ယခုနှစ် အောက်တိုဘာလအထိ သီးနှံမျိုးပေါင်း ၁၀၂၇ မျိုးကို အသိအမှတ်ပြုလက်မှတ်ထုတ်ပေး

22/11/2019 10:30 AM တွင် အစိမ်းရောင်လမ်း အစိမ်းရောင်လမ်း မှ ရေးသား ပြီး Greenovator Greenovator မှ ပေးပို့ထားပါသည်။

မျိုးစေ့ဆိုင်ရာ အမျိုးသားကော်မတီအ‌နေဖြင့် ၂၀၁၉ ခုနှစ် အောက်တိုဘာလအထိ သီးနှံ ၆၂ မျိုး၏ မျိုးကွဲ ၉၀၉ မျိုးနှင့် မိဘမျိုးလိုင်း ၁၁၈ လိုင်း၊ စုစုပေါင်း ၁၀၂၇ မျိုးတို့ကို အသိအမှတ်ပြုလက်မှတ် ထုတ်ပေးခဲ့ပြီးဖြစ်ကြောင်း သိရသည်။ 

နိုဝင်ဘာ (၁၉) ရက်က စိုက်ပျိုးရေး၊ မွေးမြူရေးနှင့် ဆည်‌မြောင်းဝန်ကြီးဌာန ပြည်ထောင်စုဝန်ကြီးရုံး အစည်းအဝေးခန်းမ၌ ကျင်းပပြုလုပ်သည့် မျိုးစေ့ဆိုင်ရာ အမျိုးသားကော်မတီ၏ (၁၆)ကြိမ်မြောက်အစည်းအဝေးမှ သိရသည်။ 

အရည်အသွေးကောင်း သီးနှံမျိုးကောင်းမျိုးသစ်များ ရရှိသုံးစွဲနိုင်ရေးသည် အရေးကြီးသကဲ့သို့ ထုတ်လုပ်ပြီးသော မျိုးသစ်များအနေဖြင့်လည်း မျိုးစေ့စံချိန်စံညွှန်းပြည့်မီရန်လိုအပ်ပြီး မျိုးစေ့လုပ်ငန်းများ စနစ်တကျရှိစေရန်၊ မျိုးစေ့ဥပဒေ လုပ်ထုံးလုပ်နည်းများနှင့်အညီ ကြပ်မတ်‌‌ဆောင်ရွက်ခြင်းလုပ်ငန်းများကိုလည်း တချိန်တည်း တပြိုင်တည်း ဆောင်ရွက်ရန်လို‌ကြောင်း မျိုးစေ့ဆိုင်ရာ အမျိုးသားကော်မတီ ဥက္ကဌ၊ ဒုတိယဝန်ကြီး ဦးလှကျော်က ပြောသည်။ 

ထို့အပြင် မျိုးစေ့ပညာရှင်များအနေဖြင့် နိုင်ငံအကျိုး၊ တောင်သူလယ်သမားများအကျိုးကို ရှေးရှု၍ ပုဂ္ဂလိကမျိုးစေ့ကဏ္ဍ ဖွံ့ဖြိုးလာရေး အားပေးကူညီဆောင်ရွက်ကြရန်နှင့် ပြည်တွင်း၊ ပြည်ပ ရင်းနှီးမြှုပ်နှံမှုများ တိုးတက်လာစေရေးအတွက် လိုအပ်ပါက မျိုးစေ့ဆိုင်ရာ အမျိုးသားမူဝါဒ ပြင်ဆင်ဖြည့်စွက်ရေးကိုလည်း ဝိုင်းဝန်းကြိုးပမ်းကြရမည်ဖြစ်ပြီး နည်းပညာများ ပြန့်ပွားရေးနှင့် အများပြည်သူ လိုက်နာဆောင်ရွက်နိုင်ရေးအတွက် သတင်းအချက်အလက်  ဖြန့်ဝေရေးလုပ်ငန်းများကို ကြိုးပမ်းဆောင်ရွက်ကြရမည်ဖြစ်ကြောင်း ဒုဝန်ကြီးက ဆက်လက်ပြောကြားသည်။ 

သီးနှံအသိအမှတ်ပြုလက်မှတ် လျှောက်ထားခြင်းနှင့်စပ်လျဉ်း၍ ဆောင်ရွက်ပြီး ဆောင်ရွက်ဆဲလုပ်ငန်းစဉ်များအား မျိုးစေ့ဆိုင်ရာ အမျိုးသားကော်မတီ အတွင်းရေးမှူး ညွှန်ကြားရေးမှူးချုပ် ဒေါက်တာရဲတင့်ထွန်းကလည်းကောင်း၊ မျိုးသစ်အသိအမှတ်ပြု လက်မှတ်ရရှိရန် တင်ပြလာသည့် သီးနှံများနှင့်စပ်လျဉ်း၍ တွေ့ကြုံရသည့် အခက်အခဲများ၊ ကုမ္ပဏီများမှ Trade name ပြောင်းလဲသုံးစွဲခွင့် တင်ပြလာမှုဆိုင်ရာကိစ္စရပ်များ၊ မျိုးစေ့တင်သွင်း/တင်ပို့ ခြင်းဆိုင်ရာထောက်ခံချက်နှင့် ဖြန့်ဖြူးခြင်းဆိုင်ရာ ကိစ္စရပ်များ၊ ဥယျာဉ်ခြံသီးနှံကဏ္ဍတွင် စမ်းသပ်စိုက်ပျိုးရသော သီးနှံများအား စမ်းသပ်စိုက်ပျိုးသီးနှံ ဖြေလျော့နိုင်ရေး ကိစ္စရပ်များ၊ သီးနှံအုပ်စုတွင် ထပ်မံဖြည့်သွင်းလိုသည့် သီးနှံဆိုင်ရာများကို မျိုးစေ့ဌာနခွဲ ညွှန်ကြားရေးမှူး ဦးသီဟထွန်းကလည်းကောင်း ရှင်းလင်းတင်ပြခဲ့သည်။ 

မျိုးစေ့ဆိုင်ရာ အမျိုးသားကော်မတီအနေဖြင့် မျိုးသစ်ထုတ်လုပ်ခြင်း၊ တင်သွင်းခြင်း၊ တင်ပို့ခြင်း၊ ဖြန့်ဖြူးရောင်းချခြင်း စသည့် သီးနှံမျိုးစေ့ဆိုင်ရာ လုပ်ငန်းများကို မျိုးစေ့ဥပဒေနှင့်အညီ ဆောင်ရွက်လျက်ရှိပြီး သီးနှံမျိုးကောင်းမျိုးသန့် မျိုးသစ်များထုတ်လုပ်ရာတွင် အပင်မျိုးသစ် အကာအကွယ်ပေးရေးဥပဒေများနှင့်အညီ စိစစ်ကြပ်မတ်ဆောင်ရွက်လျက်ရှိ‌ကြောင်း သိရသည်။ 

ယင်းအပြင် မျိုးစေ့ကျွမ်းကျင်မှုဆိုင်ရာကော်မတီ၏ သဘောထားမှတ်ချက်များနှင့်အတူ သက်ဆိုင်ရာဌာနနှင့် အဖွဲ့အစည်းများမှ အသိအမှတ်ပြုလက်မှတ် လျှောက်ထားလာသည့် သီးနှံ(၃၄)မျိုး၏ မျိုးသစ်မျိုးကွဲ (၆၁) မျိုး၊ မိဘမျိုး လိုင်းအစုံ (၁၈) စုံနှင့်သက်ဆိုင်သည့် အချက်အလက်များကို စိစစ်ပြီး  အသိအမှတ်ပြုလက်မှတ် ထုတ်ပေးနိုင်ရေးအတွက် ဆွေးနွေးခဲ့ကြောင်း သိရသည်။ 

အရည်အသွေးပြည့်မီသော မျိုးစေ့များကို လိုအပ်သောနေရာသို့ လိုအပ်နေချိန် သင့်တော်သော နှုန်းထားများဖြင့် တောင်သူလယ်သမားများ အသုံးပြုနိုင်ရန် ဆောင်ရွက်ပေးခြင်းဖြင့် ဝင်ငွေတိုးတက်ပြီး သီးနှံအထွက်နှုန်းများ မြင့်မားလာစေခြင်း၊ အရည်အသွေး‌ကောင်းမျိုးများကို အသုံးပြုခြင်းဖြင့် ကောင်းမွန်သေချာသော အထွက်နှုန်းရရှိခြင်း၊ ရာသီဥတုပြောင်းလဲမှုဒဏ် ခံနိုင်ရည်ရှိခြင်း၊ အရည်အသွေး‌ကောင်း ထုတ်ကုန်များ တိုးတက်ထုတ်လုပ်နိုင်ခြင်းနှင့် တင်ပို့နိုင်ခြင်း၊ လူနေမှုအဆင့်အတန်း မြင့်မားလာခြင်း၊ အစားအစာ ဘေးကင်းလုံခြုံစိတ်ချမှုရှိခြင်း စသည့် အကျိုးကျေးဇူးများ ရရှိနိုင်မည်ဖြစ်သည်။ 

စိုက်ပျိုးရေး၊ မွေးမြူရေးနှင့် ဆည်‌မြောင်းဝန်ကြီးဌာနအနေဖြင့် မျိုးသစ်အသိအမှတ်ပြုလက်မှတ်လျှောက်ထားခွင့်၊ မျိုးစေ့အရည်အသွေးစစ်ဆေးခန်း ဖွင့်လှစ်ခွင့်၊ မျိုးစေ့လုပ်ငန်းလိုင်စင် လျှောက်ထားခွင့်၊ မျိုးစေ့ပျိုးပင်အရောင်းဆိုင် ဖွင့်လှစ်ရောင်းချခွင့် လုပ်ငန်းလိုင်စင်များနှင့် အခြားဆက်စပ်လျက်ရှိသော အမိန့်နှင့် ညွှန်ကြားချက်များကို ထုတ်ပြန်ကြေညာခဲ့ပြီးဖြစ်ကြောင်း သိရသည်။ 

အေးအေးမြင့်(ABM)