်ဗျ။

ဒီမေးခွန်းလေးကတော့ ပိုးအကြောင်းကို ယေဘုယျအနေနဲ့ မှတ်ထားလို့ရအောင် ထည့်သွင်းဖော်ပြပေးလိုက်ပါတယ်။

၃။ မေး (အာကာစိုး) -အပမ်း မကြီးရင် ဘယ်ပိုးကျရင် ဘယ်လက္ခဏာတွေစဖြစ်လဲ ပြောပြပေးပါလားဗျ။

ဖြေ (ဒို့ဦးလေး) - ပိုး 3 မျိုး မှတ်ထားပါ။ 1- စုပ်စားပိုး(ပျ၊ဖြုတ်၊လှေး၊ယင်ဖြူ၊ဂျပိုး..) 2-ကိုက်စားပိုး (ပိုးစိမ်းကောင်၊ ငမြောင်တောင်၊ ကျိုင်း.....) 3-ပုန်းကွယ်စားပိုး (ပွင့်ထွေး၊ သီးဖောက်၊ ပင်စည်ထိုး၊ ဆစ်ပိုး၊ မြေအောင်းပိုး...) စုပ်စားပိုးကျရင်၊အရွက်တွန့်ကုပ်မယ် ကိုက်စားပိုးကျရင် အပင်၊ အရွက်၊ အသီးတွေမှာ ကိုက်ရာ၊ ဖောက်ရာတွေ့မယ်။ ပုန်းအောင်းပိုးကမမြင်ရ။ အပင်ညှိုး၊ အပွင့်ညှိုး၊ အညွန့်ညှိုးတာတွေ့ရမယ်။

နံပါတ် ၄ မေးခွန်းက ဝက်ကို မချိန်ကြည့်ဘဲ အလေးချိန်သိနိုင်တဲ့ နည်းလမ်းမို့ စိတ်ဝင်စားစရာအလွန်ကောင်းပါတယ်။ ကတ္တားဘာညာမရှိလည်း စိတ်ပူစရာမလို ကိုယ့်ဟာကိုယ် အိမ်မှာ အကြမ်းဖျင်းလေး ချိန်ကြည့်လို့ရသွားပြီပေါ့။

၄။ မေး (ဦးရန်ကျော်မိုး) - ဝက် ၁ ကောင်ကိုမချိန်ကြည့်ဘဲ အချိန် ဘယ်လောက်ထွက်မလဲ တိုင်းတာတဲ့နည်း စနစ်လေးမျှဝေပေးကြပါခင်ဗျာ။

ဖြေ (ဇင်ဘိုလွင်) - ဝက်အလေးချိန် =( လုံးပတ်x လုံးပတ် x အလျား) ÷ 400 *လုံးပတ်ကို ရင်ညွန့်ကနေပတ်တိုင်းပါ အလျားကို နားရွက်နောက်ထိပ်ကနေ အမြီးရင်းထိပ်ထိတိုင်းပါ။ လက်မ နဲ့ တိုင်းရပါမယ် အဲ့နည်းနဲ့တိုင်းလို့ရလာတာက ပေါင်နဲ့ပါ။ ပိဿာနဲ့သိချင်ရင်တော့ ရလာတဲ့အဖြေကို ၃.၆ နဲ့ ထပ်စားပါ တွေ့မိတာလေး မျှဝေပေးတာပါ။

ပူတဲ့အချိန်မှာ ဖြစ်တတ်တဲ့ ပြဿနာလေးတစ်ခုကိုလည်း ဖော်ပြရင်း ဒီတစ်ပတ်တော့ ဒီမှာပဲ အဆုံးသတ်ပါဦးမယ်။

၅။ မေး (Chan) - ယိုးဒယား ပိန္နဲသီးတွေ အသီးကွဲအက်တာ ဘာကြောင့်လဲဗျ။

ဖြေ (ဒို့ဦးလေး) - နေပူရှိန်ပြင်းပြီး မိုးရွာရင်(သို့မဟုတ်)ရုတ်တရက် ညပိုင်းအေးရင် အသီးကွဲအက်တတ်ပါတယ်။

(ဦးသက်လွင်) - အသီးမှာရောဂါကျရောက်လျှင်၊ အပူချိန်များချိန် ရေ/မိုးရေထိလျင် အသီးကွဲအက်တတ်ပါတယ်။

ပူတော့လည်း ပူလိုက်တာ၊ ရွာတော့လည်း မုန်တိုင်းပါသယ်လာတော့မယ့် မိုး။ ဒါတွေဟာ နှစ်ပေါင်းများစွာ လူသားတွေရဲ့ ရက်စက်မှုကို ကမ္ဘာကြီးကပြန်ဒဏ်ခတ်တာလို့ပဲ ဆိုရမှာပါ။ ဒီတော့ မိုးလေးတစ်ပေါက်နှစ်ပေါက်ကျလာရင် နီးစပ်ရာ ကိုယ့်ပတ်ဝန်းကျင်မှာ အပင်ကြီးတွေစိုက်ပြီး ကာဗွန်ဒိုင်အောက်ဆိုဒ်ကို တစ်နိုင်အားနဲ့ လျှော့ချကျပါစို့နော်။

အခက်အခဲတွေအကြံဉာဏ်တွေလိုအပ်လာပြီဆိုရင် အစိမ်းရောင်လမ်းရဲ့ အမေးအဖြေကဏ္ဍမှာ အကူအညီပေးမဲ့ ဆရာတွေမျှော်နေကြောင်းနဲ့ တောင်သူတွေမေးသမျှကို စိတ်ရှည်ရှည်နဲ့ ဖြေပေးနေတဲ့ ဆရာဖုန်းမာန်တိုးလည်း မေးခွန်းတွေကို ပြန်ဖြေဖို့ ရောက်ရှိနေပြီဖြစ်ကြောင်းကိုပါ သတင်းကောင်းပေးလိုက်ပါရစေ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။