ကပ္ပလီပင်လယ်ပြင်တောင်ပိုင်းတွင် မုန်တိုင်းတစ်လုံးဖြစ်လာနိုင်ပြီး ဖြစ်ခဲ့ပါက မေ ၇ ရက်မှ ၁၀ ရက်အတွင်း တစ်နိုင်ငံလုံး မိုးရွာနိုင်

ကပ္ပလီပင်လယ်ပြင်တောင်ပိုင်းမှာ မုန်တိုင်းတစ်လုံးဖြစ်လာနိုင်တဲ့အခြေအနေ သေချာသလောက်နီးပါးရှိနေပြီး ဖြစ်လာပါက မေ ၇ ရက်ကနေ ၁၀ ရက်အတွင်း တစ်နိုင်ငံလုံး မိုးရွာနိုင်တယ်လို့အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင် က ပြောပါတယ်။

ကမ္ဘာလုံးဆိုင်ရာ မိုးလေဝသခန့်မှန်းဝက်ဘ်ဆိုဒ်တွေဖြစ်တဲ့ ECMWF နဲ့ GFS တို့ရဲ့ ထုတ်ပြန်ချက်တွေကို ကိုးကားပြီး ဦးဝင်းနိုင်က သုံးသပ်တာပါ။ 

“ ECMWF က ရတဲ့ နောက်ဆုံး update data အရတော့ မေလ ၇ ရက် - ၈ ရက်တွေမှာ မုန်တိုင်းက ဘင်္ဂလားပင်လယ်အော်အလယ်ပိုင်းရောက်လာမယ်၊ "ပန်းရောင်ပြထားတဲ့ ဒေသတွေ"မှာ မိုးရေချိန် ၃ လက်မ မှ ၇ လက်မအထိ ရွာနိုင်တယ်။ ရန်ကုန်မှာလည်း မိုးရေချိန် ၆ လက်မကျော်တဲ့အထိ ရွာနိုင်ကြောင်း ပြနေတယ်။ လေပြင်းတိုက်ခတ်နိုင်ခြေကတော့ တစ်နာရီ ၂၅ မိုင်နှုန်းမှ မိုင် ၃၀ အထိ ရှိနိုင်ပါတယ်” လို့ ဦးဝင်းနိုင်က သူ့ရဲ့ ဖေ့စ်ဘုတ်စာမျက်နှာကနေ သတိပေးပြောကြားထားပါတယ်။ 

မုန်တိုင်းရဲ့အခြေအနေနဲ့ပတ်သက်လို့ Green Way က ဦးဝင်းနိုင်ကို မေးမြန်းရာမှာတော့ “ သေချာသလောက်ဖြစ်သွားပြီပေါ့နော်။ ၉၀၊ ၉၅ ရာခိုင်နှုန်းလောက်ထိ သေချာသွားပြီ။ အိန္ဒိယမိုးလေဝသထုတ်ပြန်ချက်ကလည်း အဲ့ဒီအတိုင်းပဲ။ ၄ ရက်နေ့ကနေ နောက်ထပ် ၂၄ နာရီအတွင်းဆိုတော့ ၅ ရက်ပေါ့လေ။ ၅ ရက်နေ့လောက်ဆိုရင် မုန်တိုင်း ဖြစ်မယ်ပေါ့။ အဲ့ဒီဟာ ထုတ်ပြန်တာလည်း ဖြစ်ပြီဆိုတော့ ကျိန်းသေသလောက်ဖြစ်ပြီ” လို့ အတည်ပြုပါတယ်။ 

ဒီမုန်တိုင်းအရှိန် မြန်မာနိုင်ငံဘက်ကို ရိုက်ခတ်မှုမြင့်ခဲ့မယ်ဆိုရင် မုတ်သုံလည်း ဝင်လာနိုင်ပြီး မိုးဆက်သွားတာလည်း ဖြစ်နိုင်တယ်လို့ ဦးဝင်းနိုင်က ဆိုပါတယ်။

“ မုန်တိုင်းရဲ့အားနဲ့အရှိန်ကြောင့် မုတ်သုံလည်း ဝင်လာနိုင်တယ်။ စောပြီးတော့။ ဒါဆိုရင်တော့ မိုးတွင်းဖြစ်သွားမှာ။ ဒါပေမဲ့ မေလက မကုန်သေးဘူးဆိုတော့ ထုံးစံအတိုင်းဆိုရင်တော့ မုတ်သုံက ပုံမှန်ဝင်မယ်ဆိုတော့ ။ ဆိုကြပါတော့ မုန်တိုင်းက ၈ ရက်နေ့လောက်ဆိုရင် မော်တင်စွန်းဘယ်ဘက်ခြမ်းလောက်ရောက်မှာကိုး။ ဘင်္ဂလားပင်လယ်အော်ထဲမှာ။ အိန္ဒိယဘက်ကို ဝင်မှာက ၁၂ ရက် ၁၃ ရက်လောက်ဖြစ်မယ်။ မုတ်သုံပုံမှန်ဝင်မယ် ဆိုရင် နောက်အများဆုံး ၁၀ ရက်ပေါ့နော်။ မေလ ၂၁ ရက် ပတ်ဝန်းကျင်လောက်ကို မုတ်သုံဝင်မယ်ဆိုတော့ ဆက်သွားနိုင်တယ်” 

မုန်တိုင်းဟာ မြန်မာနိုင်ငံဘက်ကို ဦးတည်ရွေ့လျားမယ့်အခြေအနေရှိတာမဟုတ်ပေမယ့် မြန်မာနိုင်ငံက မုန်တိုင်းရဲ့ညာဘက်ခြမ်းမှာရှိနေလို့ မုန်တိုင်းသက်ရောက်မှုကို ပိုခံရမှာဖြစ်ပြီး အိန္ဒိယကတော့ ဘယ်ဘက်ခြမ်းမှာရှိတာမို့ သက်သာမှာဖြစ်တယ်လို့ သိရပါတယ်။

မုန်တိုင်းအရှိန်နဲ့ မေ ၇ ရက်နောက်ပိုင်း မိုးရွာတာတွေ ဆက်သွားနိုင်လို့ နွေစပါးသိမ်းနေတဲ့ တောင်သူတွေနဲ့ ဧရာဝတီတိုင်းက ဆားတောင်သူတွေ ပြင်ဆင်စရာတွေပြင်ဆင်ဖို့နဲ့ လုပ် စရာရှိတာတွေ အမြန်အပြီးသတ်ထားဖို့လည်း ဦးဝင်းနိုင်က တိုက်တွန်းပါတယ်။ 

မေလ ၇ ရက်နောက်ပိုင်းမှာ မြစ်ဝကျွန်းပေါ်ကမ်းနီးရေလုပ်ငန်း လုပ်ကွက်တွေမှာ လေတိုက်နှုန်း တစ်နာရီ မိုင် ၃၀ မှ ၄၀ လောက်အထိ ရှိနိုင်ပြီး လှိုင်းအမြင့်က ၁၀ ပေအထိ ရှိနိုင်လို့  ပင်လယ်ပြင်က ရေလုပ်သားများတွေလည်း ကြိုတင်ဆုတ်ထားဖို့လိုအပ်ရင် ဆုတ်ထား သင့်တယ်လို့လည်း ဦးဝင်းနိုင်က သတိပေးမှု ပြုလုပ်ထားပါတယ်။

ဓာတ်ပုံများခရက်ဒစ် - Win Naing Facebook page

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။