ကုန်းတွင်းဝင်ကာနီးမှ တိုင်ဖွန်းမုန်တိုင်းဖြစ်သွားသည့် TAPAH

စက်တင်ဘာလ ၈ ရက် နေ့လည် ၁၂ နာရီတွင် ရရှိသည့်ဒေတာများအရ

တောင်တရုတ်ပင်လယ်က အပူပိုင်းမုန်တိုင်း TAPAH က တရုတ်ပြည်ကမ်းခြေဘက်သို ကြိုတင်ခန့်မှန်းခဲ့သည့်လမ်းကြောင်းအတိုင်းရွေ့လျားရင်း ကမ်းခြေကိုဖြတ်ကျော်ကာနီးမှာ တိုင်ဖွန်းမုန်တိုင်းအဆင့် လေတိုက်နှုန်း 65 knots ကို ရောက်သွားပါတယ်။ တိုင်ဖွန်းမုန်တိုင်း TAPAH ဆိုတဲ့ အမည်ကို ကပ်ပြီးယူသွားနိုင်တယ်ပြောရမှာပါ။ 

မိုးလေဝသဝေါဟာရနဲ့ပြောရရင်တော့ ရုတ်တရက်အားကောင်းလာခြင်း(Rapid Intensification - RI)ဖြစ်သွားတယ်ပေါ့ဗျာ။ ကျနော်တို့အတွက်အရေးကြီးတာက မုန်တိုင်းအကြွင်းအကျန်တွေဘယ်လောက်လာမလဲ၊ ဘယ်ဒေသတွေမှာ မိုးဘယ်လောက်များများသယ်လာနိုင်မလဲဆိုတာပါ။

ဒီနေ့မနက်ရရှိပြီး ကြိုတင်ခန့်မှန်းချက်တွေအရ မူလခန့်မှန်းချက်များအတိုင်း စက်တင်ဘာလ ၁၀ ရက် မှ ၁၂ ရက်အတွင်း တစ်နိုင်ငံလုံးမှာ မိုးရွာနိုင်ပါမယ်။

🔸 ရှမ်းပြည်နယ်မြောက်ပိုင်း၊ ရှမ်းပြည်နယ်အရှေ့ပိုင်း၊ ကချင်ပြည်နယ်၊ ချင်းပြည်နယ်နဲ့ စစ်ကိုင်းတိုင်းအထက်ပိုင်းတွေမှာ နေရာကွက်ပြီး မိုးများနိုင်ပါမယ်။

🔸 ကျန်တဲ့ပြည်နယ်တိုင်းဒေသတွေမှာတော့ မိုးအနည်းငယ်မှ အသင့်အတင့်ရွာနိုင်ပါမယ်။ 

🔸 မိုးနှောင်းကာလကုန်သည်အထိ မုတ်သုံမိုးကဆက်ရွာနေပါဦးမယ်၊ မိုးအလွန်များပြီး ရေကြီးနိုင်တဲ့အခြေအနေတွေတော့ မရှိနိုင်တော့ဘူးလို့ ခန့်မှန်းရပါတယ်။

မိုးလေဝသပညာရှင် ဆရာဦးဝင်းနိုင်၏ တရားဝင်ခွင့်ပြုချက်ဖြင့် ပြန်လည်ဖော်ပြသော သတင်းဖြစ်ပါသည်။