စိုက်ပျိုးရေးသုံးပိုးသတ်ဆေးနှင့် အုန်းဆီ

ယခုအခါမှာ လူနှင့် ပတ်ဝန်းကျင်ကို မထိခိုက်စေနိုင်သော ဓာတုမြေသြဇာများ၊ ဓာတုပိုးသတ်ဆေးများ ကင်းစင်သည့် အော်ဂဲနစ်စိုက်ပျိုးရေးပုံစံကို ဦးစားပေးလာကြပါတယ်။

ဒီနေရာမှာ အုန်းဆီပါဝင်သည့် အန္တရာယ်မရှိသော ကမ္ဘာ့အသိအမှတ်ပြု ပိုးသတ်ဆေးအဖြစ် အမေရိ ကန်နိုင်ငံ၏ စိုက်ပျိုးရေး စာစောင်များမှာပင် ကြော်ငြာ၍ စီးပွားဖြစ်ထုတ်လုပ် ဖြန့်ဖြူးရောင်းချတဲ့ ပိုးသတ်ဆေးတစ်မျိုးကို ဖော်ပြလိုပါတယ်။ ဖော်စပ်နည်းကလည်း အလွန်ရိုးရှင်းနေတဲ့အတွက် အထင်သေးသွားမှာပင် စိုးရိမ်ရပါတယ်။ ကုန်ကြမ်း ပိုတက်ဆီယမ်ဟိုက်ဒရောက်ဆိုက်(KOH) ကို ရန်ကုန်မြို့၊ ကုန်စျေးတန်းဓာတုပစ္စည်းဆိုင်မှာ ရရှိနိုင်ပါတယ်။

ပထမဦးစွာ တစ်လီတာဆန့်တဲ့ ရေသန့်ပုလင်းထဲကို အုန်းဆီ ဟင်းစားဇွန်းတစ်ဇွန်း(၁၀) စီစီထည့်ပြီး KOH ဟင်းစားဇွန်းတစ်ဇွန်း (၁၀) စီစီထည့်ကာ ၎င်းထဲသို့ ရေဖြည့်ပြီး လှုပ်ပေးရပါမယ်။

အသုံးပြုပုံနှင့် ဆေးနှုန်းထားကတော့

၁။ အိမ်တွင်းအလှစိုက်ပင်မှန်သမျှ အလင်းရောင်ရရှိမှု အလွန်အားနည်းတဲ့အခါ၊ ရေပြတ်သည့်အခါမှာ ဒက်ပိုး၊ အကြေးပိုး ကျရောက်တတ်ပါတယ်။ ရေတစ်ဂါလံလျှင် ဖော်စပ်ပြီးဆေး ဟင်းစားဇွန်း (၃) ဇွန်း (၃၀) စီစီ ပုလင်းလှုပ်ပီး ထည့်ပေးကာ ရွှဲနေအောင် ဖျန်းပေးပါ။ ခြောက်သွေ့သွားချိန်မှာ ဂွမ်းစများနှင့် ပွတ်တိုက်ပေးခြင်းဖြင့် ပိုးမွှားကင်းစင်သွားသည့်အပြင် အရွက်၏ အရောင်ကလည်း သန်းရှင်း တောက်ပြောင်လာပါလိမ့်မည်။

၂။ သစ်ခွပန်းပင်ကဲ့သို့ ဒက်ပိုး၊ အကြေးပိုး၊ မွှား၊ လှေးပိုးများကြောင့် ပန်းပွင့်ကုတ်ခြင်းများကို ရေတစ်ဂါလံလျှင် ဆေးရည် ဟင်းစားဇွန်း (၃) ဇွန်းထည့်ပြီး တစ်ပတ်တစ်ကြိမ် ဖျန်းပေးခြင်းဖြင့် ကာကွယ်နိုင်ပါတယ်။

၃။ နှင်းဆီ၊ Kiss Me ကဲ့သို့ ပန်းမန်ပင်များတွင် ကျရောက်သော မွှားပင့်ကူများကို ရေတစ်ဂါလံလျှင် ဆေးရည် (၃၀ မှ ၄၀)စီစီ ထည့်ကာ ပက်ဖျန်းပေးပါ။ ဘော်ဒိုမှိုသတ်ဆေးရည်နှင့် တွဲဖျန်းလျှင် ပိုကောင်းပါတယ်။

၄။ ရုံးပတီ၊ ခရမ်း၊ ပဲတောင့်ရှည်ကဲ့သို့ ဟင်းသီးဟင်းရွက်များတွင်ကျသော ပျပိုး၊ လှေးပိုး၊ မွှားပင့်ကူနီ၊ ယင်ဖြူ၊ လိပ်ပြာဖလံအုပ်စုဖြစ်တဲ့ ငမြှောင်တောင်၊ ခူမွေးရှည်၊ ထွာကောင်စိမ်း၊ ပင်ဖြတ်ပိုးများကို ရေတစ်ဂါလံလျှင် ဆေးရည် (၄၀-၅၀) စီစီနှုန်းဖြင့် တစ်ပတ်လျှင် တစ်ကြိမ် ဖျန်းပေးပါ။ လိပ်ပြာဖလံ အုပ်စုအတွက် ဆေးရွက်ကြီး (၅) ကျပ်သားခန့် ရေစိမ်၍ ဆေးရည်ထဲသို့ ပေါင်းထည့်ပေးပြီး ပက်ဖျန်းလျှင် ပိုပြီး ထိရောက်ပါတယ်။

၅။ မာလကာပင်ကဲ့သို့ သစ်သီးဝလံပင်များမှာ ပျပိုး၊ အဖြူရောင် ဒက်ပိုးများကျရောက်သောအခါ ပုရွက်ဆိတ်များ အုံခဲတက်လာပီး အပင်ညိုမည်းပျက်စီးစေတတ်သဖြင့် ရေတစ်ဂါလံလျှင် ဆေးရည် (၅၀) စီစီအထက်နှုန်းဖြင့် တစ်ပတ်တစ်ကြိမ် ဖျန်းပေးနိုင်ပါတယ်။ ဒီလိုပက်ဖျန်းတဲ့အခါမှာ ဆေးရည်ခြောက်သွေ့သွားရင် ဓာတ်ကြွင်းအာနိသင် မရှိတော့တဲ့အတွက် ပိုးမွှားကျတဲ့ အပင်အစိတ်အပိုင်းတွေမှာ စိုရွှဲနေအောင် ဖျန်းပေးရပါမယ်နော်။

ကဲ အလွန်ကိုရိုးရှင်းတဲ့ အုန်းဆီပါဝင်တဲ့ ပစ္စည်းကနေ အပင်တွေမှာ ကျရောက်တဲ့ပိုးမွှားများကို ကာကွယ်နှိမ်နင်းလို့ရတယ်ဆိုတော့ အံသြဖွယ်ရာပဲ မဟုတ်ဘူးလား။

စာညွှန်း။ ။ အထက်ပါဆောင်းပါးသည် မင်းဝင်းထိန်(B.Ag)၏ ထိုင်းအုန်းမွှေးစိုက်ပျိုးနည်း ( စီးပွားရေးဆိုင်ရာ၊ ကျန်းမာရေးဆိုင်ရာ၊ အလှအပဆိုင်ရာ အုန်းသီးပင် ထုတ်ကုန်များ)စာအုပ်မှ ကူးယူဖော်ပြခြင်းဖြစ်သည်။ အုန်းဆီ၊ အုန်းနို့နှင့် ပတ်သက်သည့် အကျိုးကျေးဇူးများကို ဆက်လက်ဖတ်ရှုလိုပါက ထိုစာအုပ်တွင် ဖတ်ရှုနိုင်ပါသည်။