ဧရာဝတီတိုင်းမှ စပါးရိတ်သိမ်းဆဲ တောင်သူများသို့..

ဘင်္ဂလားပင်လယ်အော်တောင်ပိုင်းနှင့် အနောက်တောင်ပိုင်းတွင် နိုဝင်ဘာလ ၂၂ မှ ၂၄ ရက်နေ့အတွင်း လေဖိအားနည်းရပ်ဝန်းတခုဖြစ်ပေါ်ရာမှ ပိုမိုအားကောင်းလာပြီး အနည်းဆုံးမုန်တိုင်းငယ် (Deep Depression) ဖြစ်လာနိုင်ပါတယ်။ ECMWF Chart များအရ ဆိုင်ကလုန်းမုန်တိုင်းဖြစ်နိုင်ချေ ၇၀% ရှိနေကြောင်းလည်းတွေ့ရပါတယ်။

ဘင်္ဂလားပင်လယ်အော်တောင်ပိုင်းမှာ GFS Model ခန့်မှန်းချက်အရ နိုဝင်ဘာ ၂၅ ရက် မှာဖြစ်လာနိုင်တဲ့ မုန်တိုင်းကြောင့် ဧရာဝတီတိုင်းတောင်ပိုင်းဒေသအချို့မှာ မိုးအနည်းငယ်ရွာနိုင်ပြီး လေပြင်းတစ်နာရီ ၁၅ မိုင်မှ မိုင် ၃၀ ခန့်အထိ တိုက်နိုင်ပါတယ်။ မြစ်ဝကျွန်းပေါ်ကမ်းရိုးတန်းအနီးပင်လယ်ကမ်းခြေမှာ လှိုင်းအမြင့် ၆ ပေ မှ ၇ ပေခန့် ရှိနိုင်ပါတယ်။ 

GFS Model ကြိုတင်ခန့်မှန်းချက်အရ တနင်္သာရီတိုင်းတောင်ပိုင်းအစွန် ကော့သောင်းခရိုင်နဲ့ မွန်ပြည်နယ် ကျိုက်ထိုခရိုင်တို့မှာ မိုးအသင့်အတင့်မှ မိုးအနည်းငယ်များနိုင်ပြီး ကျန်ပြည်နယ်တိုင်းအားလုံးမှာ မိုးအနည်းငယ်သာရွာသွန်းနိုင်ကာ ဧရာဝတီတိုင်းအနောက်ဘက် (ငွေဆောင်+ချောင်းသာ ကမ်းခြေများ)နှင့် ရခိုင်ပြည်နယ်တောင်ပိုင်း ကမ်းရိုးတန်းဒေသအချို့မှာ မိုးအနည်းငယ်နှင့် လေတိုက်နှုန်း တနာရီ ၃၀ မိုင်ခန့် တိုက်ခတ်နိုင်ပါတယ်။

ဧရာဝတီတိုင်းမှ စပါးရိတ်သိမ်းဆဲတောင်သူများ၊ ဆားလုပ်ငန်း ဆားကွင်းများမှာ မိုးအနည်းငယ်ရွာနိုင်ပါမယ်။ ပင်လယ်ပြင်မှာ လှိုင်းလေထန်လာနိုင်တာကြောင့် ရေလုပ်သားများနှင့် ကမ်းနီး/ကမ်းဝေး ပင်လယ်ပြင်ခရီးသွားများ သတိပြုနိုင်ကြပါရန်အတွက် ဆရာဦးဝင်းနိုင်မှ တင်ပြထားပါတယ်။ 

မိုးလေဝသပညာရှင် ဆရာဦးဝင်းနိုင်၏ တရားဝင်ခွင့်ပြုချက်ဖြင့် ပြန်လည်ဖော်ပြသော သတင်းဖြစ်ပါသည်။