စိုက်ပျိုးသုတ ဇွန်လ

ယခုဇွန်လသည် မိုးဦးရာသီသီးနှံများကို အပြီးစိုက်ပျိုးသင့်သည့်လ ဖြစ်သည်။ သီးထပ်သီးနှံစိုက်ပျိုးခြင်းဖြင့် သီးနှံစိုက်စွမ်းအားမြင့်မားရေးကို ဆောင်ရွက်နိုင်ရန် စိုက်ချိန်နောက်ကျခြင်းမရှိစေဘဲ အသက်လျင်သည့်မျိုးကိုအသုံးပြုသင့်သည်။ စိုက်ပျိုးပြီး ပျက်စီးခြင်း၊ အထွက်နည်းခြင်း မဖြစ်စေရေးအတွက် မိုးခေါင်ဒဏ်ခံနိုင်သည့်မျိုးကို ရွေးချယ်စိုက်ပျိုးသင့်ပါသည်။

ထို့ပြင် ဇွန်လသည် မိုးစပါးကို စတင်ပျိုးထောင်ခြင်း(သို့မဟုတ်) မျိုးစေ့ချ တိုက်ရိုက်စိုက်ခြင်းတို့ကို ဆောင်ရွက်သင့်သည့်လဖြစ်သည်။ စပါးအခြေခံသီးနှံပုံစံအဖြစ် သီးထပ်စိုက်ပျိုးရေးကို ဆောင်ရွက်နိုင်ရန် ပျိုးထောင်ခြင်း(သို့မဟုတ်)မျိုးစေ့မြေချခြင်းတို့တွင် နောက်ကျမှု မဖြစ်စေသင့်ပါ။

နှစ်သီးစား သုံးသီးစားစနစ်တွင် ယခုမိုးစပါးသည် ပထမသီးနှံဖြစ်သည်။ ပထမသီးနှံ စိုက်ချိန်နောက်ကျလျှင် ဒုတိယသီးနှံ၊ တတိယသီးနှံများလည်း ဆက်လက်နောက်ကျမည် ဖြစ်ရာ ထိုဒုတိယသီးနှံ၊ တတိယသီးနှံတို့၏အထွက်ကို ထိခိုက်စေနိုင်ပါသည်။

ယခုလအတွင်း စိုက်ပျိုးမည့်မိုးဦးသီးနှံများနှင့် မိုးစပါးသီးနှံတို့နှင့်ပတ်သက်၍ အရေးကြီးသည့်အချက်အချို့ကို အသိပေးဖော်ပြလိုပါသည်။

၁။ မိုးဦးသီးနှံများ

နှမ်းလျင်သီးနှံ

မျိုးစေ့သန့်စင်မှု (၉၈)ရာခိုင်နှုန်းနှင့် အပင်ပေါက် (၈၀)ရာခိုင်နှုန်းအထက်နှင့် ရှိသည့်မျိုးကိုအသုံးပြုပြီး ဇွန်လအတွင်း အပြီးစိုက်ပျိုးသင့်သည်။

တစ်ဧကအပင်ဦးရေမှန်ကန်စေရန် အတန်းလိုက်စိုက်ပျိုးသင့်သည်။ တစ်ပင်တိုင်မျိုးဖြစ်ပါက တစ်တန်းနှင့်တစ်တန်း(၁)ပေခြား၊ သက်လျင်မျိုးဖြစ်ပါက တစ်တန်းနှင့်တစ်တန်း(၁၅)လက်မခြား၊ သက်လတ်မျိုးဖြစ်ပါက တစ်တန်းနှင့်တစ်တန်း (၁၈)လက်မခြားထား၍ စိုက်ပျိုးသင့်သည်။

ရာသီဥတုဖောက်ပြန်မှုအရ မိုးကြီးရွာချလျင် ရေဝပ်ပျက်စီးခြင်းမရှိစေရေးအတွက် စိုက်ခင်းအတွင်း ရေထုတ်မြောင်း၊ ရေစိမ့်မြောင်းများထားရှိသင့်သည်။

အပင်ကြီးထွားမှုကို မထိခိုက်စေရေးအတွက် နှမ်းမူမှန်အရွက် (၆) ရွက်ထွက်ချိန် ဖြစ်သည့် အပင်သက်တမ်း (၂)ပတ်သားတွင် သားခွဲခြင်းလုပ်ငန်းကို မဖြစ်မနေ ဆောင်ရွက်သင့်သည်။

စိုက်ခင်းအတွင်း ပေါင်းမြက်ကင်းစင်ရေးဆောင်ရွက်ရန်နှင့် အထူးသဖြင့် မြေသြဇာကျွေးချိန်တွင် ပေါင်းမြက်များကင်းစင်နေသင့်သည်။ ထို့ပြင်မြေကြီးထဲတွင် အစိုဓာတ်လုံလောက်စွာရှိမှသာ မြေသြဇာကျွေးရန် ဖြစ်ပါသည်။

မြေပဲသီးနှံ

မြေပဲမျိုးစေ့ကို ပဲမြစ်ဖုမြေသြဇာနှင့်လူးနယ်ပြီး ဇွန်လအတွင်း အပြီး စိုက်ပျိုး သင့်သည်။

တစ်ဧကလျှင် စိုက်ကျင်းဦးရေ(၁၀၀,၀၀၀)မှ (၁၁၀,၀၀၀)အတွင်းရရှိအောင် တန်းကြား(၁)ပေ၊ ပင်ကြား(၄)လက်မ(သို့မဟုတ်) တန်းကြား(၁၅)လက်မ၊ ပင်ကြား (၄)လက်မဖြင့် စိုက်ပျိုးသင့်သည်။

မိုးကြီးရွာချပါက ရေဝပ်ခြင်းနှင့် ရေနစ်မြုပ်ခြင်းမဖြစ်စေရန် စိုက်ခင်းအတွင်း ပြင်ဆင်ထားသင့်သည်။

စိုက်ပြီးတစ်လအတွင်း လက်ပေါင်းနှုတ်ခြင်းနှင့် ကြားတိုက်ပေါင်းလိုက်ခြင်း ပြုလုပ်၍ ပေါင်းမြက်ကို နှိမ်နင်းသင့်သည်။

ပေါင်းမြက်ကိုပြောင်အောင်ရှင်းပြီးမှ မြေအစိုဓာတ်ရှိချိန်တွင် မြေသြဇာကျွေး သင့်သည်။

ပိုတက်ဆီယမ်နှင့် နိုက်ထရိုဂျင်ဓာတ်မြေသြဇာများကိုကျွေးပါက မြေသြဇာဆုံးရှုံးမှု နည်းစေရန် အကြိမ်ခွဲ၍ ကျွေးသင့်ပါသည်။

အစေ့ထုတ်ပြောင်းသီးနှံ

အပင်ပေါက် ၈၅ မှ ၉၀ ရာခိုင်နှုန်း အထက်ရှိသည့်မျိုးဖြင့် ဇွန်လအတွင်းအပြီး စိုက်ပျိုးသင့်သည်။

တစ်ဧကအပင်ဦးရေ(၂၃,၀၀၀ မှ ၂၅,၀၀၀)ရရှိအောင် တန်းကြား(၂)ပေနှင့် (၆)လက်မ၊ ပင်ကြား (၉)လက်မဖြင့် စိုက်သင့်သည်။

ရေဝပ်ပျက်စီးခြင်းမဖြစ်စေရန် စိုက်ကွက်တွင် ရေထုတ်မြောင်းများထားရှိခြင်း၊ စိုက်ပျိုးစဥ်ကပင် ဘောင်ဖေါ်စိုက်ပျိုးခြင်းများဆောင်ရွက်သင့်သည်။

၁၄ ရက်သားအပင်ပေါက်စုံချိန်တွင် တစ်ကျင်းတစ်ပင်ချန် သားခွဲသင့်သည်။

‌ပေါင်းမြက်ကင်းစင်အောင် ဆောင်ရွက်သင့်ပါသည်။

နေကြာသီးနှံ

အနည်းဆုံးအပင်ပေါက်ရာခိုင်နှုန်း ၈၀ အထက်ရှိသော နေကြာမျိုးစေ့ကို အသုံးပြု၍ ဇွန်လအတွင်းအပြီး စိုက်ပျိုးသင့်သည်။

တစ်ဧကလျှင် အပင်ဦးရေ (၂၉,၀၀၀)အပြည့်အဝရရှိစေရန် တန်းကြား (၂) ပေ၊ ပင်ကြား (၉) လက်မထား၍ စိုက်ပျိုးသင့်သည်။

အပင်‌ပေါက်စုံပြီး (၁၄) ရက်သားတွင် တစ်ကျင်းတစ်ပင်ချန်၍ အပြီးသားခွဲသင့်သည်။

အပင်ငယ်စဥ်ပေါင်းမြက်ကင်းစင်အောင် ဆောင်ရွက်သင့်ပါသည်။

ပဲတီစိမ်းသီးနှံ

မျိုးစေ့ကို ပဲမြစ်ဖုမြေသြဇာနှင့်လူးနယ်ပြီး ဇွန်လလယ်ထက်နောက်မကျဘဲ စိုက်ပျိုးသင့်သည်။

တစ်ဧကလျှင် အပင်ဦးရေ(၁၀၀,၀၀၀)အပြည့်အဝရရှိစေရန် တန်းကြား(၁)ပေနှင့် (၆)လက်မ၊ ပင်ကြား(၃) မှ (၄) လက်မထား၍ စိုက်ပျိုးသင့်သည်။

အဝါရောင်မိုစေ့ရောဂါဒဏ်ခံနိုင်ပြီး အပင်ပေါက်ရာခိုင်နှုန်း ၈၅ မှ ၉၀ ရာခိုင်နှုန်း အထက်ရှိသောမျိုး ဖြစ်သင့်သည်။

ပေါင်းမြက်များကို အပင်ငယ်စဥ်တွင် နိုင်နင်းအောင်နှိမ်နင်းသင့်သည်။

အလားတူ အပင်ငယ်စဥ်တွင် ကျရောက်လေ့ရှိသော ပင်စည်ထိုးယင်စသည့် ပိုးမွှားများကို ထိရောက်စွာ ကာကွယ်နှိမ်နင်းသင့်ပါသည်။

ပဲစင်းငုံသီးနှံ

အပင်ပေါက်ရာခိုင်နှုန်း(၈၅) မှ (၉၀)နှင့်အထက်ရှိသောမျိုးကို ဇွန်လအတွင်း အပြီးစိုက်ပျိုးသင့်သည်။

အပင်ဦးရေအပြည့်အဝရရှိစေရန် သက်လျင်မျိုးဖြစ်ပါက တန်းကြား (၂)ပေနှင့် (၆)လက်မ(သို့မဟုတ်)(၃)ပေ၊ ပင်ကြား(၁)ပေ၊ သက်လတ်မျိုးဖြစ်ပါက တန်းကြား (၄)ပေနှင့်(၆)လက်မ(သို့မဟုတ်)(၅)ပေ၊ ပင်ကြား(၁)ပေအကွာအဝေးထား၍ စိုက်ပျိုးသင့် သည်။

အပင်ပေါက်စုံချိန်မှစ၍ ပေါင်းမြက်ကင်းစင်အောင်ဆောင်ရွက်သင့်ပါသည်။

၂။ မိုးစပါးသီးနှံ

ဆည်ရေသောက်ဒေသနှင့် မိုးရေသောက်ဒေသနှစ်မျိုးလုံး၌ ပျိုးထောင်ရေရရှိပါက ဇွန်လလယ်တွင် စပါးစတင်ပျိုးထောင်သင့်သည်။

သို့မဟုတ် စိုက်ခင်းရေရရှိပါက ဇွန်လလယ်တွင် အစိုတမန်းပြင် တိုက်ရိုက်မျိုးစေ့ချ စိုက်ပျိုးနိုင်သည်။

စပါးမျိုးမှာ သက်လတ်စပါးတစ်မျိုးမျိုး ဖြစ်သင့်သည်။

မျိုးကောင်းမျိုးသန့်မျိုးစေ့ကို အသုံးပြုရန်ဖြစ်သည်။

အကယ်၍ ပျိုးထောင်ရေမရရှိဘဲ စပါးစတင်စိုက်ပျိုးလိုပါက မြေအစိုဓာတ် လုံလောက်ချိန်တွင် နှမ်း၊ ပြောင်း၊ မြေပဲ၊ ပဲမျိုးစုံသီးနှံများ စိုက်ပျိုးသကဲ့သို့ ထယ်ထိုးထွန်မွှေမြေပြုပြင်ပြီး စပါးအခြောက်ထယ်ရေးအခြောက်မျိုးစေ့ချစနစ်(Dry Direct Seeded Rice Method) ဖြင့် စပါးစိုက်ပျိုးသင့်ပါသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...