ဖီးကြမ်းငှက်ပျောဝယ်လိုအားကောင်းမွန်နေသော်လည်း ခြံရှင်တချို့အကြောက်လွန်ကာ ဈေးချရောင်းခြင်းများရှိနေ

    ဖီးကြမ်းငှက်ပျော ဝယ်လိုအားကောင်းမွန်နေသော်လည်း ခြံရှင်တချို့ အကြောက်လွန်ကာ ဈေးချရောင်းခြင်းများရှိနေကြောင်း ဈေးကွက်ကျွမ်းကျင်သူများက ပြောသည်။

COVID-19 ကြောင့် ဈေးကွက်ထိခိုက်တော့မလို ယူဆခဲ့ကြပေမယ့်လည်း အခုလပိုင်းမှာ ဝယ်လိုအားတွေက မြင့်တက်နေပါတယ်။ သို့သော် COVID-19 ပြင်းထန်လာပြီး ဈေးကွက်ပျက်သွားမှာကို စိုးရိမ်နေကြတာကြောင့် ပွဲစားက ဈေးမချယူပါပဲနဲ့ တောင်သူတွေ၊ ငှက်ပျောခြံရှင်တွေကိုက အကြောက်လွန်ပြီး ဈေးတွေချရောင်းကြလို့ ပွဲစားတွေကတော့ အကြိုက်တွေ့နေကြပါတယ်။

ဟု မကွေးတိုင်းဒေသကြီး၊ ပွင့်ဖြူမြို့နယ်၊ မုန်ဇလဲကျေးရွာမှ ဖီးကြမ်းငှက်ပျော စီးပွားဖြစ်စိုက်ပျိုးသူ ကိုမောင်နိုင်က ပြောသည်။

    မင်းဘူး_ပဒန်_အမ်း လမ်း ပိတ်ထားသဖြင့် ရခိုင်ပြည်နယ်ဘက်သို့ ငှက်ပျောတင်ပို့မှု ရပ်စဲခြင်းကြောင့် အရောင်းအဝယ်ထိခိုက်မှု အနည်းငယ်ကြုံရသော်လည်း လာမည့် (၂) လတာအတွင်း COVID-19 ကူးစက်မှု ငြိမ်သက်မည်ဆိုပါက တစ်နှစ်တာစိုက်ပျိုးစရိတ်များ ပြန်လည်မြတ်စွန်းလာမည်ဟု တောင်သူများက မျှော်လင့်နေကြသည်။

အခုချိန်ထိတော့ ရောဂါကျရောက်မှု နည်းပါးနေတာလေးကိုက ကျွန်တော်တို့အတွက်က ကံကောင်းခြင်းတစ်ပါးပါပဲ။ လက်ရှိဈေးနှုန်းအရ တစ်ဧကကို သိန်းငါးဆယ်ဝင်ငွေရရှိဖို့ကတော့ အသေအချာပါပဲ။ ဒါက ဈေးချရောင်းတဲ့ တောင်သူတွေရဲ့ဝင်ငွေကို တွက်ပြတာပါနော်။ ဈေးချမပေးပဲ တင်းမာနေတဲ့တောင်သူတွေကတော့ အောက်တိုဘာလအလယ် ရောက်မှသာ အကျိုးအမြတ်အတိအကျက အဖြေပေါ်လာပါမယ်။ ဒါတွေကလည်း အစိုးရအပေါ်မူတည်နေပါသေးတယ်။ အစိုးရကသာ နောက်နှစ်လအတွင်း COVID-19 ကို ထိန်းချုပ်နိုင်ရင် ဈေးချမရောင်းဘဲ တင်းခံထားတဲ့တောင်သူတွေက တစ်ဧကကို သိန်းခုနှစ်ဆယ်ကျော် ဝင်ငွေရရှိနိုင်ဖို့ အလားအလာကောင်းတွေရှိနေတဲ့ သဘောပါ။ ဒီလိုပဲ စွန့်စားကြရတာပေါ့ခင်ဗျာ။

ဟု ကိုမောင်နိုင်က ဆက်လက်ပြောသည်။

    ၂၀၁၉ ခုနှစ် ဖီးကြမ်းငှက်ပျော စတင်စိုက်ပျိုးခဲ့စဉ်က တစ်ဖီးလျှင် ၇၀၀ ကျပ် ဈေးနှုန်းရရှိမည်ဟု ခန့်မှန်းစိုက်ပျိုးခဲ့ကြပြီး၊ COVID-19 ကာလဖြစ်သော်လည်း လက်ရှိဖီးကြမ်းငှက်ပျောပေါက်ဈေးမှာ ထင်ထားသည်ထက် ဈေးပိုမိုရရှိကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကိုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။

Read more