ရေချိုငါးမုတ်(ခ) ပါကူးငါး မွေးမြူနည်း

ပါကူး(Pacu)ဟု လူသိများသော ရေချိုငါးမုတ်သည် ရေချိုငါးမွေးမြူထုတ်လုပ်ရေးတွင် ရေပန်းစားသော ငါးအမျိုးအစားတစ်မျိုးဖြစ်ပြီး မြန်မာနိုင်ငံတွင်လည်း မွေးမြူမှု များပြားပါသည်။

ရေချိုငါးမုတ်သည် ဒေသမျိုးရင်းငါး မဟုတ်ဘဲ ၎င်း၏မူရင်းဒေသမှာ တောင်အမေရိကတိုက်ရှိ ဘရာဇီးနှင့် ပီရူးနိုင်ငံတို့မှ ဖြစ်ပါသည်။

ရေချိုငါးမုတ်(ခေါ်) ပါကူးသည် တီလားပီးယားငါးကဲ့သို့ပင် မျိုးကွဲအများအပြားရှိသော ငါးအုပ်စုဖြစ်သည်။

မွေးမြူရေးတွင် အသုံးပြုသော ရေချိုငါးမုတ်မှာ သိပ္ပံအမည်အားဖြင့် Piaractus brachypomus ဟု ခေါ်ဆိုပြီး အင်္ဂလိပ်အမည် “Red-bellied pacu” ဟုခေါ်သည့် အမျိုးအစားဖြစ်သည်။
ရေချိုငါးမုတ်(Pacu)ငါးများသည် အသီးအရွက်စားငါးမျိုး(Herbivores)များဖြစ်ကြပြီး အပင်များ၏ အရွက်၊အသီးအပွင့်နှင့် သစ်စေ့များကို အဓိက စားသုံးသော်လည်း ကန်အောက်ခြေရှိ ခရုနှင့်အင်းဆက်များကိုလည်း စားသောက်လေ့ရှိပါသည်။
မွေးမြူရေးရေချိုငါးမုတ်များသည် အပူပိုင်းဒေသငါးမျိုးများကဲ့သို့ပင် အမြင့်ဆုံးအပူချိန်(၂၈-၃၀)ဒီဂရီ စင်တီဂရိတ်တွင် ကြီးထွားနှုန်းအကောင်းဆုံးဖြစ်ပြီး အပူချိန်(၁၇-၁၈) ဒီဂရီ စင်တီဂရိတ်အောက်တွင်မူ အစာစားနှုန်း လျော့ကျသွားပါသည်။ ၎င်းငါးအမျိုးအစားသည် အပူချိန်နှင့် အစာရရှိမှု မြင့်မားလေ ကြီးထွားမှု မြင့်မားလေ ဖြစ်ပါသည်။

မွေးမြူရေးတွင် ရေချိုငါးမုတ်ငါး၏ အားသာချက်များမှာ..

(က) ကြီးထွားမှု ကောင်းမွန်ခြင်း၊
(ခ) ငါးမွေးကန်အတွင်း ပျော်ဝင်အောက်ဆီဂျင်ဓာတ် လျော့နည်းမှုကို ခံနိုင်ရည်ရှိခြင်း
(ဂ) အစာအတွက် အသားဓာတ်မြင့်မားသော စျေးနှုန်းကြီးမြင့်သည့် အစာများအား ကျွေးမွေးရန်မလိုအပ်ခြင်း စသည်တို့ ဖြစ်ပါသည်။

ရေချိုငါးမုတ်ငါးများကို အစားအစာလုံလောက်စွာ ကျွေးမွေးပါက မွေးကာလ ၁ နှစ်အတွင်း ၇၅ ကျပ်သားအရွယ်ထိ ကြီးထွားနိုင်ပါ သည်။ သဘာဝအခြေအနေတွင် ၎င်းငါးသည် ၂ ပိဿာအရွယ်မှ ၄ ပိဿာအရွယ်ထိ ကြီးထွားနိုင်ပါသည်။

ရေချိုငါးမုတ်ကို မြေသားကန်ဖြင့်သာမက လှောင်အိမ်ဖြင့်ပါ အောင်မြင်စွာ မွေးမြူနိုင်ပါသည်။

မွေးမြူနည်းများမှာ-

ရေချိုငါးမုတ်(ခေါ်) ပါကူး(Pacu)ငါးအမျိုးအစားအား မြေသားကန်ဖြင့် မွေးမြူနည်းနှင့် လှောင်အိမ်ဖြင့်မွေးမြူနည်းများဖြင့် မွေးမြူလေ့ရှိကြပါသည်။
အဆိုပါငါးများသည် အခြားငါးများ၏ ရေယက်များအား ထိုးဆိတ်တတ်သော အလေ့အထရှိသည့်အတွက် ၎င်းငါးများအား အခြားငါးများနှင့် ရောရောနှောမွေးမြူခြင်း မပြုသင့်ပါ။
မြေသားကန်ဖြင့်မွေးမြူရာတွင် အနည်းငယ်တိုးချဲ့မွေးမြူနည်းစနစ်(Extensive method)ဖြင့် မွေးမြူပါက စျေးကွက်ဝင်အရွယ်ဖြစ်သော ၆၂ ကျပ်သားခန့်အရွယ်သို့ ရောက်ရှိရန် ၂ နှစ်ကြာအထိ မွေးမြူရပါသည်။
အစာကျွေးသည့်နည်းစနစ်ဖြင့် မွေးမြူပါက မွေးကာလ ၁ နှစ်အတွင်း စျေးကွက်ဝင်အရွယ်အစားသို့ရောက်ရှိအောင် မွေးမြူနိုင်ပါသည်။ငါးထည့်သွင်းနှုန်းအနေဖြင့် ၁ ဧကလျှင် ငါးကောင်ရေ ၁၀၀၀ မှ ၁၂၀၀ နှုန်း ထည့်သွင်းမွေးမြူခြင်းဖြင့် ၁ နှစ်တာကာလအတွင်း စျေးကွက်ဝင်အရွယ်သို့ ငါးများကြီးထွားနိုင်ပါသည်။
လှောင်အိမ်စနစ်ဖြင့် မွေးမြူပါက ငါးထည့်သွင်းနှုန်းအား တိုးမြှင့်ထည့်သွင်းနိုင်သော်လည်း ရေချိုငါးမုတ်ငါးများသည် ကျပ်တည်းစွာမွေးမြူလျှင် ကြီးထွားနှုန်း လျော့နည်းကျဆင်းသွားလေ့ရှိေသာ သဘာဝရှိသည့်အတွက် ငါး၏ထည့်သွင်းမွေးမြူနှုန်းအား အထူးချိန်ဆ ထည့်သွင်းရန် လိုအပ်ပါသည်။

အောက်ဆီဂျင်လျော့နည်းမှုအား ခံနိုင်ရည်ရှိခြင်း

မွေးမြူရေးကန်အတွင်းရှိ ရေတွင်ပျော်ဝင်နေသော အောက်ဆီဂျင်ပမာဏသည် ပုံမှန်အားဖြင့် ရေ၁ လီတာ (ရေသန့်ပုလင်းတစ်လုံး၏ ရေပမာဏ)တွင် ၃ မီလီဂရမ်အထက် ပျော်ဝင်လျက်ရှိပါသည်။
ရေချိုငါးမုတ်ငါးများသည် ရေ ၁ လီတာတွင် ပျော်ဝင်နေသော အောက်ဆီဂျင်ပမာဏ ၀.၅ မီလီဂရမ်သာ ပျော်ဝင်နေသော ပျော်ဝင်အောက်ဆီဂျင်လျော့နည်းသည့် အခြေအနေတွင်ပင် အသက်ရှင်နိုင်ကြောင်း တွေ့ရှိရပါသည်။

အသားဓာတ်လိုအပ်ချက်

အကောင်းဆုံးကြီးထွားမှုကို ရရှိရန်အတွက် ရေချိုငါးမုတ်ငါးများကို အသားဓာတ် ၃၅ ရာခိုင်နှုန်း ပါဝင်သော အစာတောင့်များအသုံးပြုကျွေးမွေးခြင်းအားဖြင့် ရရှိနိုင်ပါသည်။

Ref: ငါးလုပ်ငန်းစခန်းတွင် သင်တန်းတက်ခဲ့စဉ်က လေ့လာသင်ယူခဲ့သော အချက်အလက်များ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...