မှိုဒိုင်များသို့ သွင်းမရသဖြင့် မှိုစိုက်တောင်သူများကိုယ်တိုင် လှည့်လည်ရောင်းချနေရ

    မှိုဒိုင်များသို့သွင်းမရသဖြင့် မှိုစိုက်တောင်သူများကိုယ်တိုင် ဈေးကွက်ရှာဖွေ လှည့်လည်ရောင်းချနေရကြောင်း ငွေနှင်းမှိုကိုယ်တိုင်စိုက်ပျိုးထုတ်လုပ်သူများထံမှ သိရသည်။

ကျွန်တော်က ငွေနှင်းမှိုမျိုးထုပ် (၃၅၀၀) စိုက်ထားပြီး၊ ကောက်ရိုးမှိုနဲ့ ငွေနှင်းမှိုမျိုးထုပ်တွေ ထုတ်လုပ်ရောင်းချတဲ့ လုပ်ငန်းကိုလည်း လုပ်ဆောင်နေပါတယ်။ အဲ့ဒီကနေမှ ငွေနှင်းမှိုအပွင့် တစ်နေ့ကို ငါးပိဿာကနေ ဆယ်ပိဿာကြား နေ့တိုင်းထွက်ပါတယ်။ အခုလောလောဆယ်မှာ ငွေနှင်းမှိုစျေးတွေက ကျဆင်းနေတဲ့အပြင်၊ ဒိုင်တွေကလည်း ကျွန်တော်တို့မှိုခြံတွေဆီက မှိုထွက်သလောက် အကုန်လုံးကို မယူပေးနိုင်ကြဘူး။ ဒါ့ကြောင် အခုရက်ပိုင်း မှိုစိုက်တောင်သူတွေက ဒိုင်တွေကိုသွင်းမရတဲ့အတွက် ကိုယ်တိုင်ပဲ ဈေးတွေမှာ သွားချရောင်းနေရတယ်။

ဟု နေပြည်တော်၊ ပျဉ်းမနားမြို့၊ သစ်လေးလုံးကျေးရွာမှ ငွေနှင်းမှိုစိုက်ပျိုးသူ ကိုညွှန့်ဝင်း(ခ)ကိုညွှန့်က ပြောသည်။

    လက်ရှိဈေးကွက်အတွင်း ငွေနှင်းမှို ဒိုင်သွင်းစျေးတစ်ပိဿာလျှင် (၂၀၀၀)ကျပ်၊ လက်လီဈေး တစ်ပိဿာလျှင် (၂၃၀၀)ကျပ်/(၂၅၀၀)ကျပ် ဈေးနှုန်းများဖြင့် ရောင်းချနေကြောင်း သိရသည်။

အခုလိုမျိုး ကျွန်တော်တို့တောင်သူတွေကိုယ်တိုင် ဈေးတွေမှာ လိုက်လံရောင်းချတာမှာတော့ နေပြည်တော် အာဟာရသုခဈေးမှာ မနက် (၄)နာရီကနေ (၆)နာရီခွဲလောက်အထိ ရောင်းချပါတယ်။ နေပြည်တော် မြို့မဈေး၊ သပြေကုန်းဈေး၊ ယုဇနဈေး၊ ရွှေကြာပင်ဈေး၊ အင်ကြင်းဈေး၊ ဂန္ဓမာဈေး စတဲ့ တခြားဈေးတွေက ဟင်းသီးဟင်းရွက်နဲ့ ကုန်စိမ်းရောင်းချသူတွေကလည်း ကျွန်တော်တို့ဆီကနေတဆင့် ဖောက်သည်ယူကြတာမျိုးလည်း ရှိပါတယ်။

ဟု ၎င်းက ဆက်လက်ပြောသည်။

    ငွေနှင်းမှိုထုပ် (၁၀၀၀) စိုက်ပျိုးထားသည့် မှိုခြံတစ်ခုသည် နေ့စဉ် မှိုအထွက်နှုန်း (၇)ပိဿာမှ (၁၂)ပိဿာအတွင်း ထွက်ရှိနိုင်ပြီး တာရှည်အထားမခံသည့်အတွက် ယခုကဲ့သို့ တောင်သူများကိုယ်တိုင် ဈေးကွက်ရှာဖွေ ရောင်းချနေကြခြင်းဖြစ်ကြောင်း သိရသည်။