ဥနှုန်းကျဆင်းခြင်းမှာ ဘဲမျိုးရွေးချယ်မှုအပေါ် များစွာမူတည်နေ

    ဉနှုန်းကျဆင်းခြင်းမှာ ရွေးချယ်မွေးမြူထားသည့် ဘဲမျိုးအပေါ်၌ များစွာမူတည်နေကြောင်း စီးပွားဖြစ် ဘဲမွေးမြူသူများကပြောသည်။

    မျိုးမကောင်းသည့် ဘဲမျိုးဖြစ်ခြင်း၊ ခြံအဆောက်အဦကောင်းကောင်း မရှိခြင်းတို့ကြောင့် ဉနှုန်းကျဆင်းနိုင်ပြီး ဘဲမျိုးမကောင်းပါက ဘဲဥအလေးချိန် ကျဆင်းခြင်း၊ အလုံးမလှခြင်းတို့ကြုံကာ ဈေးကွက်ထိခိုက်နိုင်သည်။ 

အစာစရိတ်ကတော့ ဘဲမျိုးတိုင်း သိပ်မကွာလှပါဘူး။ ဉနှုန်းကျမကျက ဘဲမျိုးနဲ့သက်ဆိုင်ပါတယ်။ ဒေသဘဲမျိုးတွေက မျိုးဗီဇပျက်နေတော့ ဉနှုန်းတွေလည်း အားနည်းလာပါတယ်။

ဟု မကွေးတိုင်း၊ စလင်းမြို့နယ်မှ စီးပွားဖြစ် ဘဲမွေးမြူသူ ကိုအောင်ကိုဦးက ပြောသည်။

    ဘဲဥအလေးချိန် 1 kg ပိုတိုးပါက ဘဲဥပေါက်ဈေး ငွေတစ်ဆယ်ကျပ်ဝန်းကျင် ဈေးပိုရနိုင်ပြီး၊ လက်ရှိတွင် ကာကီဘဲမျိုးက ဘဲဥအလေးချိန် ပိုမိုထွက်ရှိကြောင်း သိရသည်။

ဒါ့ကြောင့် အခုနောက်ပိုင်းမှာ ယိုးဒယားကာကီဘဲမျိုးကို အများဆုံးမွေးနေကြတယ်။ မလေးကာကီဘဲမျိုးကိုလည်း စမွေးနေကြပါပြီ။ ဒေသဘဲမျိုး (ထိုင်ဝမ်ဘဲမျိုး) ကိုလည်း မွေးကြပါတယ်။ ယိုးဒယားကာကီ ဘဲမျိုးက ဘဲဥဆိုဒ် ၂၃ ကီလိုဂရမ် ရှိတဲ့ ဥမျိုးတွေအထိ ဥတတ်ပါတယ်။ ဒေသဘဲမျိုးတွေကတော့ ပုံမှန် ၁၉ ကီလိုဂရမ်၊ ၂၀ ကီလိုဂရမ်၊ ၂၁ ကီလိုဂရမ် အလွန်ဆုံးပါပဲ။ စားသုံးသူဖြစ်ဖြစ်၊ ဈေးဝယ်သူဖြစ်ဖြစ် ဘယ်သူမဆို ဘဲဥဆိုဒ်လှတာ၊ အလုံးကြီးတာ မက်ကြတာချည်းပါဘဲ။ ဘဲဥကြီးကြီးလေးလို့ အမြဲပြောဝယ်ကြတယ်လေ။

ဟု ကိုအောင်ကိုဦး က ဆက်လက်ပြောသည်။

    ဈေးကွက်တွင်း ဘဲဥ(တစ်လုံး)လျှင် (၁၈) ကီလိုဂရမ် = ၉၈ ကျပ်၊ (၁၉)ကီလိုဂရမ်=၁၀၃ ကျပ် (၁၉.၅)ကီလိုဂရမ်=၁၀၈ ကျပ်၊ (၂၀)ကီိလိုဂရမ်=၁၁၃ ကျပ်၊ (၂၀.၅)ကီလိုဂရမ်=၁၁၈ ကျပ်၊ (၂၁)ကီလိုဂရမ်=၁၂၃ကျပ်၊ (၂၁.၅)ကီလိုဂရမ်=၁၂၈ ကျပ်၊ (၂၂)ကီလိုဂရမ်=၁၃၅ ကျပ်၊ (၂၂.၅)ကီလိုဂရမ်=၁၄၀ကျပ် ဈေးနှုန်းများဖြင့် အရောင်းအဝယ် ပြုလုပ်နေကြောင်း သိရသည်။

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)